पर्वतको क्वारेन्टाइनमा बसेका एक व्यक्तिको मृत्यु- गण्डकी - कान्तिपुर समाचार
कान्तिपुर वेबसाईट
AdvertisementAdvertisement

पर्वतको क्वारेन्टाइनमा बसेका एक व्यक्तिको मृत्यु

‘उच्च रक्तचापका बिरामी उनको केही दिनअघि औषधि सकिएको थियो’
अगन्धर तिवारी

पर्वत — पर्वतको क्वारेन्टाइनमा बसेका एक व्यक्तिको मृत्यु भएको छ । पीसीआर रिपोर्ट नेगेटिभ आएपछि गाउँको क्वारेन्टाइनमा पठाइएका एक ५२ वर्षीय पुरुषको मृत्यु भएको हो ।

पैयुँ गाउँपालिका–६ का ती पुरुषको शुक्रबार राति गण्डकी अस्पताल पोखरामा मृत्यु भएको हो । श्वासप्रश्वासमा समस्या आएपछि शुक्रबार राति उनलाई अस्पताल पुऱ्याइएको थियो । उनलाई राति नै चिकित्सकले मृत घोषणा गरेका थिए ।

स्वास्थ्य कार्यालयका प्रमुख डा. भोजराज गौतमका अनुसार असार पहिलो साता भारतबाट फर्किएका उनको असार २३ गते पीसीआर रिपोर्ट नेगेटिभ आएको थियो । कोरोना रोकथाम जिल्लास्तरीय कमाण्ड फोर्सको निर्णयअनुसार रिपोर्ट नेगेटिभ आएकोले उनलाई दुई साताका लागि पैयुँ–४ स्थित जनसेवा संस्कृत माध्यमिक विद्यालयको क्वारेन्टाइनमा पठाइएको थियो । २४ गते उक्त क्वारेन्टाइनमा पठाइएका उनको बसाइ आइतबार सकिंदै थियो ।

उच्च रक्तचापको नियमित औषधि सेवन गर्दै आएका उनको केही समयदेखि औषधि सकिएको थियो । ‘उता खाएको औषधि यहाँ आएपछि केही समय रोकिएको रहेछ,’ डा. गौतमले भने, ‘बीचमा सास फेर्न गाह्रो भयो भनेपछि मैले नै सल्लाह दिएर गण्डकी अस्पताल पठाएको हो । राति निधन भएछ ।’

कोरोनाको लक्षण नदेखिएको भए पनि उनको दाहसंस्कारमा सहज बनाउन स्वाबको नमुना लिइएको डा. गौतमले बताए । ‘क्वारेन्टाइनमै रहेको हुँदा एक पटक स्वाब लिएर रिपोर्ट आएपछि मात्रै दाहसंस्कार गर्न सल्लाह दिएका छौं,’ गौतमले भने, ‘मैले हाम्रो क्षेत्रीय निर्देशकज्यूलाई पनि भनेको छु ।’

प्रकाशित : श्रावण ३, २०७७ ०९:४०
प्रतिक्रिया
पठाउनुहोस्

सामान्य दिनचर्यामा फर्कंदै संक्रमणमुक्त भएकाहरू

सुम्निमा चाम्लिङ

इटहरी — इटहरीका ५० वर्षीय छटीलाल चौधरी डेढ दशकयता भारतको हरियाणामा इलेक्ट्रिसियनको काम गर्थे । व्यक्तिगत खर्च कटाएर घरमा पैसा पठाउन पुगेकै थियो । तर कोरोना भाइरसका कारण स्वदेश फर्कन पर्‍यो ।

लहान बोर्डर हुँदै आएका उनी त्यहाँको क्वारेन्टाइनमा बस्न सकेनन् । अनि आफ्नै खर्चमा इटहरीको जनता स्कुलको क्वारेन्टाइनमा आए । दुई दिनपछि रिपोर्ट पोजिटिभ देखियो । ‘पोजिटिभ भएको थाहा पाउँदा अप्ठ्यारो भयो,’ चौधरीले भने, ‘तर मर्छु भन्नेचाहिँ थिएन । किनभने उता पनि पसिना बगाएरै काम गर्नुपर्थ्यो ।’

