पृथ्वी राजमार्गअन्तर्गत तनहुँका चार ठाउँमा पहिरो
काठमाडौँ — अविरल वर्षाका कारण पृथ्वी राजमार्गअन्तर्गत तनहुँका चार ठाउँमा पहिरो जाँदा यातायात अवरुद्ध भएको छ ।
म्याग्दे गाउँपालिकास्थित गुणादी, बन्दीपुर गाउँपालिकास्थित बिमलनगर, आँबुखैरेनी गाउँपालिकाको मार्कीचोक र ऐनापहरामा सडकमाथिबाट पहिरो खसेको हो । सडक अवरुद्ध भएपछि सवारी साधन गन्तव्यमा पुग्न पाएका छैनन् । जिल्ला प्रहरी कार्यालयका डीएसपी युवराज तिमिल्सिनाले पहिरो पन्छाउने काम भइरहेको बताए । ‘एक्स्काभेटर प्रयोग गरेर पहिरो हटाउन प्रयास गरिरहेका छौं’, उनले भने, ‘मौसमले साथ दिए छिटै सडक खुल्नेछ ।’
पहिरोका कारण बन्दीपुर गाउँपालिकास्थित डुम्रे–बन्दीपुर सडकखण्डमा करिब १० मिटर सडक भासिएको छ । जिल्लाका विभिन्न सडकखण्डमा गएको पहिरोका कारण दर्जनौं यात्रु अलपत्र परेको प्रहरीले जनाएको छ ।
प्रकाशित : श्रावण ६, २०७७ १४:२०