घरमा पहिरो खस्दा स्याङ्जामा एकको मृत्यु 

प्रतीक्षा काफ्ले

स्याङ्जा — अविरल वर्षाका कारण गल्याङ नगरपालिका–९ साङलियमा शनिबार राति खसेको पहिरोको कारण एक जनाको मृत्यु भएको छ । मृत्यु हुनेमा ४९ वर्षीय यमबहादुर विक रहेका छन् । राति सुतिरहेको बेला एक्कासी घरको पछाडिको गाह्रो खस्दा विक दम्पती घाइते भएका थिए । घटना लगत्तै स्थानीयले उपचारको लागि गल्याङ सामुदायिक अस्पताल ल्याएका थिए । 

उपचारको क्रममा यमबहादुरलाई ४ बजेर २० मिनेटमा डाक्टरले मृत्त घोषणा गरेको जिल्ला प्रहरी प्रमुख एसपी विमलराज कँडेलले जनाए । एसपी कँडेलका अनुसार घटना राति ३ बजेको हो । विककी श्रीमती फुलमायाको पनि अवस्था गम्भीर रहेको प्रहरीले बताएको छ । टाउकोमा बढी चोट लागेको हुदाँ थप उपचारको लागि मिसन अस्पताल पाल्पा रिफर गरिएको कँडेलले बताए ।

घरमा दुई छोराछोरीसहित ४ जना थिए । प्रहरीका अनुसार छोराछोरीको अवस्था भने सामान्य छ । विकको शव अस्पतालमा नै राखिएको छ । घटनास्थलमा प्रहरी गएको हुदाँ थप विवरण आउन बाँकी रहेको एसपी कँडेलले बताए ।

प्रकाशित : असार १४, २०७७ ११:१४
प्रतिक्रिया
पठाउनुहोस्

तनहुँका एक वर्षीय बालक कोरोनामुक्त 

सम्झना रसाइली

तनहुँ — तनहुँको रिसिङ गाउँपालिकाका एक वर्षीय बालक कोरोनामुक्त भएका छन् । अभिभावकसँगै भारतबाट आएर क्वारेन्टाइनमा बस्दै आएका बालकमा गत असार ८ गते कोरोना संक्रमण देखिएको थियो ।

बालकसँगै रहेकी आमाको पीसीआर रिपोर्ट नेगेटिभ आए पनि बाललको रिपोर्ट पोजिटिभ आएको थियो । शुक्लागण्डकी नगरपालिकास्थित जीपी कोइराला राष्ट्रिय श्वासप्रश्वास उपचार केन्द्रको आइसोलेसनमा बस्दै आएका बालकको शनिबार दोस्रो पीसीआर रिपोर्टमा नेगेटिभ आएको केन्द्रका कोभिड–१९ फोकल प्रर्सन प्रदिप पौडेलले बताए ।

उनले भने, ‘असार ११ गते एक वर्षीय बालकसँगै थ्रोट स्वाब संकलन गरी पीसीआर परीक्षणका लागि पठाइएका अन्य ५ जनाको रिपोर्ट पनि नेगेटिभ आएको छ ।’ कोरोनामुक्त हुनेमा शुक्लागण्डकी नगरपालिकाका २२ वर्षीय, घिरिङ गाउँपालिकाका २६ वर्षीय र रिसिङ गाउँपालिकाका २८ र २० वर्षीय पुरुष तथा २५ वर्षीया महिला रहेको केन्द्रले जनाएको छ ।

योसँगै जिल्लामा कोरोनामुक्त हुनेको संख्य १७ जना पुगेको छ भने कोरोना संक्रमितको संख्या १०२ जना रहेको जिल्ला स्वास्थ्य कार्यालयले जनाएको छ । हालसम्म जिल्लाबाट १ हजार ६१७ जनाको थ्रोट स्वाब नमुना संकलन गरी पीसीआर परीक्षणका लागि पठाइएकोमा ४५५ जनाको रिपोर्ट आउन बाँकी रहेको कार्यालयले जनाएको छ ।

प्रकाशित : असार १४, २०७७ १०:४६
पूरा पढ्नुहोस्
प्रतिक्रिया
पठाउनुहोस्
×