बेपत्ता युवक सत्र वर्षपछि घर फर्किए- गण्डकी - कान्तिपुर समाचार
कान्तिपुर वेबसाईट
AdvertisementAdvertisement

बेपत्ता युवक सत्र वर्षपछि घर फर्किए

प्रकाश बराल

बागलुङ — रोजगारीका लागि विदेश गएपछि बेपत्ता भएका भएका बागलुङका एक युवक १७ वर्षपछि घर पुगेका छन् । बागलुङ नगरपालिका–३ मूलपानीका ३५ वर्षीय नगेन्द्र पन्तलाई मानव सेवा आश्रमले घर लगिदिएको हो । 

सत्र वर्षपछि घर फर्किएका बागलुङ नगरपालकिा–३ मूलपानीका ३५ वर्षीय नगेन्द्र पन्त परिवारका साथ ।

रोजगारीका लागि २०६० सालमा कोरिया पुगेका पन्त एक वर्ष नपुग्दै परिवारसँग सम्पर्कविहीन भएका थिए । काठमाडौंको सडकमा अलपत्र भेटिएपछि उनलाई आश्रमले संरक्षणमा लिएको थियो ।

आश्रमको बागलुङ शाखामा ५ महिना बसेपछि उनले आफ्नो घर बागलुङकै मूलपानी रहेको बताए । त्यसपछि आश्रम सञ्चालक सुमीरा लामाले उनलाई घर लगिदिएकी हुन् ।

हराएको छोरो सत्र वर्षपछि फर्केर आउँदा परिवारमा खुसी छाएको छ । ‘हामीले आस मारिसकेका थियौं, कसरी आइपुग्यो, भगवान्ले ल्याए होला,’ आमा रूपाले भनिन्, ‘घरसम्म ल्याइदिने नै मेरा भगवान् हुन् ।’ उनी आएको देखेर छिमेकी र परिवारका सदस्य पनि आश्चर्यमा परेका छन् ।

पन्त उनी कोरियाबाट कसरी फर्किए र किन बेपत्ता भए भन्नेबारे अझै केही खुलाउन चाहँदैनन् । गत माघमा काठमाडौंको सडकमा अलपत्र भेटिएपछि उनलाई आश्रम सञ्चालकले ल्याएर राखेका थिए । ‘धेरै नबोल्ने, घर ठेगाना पनि नबताउने भएपछि आश्रममा राखेका थियौं,’ लामाले भनिन्, ‘इमानदार देखेर पारिश्रमिक दिई आश्रममै रोजगारी दिन खोज्दा मेरो घर यहीँ हो भनेर बताउनुभयो ।’

पन्त घर पुग्दा उनका पिताको केही वर्षअघि नै निधन भइसकेको थियो । उनका एक भाइ छन् । लामो समयपछि घर फर्केकाले पन्त अहिले बाबुको काजक्रियामा बसेका छन् ।

आश्रममै तमानखोला–२ बुंगादोभानका ५५ वर्षीय अर्का व्यक्ति पनि छन् । उनको परिवारका सदस्यसँग सम्पर्क भएपछि घर पठाउने तयारी भएको लामाले बताइन् ।

आश्रममा अहिले ६ बालबालिकासहित ४० जना आश्रित छन् । आश्रममा सडकमा अलपत्र भेटिएका, अपांग, असहायलाई राख्ने गरिएको छ । आश्रमका बालबालिकालाई विद्यालयमा भर्ना गरेर पढाउने व्यवस्था पनि गरिएको छ ।

प्रकाशित : श्रावण १, २०७७ १२:०२
प्रतिक्रिया
पठाउनुहोस्

बालुवाटारमा ओली, दाहाल र नेपालबीच छलफल सुरु

कान्तिपुर संवाददाता

काठमाडौँ — पार्टीभित्रको विवाद सुल्झाउने र भोलिको स्थायी कमिटी बैठक सुरु गर्ने विषयमा सहमति जुटाउन नेकपाका तीन शीर्ष नेता संवादमा जुटेका छन् । प्रधानमन्त्री एवं नेकपा अध्यक्ष केपी शर्मा ओली, अर्का अध्यक्ष पुष्पकमल दाहाल र वरिष्ठ नेता माधवकुमार नेपाल संवादमा छन् ।

छलफल प्रधानमन्त्रीको सरकार निवास बालुवाटारमा जारी छ । मंगलबार र बुधबार दुई अध्यक्ष ओली र दाहालबीच भएको छलफलमा विवाद समाधानमा ठोस सहमति नभएपछि बिहीबार नेपालसहितको त्रिपक्षीय संवाद सुरु भएको दाहालका प्रेस संयोजक विष्णु सापकोटाले बताए ।

एजेन्डा र प्रधानमन्त्रीको राजीनामाको विषयमा नेकपामा अहिले दाहाल र नेपाल एउटै समूहमा छन् । १० असारबाट जारी स्थायी कमिटी बैठकमा दाहाल र नेपालले ओलीले प्रधानमन्त्री र पार्टी अध्यक्ष दुवै पदबाट राजीनामा दिनुपर्ने माग राखेका छन् भने प्रधानमन्त्री ओलीले कुनै पनि पद नछाड्ने अडान दोहोराइरहेका छन् । बुधबार दाहालसँगको छलफलमा पनि प्रधानमन्त्री ओलीको यही अडान थियो । बरु उनले चाँडो महाधिवेशन गरेर पार्टीको नेतृत्व हस्तान्तरण गर्ने बताएका छन् ।

दुई अध्यक्षबीच बुधवारको छलफलमा केहीबेर महासचिव विष्णु पौडेल र स्थायी कमिटी सदस्य जनार्दन शर्मा पनि सहभागी थिए । गत साता पनि ओली र दाहालले लगातार तीन दिन छलफल गरेका थिए ।

पछिल्लो पटक दुई अध्यक्षबीच सहमति गर्न भन्दै साउन २ सम्मका लागि बैठक स्थगित भएको छ । लगातार बैठक स्थगित भएको तर शीर्ष तहमा सहमति जुटन नसकेकोमा स्थायी कमिटीका सदस्यहरु भने असन्तुष्ट छन् ।

प्रकाशित : श्रावण १, २०७७ १२:०२
पूरा पढ्नुहोस्
प्रतिक्रिया
पठाउनुहोस्
×