गण्डकीमा कोरोना संक्रमितको संख्या ११ सय १३ पुग्याे

मनाङ र मुस्ताङका कोरोना संक्रमित निको भए
कान्तिपुर संवाददाता

पोखरा — गण्डकी प्रदेशभरि कोरोना संक्रमितको संख्या १ हजार १ सय १३ पुगेको छ  । सोमबार दिउँसो लमजुङ, बागलुङ र कास्कीमा गरी १७ नयाँ संक्रमित थपिएसँगै यो संख्या पुगेको हो ।


गण्डकी प्रदेश स्वास्थ्य निर्देशनालयका अनुसार सोमबार लमजुङमा ११, बागलुङमा ५ र कास्कीमा एकजना संक्रमित थपिएका हुन् । संक्रमित सबैलाई सम्बन्धित जिल्लाका आइसोलेसनमा लैजाने तयारी भइरहेको स्वास्थ्य निर्देशक एवं प्रदेश कोरोना नियन्त्रण तथा रोकथाम कार्यक्रमका प्रवक्ता डा.विनोदबिन्दु शर्माले बताए ।

प्रदेशका मनाङ र मुस्ताङमा एक/एकजनामा कोरोना संक्रमण देखिएकोमा दुवैजना निको भएका छन् । यसैगरी पूर्वी नवलपरासीमा २ सय ५७ बागलुङमा २ सय ८ कोरोना संक्रमित पुगेका छन् । यसैग्री स्याङ्जामा १ सय ८५, गोरखामा ९३, तनहुँमा १ सय ३९, लमजुङमा ५७ र कास्कीमा ६३ जना संक्रमित भएका छन् । पर्वतमा ९० र म्याग्दीमा १९ संक्रमित भेटिएका छन् । संक्रमितमध्ये २ सय ९७ जना निको भइसकेका छन् । अझै १ सय ९१ जनाको पीसीआर नतिजा आउन बाँकी छ ।

गण्डकी प्रदेशभर कोरोनाका कारण स्याङ्जाका २, गोरखा र बागलुङका १/१ गरी ४ जनाको मृत्यु भएको छ ।

प्रकाशित : असार २२, २०७७ १४:२०
प्रतिक्रिया
पठाउनुहोस्

वाग्मती प्रदेशद्वारा एकवर्षमा १७९ किलोमिटर सडक कालोपत्र

सुवास विडारी

मकवानपुर — वाग्मती प्रदेश सरकारले चालु आर्थिक वर्षमा १ सय ७९ किलोमिटर सडक कालोपत्र गरेको छ । प्रदेशका मुख्यमन्त्री डोरमणि पौडेलले १ सय ७९ किमी सडक कालोपत्र र स्ल्याब ढलान गरेको संसदलाई जानकारी गराएका छन् । 

प्रदेशसभामा उठेको प्रश्नको जवाफ दिँदै मुख्यमन्त्री पौडेलले प्रदेशका १३ जिल्लामा भएका कालोपत्रे र २४ किलोमिटर स्ल्याब ढलान सम्बन्धी सम्पूर्ण कामहरुको जानकारी गराएका थिए । उनले प्रदेश सरकारले ३३ वटा पक्की पुल निर्माण गरेको बताए ।

८ सय ७ किलो मिटर नयाँ सडक निर्माण भएको र तीनसय २० किलोमिटर सडकमा ग्राभेल गरिएको मुख्यमन्त्री पौडेलले बताए । सडक विकासतर्फको कुल बजेट १५ अर्ब ५० करोड २३ लाख मध्ये प्रदेश सरकारले सडक र पुल निर्माणमा ६ अर्ब ८८ करोड ५६ करोड खर्च गरेको प्रदेशको भौतिक पूर्वाधार विकास मन्त्रालयले जानकारी दिएको छ ।

प्रदेश सरकारले स्थानीय तहको केन्द्रसँग सडक सञ्‍जाल जोड्न प्रदेश चक्रपथ निर्माण आगामी आर्थिक वर्षबाट गर्ने भएको छ । मुख्यमन्त्री पौडेलले अहिलेससम्म सडक नपुगेको प्रदेशको विकट गाउँपालिका मध्ये धादिङको रुविभ्याली गाउँपालिका र काभ्रेको महाभारत गाउँपालिकाको केन्द्र जोड्न सडक निर्माण कार्य अगाडि बढाइएको बताएका छन् । प्रदेश सरकारले अन्य १४ वटा पालिकाको केन्द्रहरुमा बाह्रै महिना निर्वाध रुपमा सवारी साधनहरु सञ्चालनका लागि कालोपत्रे गर्न लागिएको जनाएका छन् ।

प्रदेशको मुकाम हेटौंडा र केन्द्रीय राजधानी काठमाडौंलाई जोड्न प्राथमिकताका साथ प्रदेश सरकारले पोष्टबहादुर बोगटी भीमफेदी–कुलेखानी सुरुङमार्गको निर्माण गर्ने पौडेलले जानकारी दिएका छन् । सुरुङमार्ग निर्माणपश्चात् इन्धन, मोटर पार्टस लगायतमा खर्च हुने अर्बौं रुपैयाँ बचत गराउने उनको भनाइ छ । भारतबाट हाल अमलेखगञ्जसम्म आएको पेट्रोलियम पाइपलाइनलाई काठमाडौंसम्म पुर्‍याउने योजना सुरुङमार्ग निर्माणसँगै जोडेर अगाडि बढाइने मुख्यमन्त्री पौडेलले जानकारी दिएका छन् ।

प्रस्तावित भीमफेदी–कुलेखानी सुरुङमार्ग संघीय सरकारसँग सहकार्यमा निर्माण गरिने पौडेलले बताए । सुरुङमार्ग निर्माणको लागि प्रदेश सरकारले १ अर्ब रुपैयाँ बजेट छुट्याएको छ । १८ अर्ब लागानीमा बन्ने सुरुङमार्ग ४ वर्षभित्र सम्पन्न गरिसक्ने लक्ष्य प्रदेश सरकारको छ ।

सुरुङमार्ग निर्माणका लागि प्रदेश सरकारले ग्लोबल टेण्डर गर्ने तयारी गरिरहेको प्रदेशको भौतिक पूर्वाधार विकास मन्त्रालयले जनाएको छ । केन्द्र सरकारले सहकार्यका लागि अन्मित निर्णय नगर्दा अहिले टेन्डर आह्वानको काम अलपत्र परिरहेको छ ।

प्रकाशित : असार २२, २०७७ १४:१७
पूरा पढ्नुहोस्
प्रतिक्रिया
पठाउनुहोस्
×