कान्तिपुर वेबसाईट
AdvertisementAdvertisement

घरायसी विवादमा एकको हत्या

लालप्रसाद शर्मा

पोखरा — कास्कीको मादी गाउँपालिका–४ घामनुङका ५५ वर्षीय नवराज सापकोटाले काका नाता पर्ने ७९ वर्षीय पीताम्बर सापकोटाको हत्या गरेका छन् । घरायसी विवादमा नवराजले खुकुरी प्रहार गर्दा पीताम्बरको घटनास्थलमै मृत्यु भएको हो । 

शनिबार साँझ घरमा खाना खाइरहेका बेला पीताम्बरमाथि आक्रमण भएको वडाध्यक्ष सत्यराज सापकोटाले बताए । उनका अनुसार सडक खन्ने विषयमा यसअघि सामान्य विवाद रहँदै आएको थियो । शनिबार नवराजकी छोरीले पीताम्बरको खरबारीमा गाई चराएको विषयमा भनाभन भएको थियो । पछि मादक पदार्थ सेवन गरी नवराजले पीताम्बरमाथि अन्धाधुन्ध खुकुरी प्रहार गरेको वडाध्यक्ष सापकोटाले बताए ।

पीताम्बरको परिवारले हारगुहार गरेपछि घटनास्थल पुगेका साबिक थुमकोडाँडा गाविसका पूर्वउपाध्यक्ष ७५ वर्षीय केशवराज सापकोटामाथि पनि आक्रमण गरेका छन् । टाउकोमा तीनपटक खुकुरी हानिएका केशवराजको अहिले मणिपाल शिक्षण अस्पतालमा उपचार भइरहेको वडाध्यक्ष सापकोटाले बताए ।

यसैबीच हत्या आरोपी नवराजलाई भाग्दै गरेको अवस्थामा प्रहरीले आइतबार बिहान ५ बजे पोखरा–१३ कसेरीबाट नियन्त्रणमा लिएको छ । उनीविरुद्ध किटानी जाहेरी दिइएको वडाध्यक्ष सापकोटाले बताए । कास्की प्रहरीका प्रवक्ता डीएसपी सुवास हमालले घटना भएको स्विकारे पनि सबै विवरण भने दिएनन् ।

प्रकाशित : असार २८, २०७७ १२:५२
प्रतिक्रिया
पठाउनुहोस्

इन्धनकाे मूल्य बढाइएकाेमा नेविसंघको प्रदर्शन

कान्तिपुर संवाददाता

काठमाडौँ — सरकारले इन्धनमा मूल्यवृद्धि गरेको भन्दै नेविसंघका कार्यकर्ताहरुले काठमाडौंको बबरमहलमा आइतबार प्रदर्शन गरेका छन् ।

बबरमहलको सडकमा झन्डा र ब्यानरसहित कालोपट्टि बाँधेर उपस्थित प्रदर्शनकारीले ‘नाफा घाटा जान्दैनौं मूल्यवृद्धि मान्दैनौं’ भन्दै नारा लगाएका थिए ।

उनीहरुले संकटका बेलामा पनि पेट्रोलियम पदार्थको मूल्य बढाएको भन्दै फिर्ता गर्नुपर्ने माग गर्दै सडकमा आएको बताएका छन् । प्रदर्शनमा नेविसंघका अध्यक्ष लगायत सहभागी थिए ।

अन्तर्राष्ट्रिय बजारमा इन्धनको मूल्य बढेको जनाउँदै नेपाल आयल निगमले शुक्रबार राति १२ बजेदेखि लागू हुनेगरी पेट्रोल, डिजेल र मट्टितेलमा प्रतिलिटर १/१ रुपैयाँको दरले बढाएको थियो । नयाँ मूल्य लागू भएपछि प्रतिलिटर पेट्रोल १ सय २ रुपैयाँ, डिजेल ८८ रुपैयाँ र मट्टितेल ८८ रुपैयाँ कायम भएकाे छ ।

प्रकाशित : असार २८, २०७७ १२:५०
पूरा पढ्नुहोस्
प्रतिक्रिया
पठाउनुहोस्
×