अहिले उनी १६ दिनको आइसोलेसन बसाइपछि घर फर्किएका छन् । खेतीपातीमा व्यस्त छन् । उनी संक्रमित भएको थाहा पाएपछि गाउँका मानिसले परिवारलाई गर्ने व्यवहार बदलियो । उनले घर फर्किएपछि स्थानीयलाई कोरोनाबारे बुझाउने सोचेका थिए । तर बुझाउन उनले सोचेजति सहज भएन । ‘गाउँघरमा सुझाव दिन निकै अप्ठ्यारो छ । कोरोना लागेको मान्छे भनेर उल्टै डराउँछन्,’ उनले भने ।

इनरुवा नगरपालिकाका दिनेश पण्डित भारतको दिल्लीमा मोबाइल रिपेयरिङको काम गर्न थालेको ६ महिना मात्र भएको थियो । लकडाउनपछि उनी कुनौली बोर्डर हुँदै नेपाल आइपुगे । इनरुवाको क्वारेन्टाइनमा बसेको १० दिनपछि कोरोना पोजिटिभ देखियो । हाल उनी १७ दिनको आइसोलेसन बसाइपछि निको भएर घर फर्किएका छन् । ‘आइसोलेसनमा बस्दा निकै डर थियो । तर बाँच्न सकिन्छ भन्ने मनमा थियो,’ उनले भने ।

उनी संक्रमित हुँदा गाउँले उनको परिवारबाट समेत टाढै बस्थे । ‘घरको बाटोसमेत कोही हिँड्दैनथ्यो,’ उनले भने, ‘अहिले सबै ठिक भएको छ ।’ कोरोनाबारे जानकारी नहुँदा मानिसले गर्ने व्यवहार नकारात्मक भएको उनको अनुभव छ । अब भारत नजाने सोच बनाएका उनी इनरुवामै मोबाइल रिपेयरिङ सेन्टर चलाउने तयारीमा छन् ।

कोसी गाउँपालिकाका पाण्डव मण्डल भारतको हरियाणामा कुरियरको काम गर्थे । बिदा सकेर काममा फर्किएको एघारौं दिनमै लकडाउन सुरु भयो । तीन महिना कामविहीन भएर डेरामा बसे । घरबाट पठाएको पैसाले कोठा भाडा तिर्न र नेपाल आउन पुग्यो । जोगबनी बोर्डर हुँदै आएकाम उनी गाउँपालिकाको क्वारेन्टाइनमा बसे । १६औं दिनमा उनको रिपोर्ट पोजिटिभ आयो । अहिले उपचारपछि घर फर्किसकेका छन् ।

‘लक्षण केही नभए पनि कोरोनो देखियो,’ उनी भन्छन्, ‘राति सुत्दा निन्द्रा लाग्दैनथ्यो । मनमा कुरा खेलिरहन्थ्यो ।’ यस्तो बेला परिवारले निकै भरोसा दियो । अब यतै मजदुरी गरेर परिवार पाल्ने उनको सोच छ । तर, स्थानीय सरकार वा संस्थाले कुनै सीप प्रदान गरे राहत मिल्ने उनको भनाइ छ ।

कोसी गाउँपालिकाकै सुर्वेश मण्डल हरियाणामा कार सफाइको काम गर्थे । आठ वर्षदेखि परिवारसहित काम गर्दै आएका उनी लकडाउनपछि नेपाल आएका हुन् । क्वारेन्टाइनमा बसेको दुई सातापति उनको र श्रीमतीको रिपोर्ट पोजिटिभ आयो ।

गोठगाउँको आइसोलेसनमा १३ दिनको बसाइपछि बुधबार उनी घर फर्किसके । सात दिन होम क्वारेन्टाइनमा बसेपछि मात्रै बाहिर निस्कनेछन् । नेपालमा रोजगारी नभएकैले उनी भारत गएका थिए । अब पनि के काम गर्ने भन्ने चिन्ता छ । कोरोनाको विषयमा पालिकाले जनचेतनामूलक कार्यक्रम सञ्चालन गर्न सके संक्रमितलाई गरिने व्यवहार सहज हुने उनले बताए ।

प्रकाशित : श्रावण ३, २०७७ ०९:३३
पूरा पढ्नुहोस्
प्रतिक्रिया
पठाउनुहोस्
×