घान्द्रुकमा जिप दुर्घटना हुँदा चालकको मृत्यु- गण्डकी - कान्तिपुर समाचार
कान्तिपुर वेबसाईट
AdvertisementAdvertisement

घान्द्रुकमा जिप दुर्घटना हुँदा चालकको मृत्यु

दीपक परियार

पोखरा — कास्कीको अन्‍नपूर्ण गाउँपालिका-१० घान्द्रुकको क्लीयूमा सोमबार जीप दुर्घटना हुँदा चालकको मृत्यु भएको छ । ग २ च २८१७ नम्बरको जिप भीरबाट खस्दा मुस्ताङका ४० वर्षीय सोमप्रसाद शेरचनको घटनास्थलमै मृत्यु भएको हो ।

वीरेठाँटी प्रहरी चौकीका हवल्दार शेरबहादुर कुँवरका अनुसार शेरचनले सोमबार नै घान्द्रुकमा खाद्यान्न पुर्‍याएर पोखरा फर्किँदै थिए । क्लीयूको उकालोमा जीप पछाडि गुडेर झण्डै ५ सय मिटर तलको मोदी खोलामा पुगेको थियो ।

उनको शव भने बाटोबाट २ सय मिटर तल अड्किएको अवस्थामा फेला परेको थियो । वडा प्रहरी कार्यालय बगरको टोली घटनास्थल पुगेर शव निकालेको छ ।

प्रकाशित : श्रावण १९, २०७७ १७:०७
प्रतिक्रिया
पठाउनुहोस्

फेरि पनि नबिल ‘उत्कृष्ट बैंक’

कान्तिपुर संवाददाता

काठमाडौँ — नबिल बैंकलाई बेलायतको पत्रिका युरोमनीले दोस्रो पटक ‘नेपालको उत्कृष्ट बैंक’ बाट पुरस्कृत गरेको छ ।

समकालीन बैंकमध्ये बदलिँदो परिवेशमा बैंकले प्रदान गरेको सेवा तथा नाफामा गरेको वृद्धिलगायतलाई आधार मानेर यो सम्मान प्रदान गरिएको बताइएको छ । नबिललाई समग्र बैंकिङ कार्यसम्पादन मूल्यांकन गरी उत्कृष्ट ठहरिँदै युरोमनीले पुरस्कृत गरेको बैंकले जनाएको छ ।

सन् १९९२ मा स्थापना भएको ‘युरोमनिज अवार्ड फर एक्सिलेन्स’ लाई बैंकिङ क्षेत्रको एक मौलिक पुरस्कारका रूपमा लिइन्छ ।

प्रकाशित : श्रावण १९, २०७७ १७:०५
पूरा पढ्नुहोस्
प्रतिक्रिया
पठाउनुहोस्
×