तुइन चुडिएर खस्दा लमजुङमा एक युवती बेपत्ता- गण्डकी - कान्तिपुर समाचार
कान्तिपुर वेबसाईट
AdvertisementAdvertisement

तुइन चुडिएर खस्दा लमजुङमा एक युवती बेपत्ता

आश गुरुङ

लमजुङ — लमजुङको दोर्दीखोलामा तुइनबाट तर्ने क्रममा डोरी चुँडिदा एक युवती बेपत्ता भएकी छन् ।

दोर्दी गाउँपालिका–६ सिमी घर भइ हाल कीर्तिपुरबेंसी बस्दै आएकी २५ वर्षीया फूलमाया गुरुङलाई दोर्दीखोलाले बगाउँदा बेपत्ता भएको प्रहरीले जनाएको छ ।

दोर्दी गाउँपालिका–६ कर्तीबेंसी र वडा नम्बर ७ को फलेनी अमितफाँट जोड्ने गरी सामान ओसारपोसार गर्न राखिएको तुइनबाट वडा नम्बर ७ अमितफाँटस्थित जलकन्यादेवी मन्दिरमा परेवा छोड्न जाने क्रममा गुरुङ खोलामा खसेकी थिइन् । उनीसँगै तुइन चढेका कीर्तिपुरकै १७ वर्षीय विकास घलेले भने तुइनको डोरी समातेर ज्यान जोगाएका छन् । गुरुङले भने तुइन समात्न नसक्दा खोलाले बगाएको जिल्ला प्रहरी कार्यालयका प्रहरी निरीक्षक ओमप्रकाश पुनले बताए ।

जनैपूर्णिमाको दिन उक्त मन्दिरमा पूजा गर्न जाने क्रममा सोमबार बिहान १० बजेतिर उक्त दुर्घटना भएको प्रहरीले जनाएको छ । दोर्दी गाउँपालिका कार्यपालिका सदस्य उषा गुरुङका अनुसार उक्त तुइनबाट सामान तार्ने गरिएको थियो । मानिस हिँड्नको लागि करिब आधा घण्टामाथि छोटेखोलामा झोलुंगे पुल रहेको छ । पहिले मन्दिर निर्माणका लागि सामान तार्न राखिएको तुइनमा जोखिम मोलेर चढ्दा मानिस नै हराएको उनले बताइन् । फलामको डोरी राखेर बनाइएको तुइनमा मानिसलाई आवतजावत गर्न बन्देज लगाइए पनि लुकिछिपी चढेकाले दुर्घटना भएको दोर्दीगाउँपालिका उपाध्यक्ष दिलबहादुर घलेले बताए । प्रहरीका अनुसार डोरीले मानिसको तौल धान्न नसक्दा दुर्घटना भएको हो ।

बेपत्ता गुरुङको श्रीमाञ्ज्याङ प्रहरी चौकी नौथर र अस्थायी प्रहरी पोष्ट कीतिपुरबेंसीका प्रहरी टोलीले खोजी गरिरहेको प्रहरी निरीक्षक पुनले बताए ।

प्रकाशित : श्रावण १९, २०७७ २२:१९
प्रतिक्रिया
पठाउनुहोस्

प्रदेश प्रहरी तालिम केन्द्रका ६ जनालाई कोरोना संक्रमण

अवधेशकुमार झा

राजविराज — राजविराजस्थित प्रदेश प्रहरी तालिम केन्द्रका ६ जना प्रहरीमा सोमबार साँझ कोरोना संक्रमण पुष्टि भएको छ ।्

सोमबार साँझ पुष्टि भएका ७ जनामध्ये ६ जना प्रहरी तालिम केन्द्रका प्रहरी र एकजना बिमा कम्पनीमा काम गर्ने कर्मचारी रहेको जिल्ला स्वास्थ्य कार्यालय सप्तरीले जनाएको छ । प्रहरीहरुले आफ्नो ठेगाना राजविराज–८ लेखाइदिएका कारण कोरोना पुष्टि भएको ४ घण्टासम्म उनीहरुको पहिचान हुन सकेको थिएन ।

स्वास्थ्य कार्यालय प्रमुख दुनियाँलाल यादवका अनुसार तालिम केन्द्रभित्रका अन्य ५ जना प्रहरीलाई ज्वरो आएको सूचना प्राप्त भएको बताए । उनले तालिम केन्द्रमा रहेका अन्य प्रहरीको पनि स्वाब संकलनको तयारी भएको जानकारी दिए ।

तालिम केन्द्रका प्रमुख एसएसपी हरिराज वाग्लेका अनुसार तालिम केन्द्रमा हालसम्म ७ जना प्रहरी संक्रमित भएका छन् ।

प्रकाशित : श्रावण १९, २०७७ २१:५६
पूरा पढ्नुहोस्
प्रतिक्रिया
पठाउनुहोस्
×