कान्तिपुर वेबसाईट
AdvertisementAdvertisement

पहिरोले सिद्धार्थ राजमार्ग अवरुद्ध

प्रतीक्षा काफ्ले

स्याङ्जा — सिद्धार्थ राजमार्गको विभिन्न स्थानमा गएको पहिरोले राजमार्ग अवरुद्ध भएको छ । पुतलीबजार १, ४ नम्बर वडा र हेलुमा गएको पहिरोले राजमार्ग अवरुद्ध भएको हो । तीनवटै स्थानमा डोजर लगाएर राजमार्ग खुलाउने काम भइरहेको जिल्ला प्रहरी प्रवक्ता डीएसपी राजेन्द्र अधिकारीले बताए । उनका अनुसार बिहानदेखि नै राजमार्ग अवरुद्ध छ ।

यसैगरी हरिनास गापा ४ चित्रेस्थित पहिरो जादाँ रुद्धबहादुर रानाको घर भत्काएको छ । घरको पूर्वपट्टीका दुईवटा कोठा र गोठ पूर्ण रुपमा भत्काएको छ । भैसी र पाडीलाई पहिरोले बगाएको छ भने मानवीय क्षति भने नभएको डीएसपी अधिकारीले बताए । यसैगरी अर्जुनचौपारीमा पनि पहिरोले केही घर क्षति पुर्‍याएको तर, पुरा विवरण आउन बाँकी रहेको उनले बताए ।

डीएसपी अधिकारीका अनुसार ४० जनालाई अन्यत्रै स्थानान्तरण गर्ने तयारी भइरहेको छ । ‘राजमार्गका यी घरमा क्षति भने भएको छैन । तर, आज पनि वर्षा भयो भने घरमा बस्न हुँदैन जोखिम छ । माथिबाट आएको पहिरोले घरमा बस्ने अवस्था पनि छैन,’ उनले भने ।

त्यस्तै अविरल वर्षाका कारण पहिरो जाँदा पुतलीबजार नगरपालिका–१ का बुद्धिबहादुर नेपाली घाइते भएका छन् । घर माथिबाट आएको पहिरोले उनी घाइते भएको डीएसपी अधिकारीले जानकारी दिए । भुपु सैनिक टोलस्थित गएको पहिरोको कारण यहाँका घर उच्च जोखिममा परेका छन् ।

प्रकाशित : असार २९, २०७७ ११:३८
प्रतिक्रिया
पठाउनुहोस्

'कोरोना जितेर घर फर्किएपछि पनि तनाव उत्तिकै'

कान्तिपुर संवाददाता

काठमाडौँ — ललितपुरको महालक्ष्मी नगरपालिका–८ लुभुकी ती युवती कोरोनामुक्त भएर काठमाडौंको बलम्बुस्थित सशस्त्र प्रहरी अस्पतालबाट एम्बुलेन्समा असार २५ गते अपराह्न ५ बजे घर आइपुगेकी थिइन् । नुहाएर खाजा खाइन् । परिवारका सदस्यहरू भेला भएर खुसियाली साटे । बेलुकाको खाना खाने बेला हुँदै थियो, दाइको मोबाइलमा प्रहरी र पाटन अस्पतालबाट फोन आयो । त्यसले उनीहरूको ओठतालु सुकायो । दुई घरमा रहेका ९ जनामा कोरोना संक्रमण भएको खबर प्रहरी र अस्पतालले सुनाएका थिए ।

महालक्ष्मी क्याम्पस नजिकै दाजुभाइका दुई घर सँगै जोडिएका छन् । अघिल्लो दिन २४ गते ती युवतीकी काकी र लुभुकै क्लिनिकका एक चिकित्सकलाई संक्रमण पुष्टि भएको थियो । सँगै स्वाब दिएका युवतीका आमा–बुबालगायत परिवारको रिपोर्टबारे सोधखोज गर्दा सबैको नेगेटिभ रहेको भनिएको थियो ।

९ जनामा एकैपटक संक्रमण पुष्टि भएको खबर आएको दिन उनीहरूलाई आइसोलेसनमा लगिएन । भोलिपल्ट दिउँसो १२ बजेतिर मात्रै उनीहरूलाई लिन एम्बुलेन्स आइपुग्यो । उनीहरू अहिले कीर्तिपुरस्थित आयुर्वेद अस्पतालको आइसोलेसनमा छन् । कोरोनामुक्त भएकी ती युवती भने तनावमै छिन् । ‘मेरो कारणले सबैलाई सर्‍यो भनेर आफन्तले समेत अनेकखाले म्यासेज पठाउँछन्,’ उनले भनिन्, ‘के मैले सारूँ भनेर सारेको हो र ? मेरो बोलचाल र भेटसमेत नहुने काकाको घरमा बस्नेलाई पनि पोजिटिभ देखिएको छ । उहाँहरूलाई कसले सार्‍यो ?’

प्रकाशित : असार २९, २०७७ ११:२९
पूरा पढ्नुहोस्
प्रतिक्रिया
पठाउनुहोस्
×