संक्रमित स्वास्थ्यकर्मीहरुलाई व्यवस्थित बसोबासको मागसहित पर्वत प्रशासन घेराउ- गण्डकी - कान्तिपुर समाचार

संक्रमित स्वास्थ्यकर्मीहरुलाई व्यवस्थित बसोबासको मागसहित पर्वत प्रशासन घेराउ

अगन्धर तिवारी

पर्वत — कोरोना संक्रमित स्वास्थ्यकर्मीहरुलाई सुरक्षित बस्ने ठाउँ नभएको भन्दै पर्वत अस्पतालमा कार्यरत स्वास्थ्यकर्मीहरुले पर्वत प्रशासन घेराउ गरेका छन् ।

शनिबार साँझ ६ बजेतिर कोरोना रोकथाम जिल्लास्तरीय कमान्ड फोर्सको बैठक बसिरहेका बेला करिब दुई दर्जन स्वास्थ्यकर्मीहरुले प्रशासन घेराउ गरेका हुन् । उनीहरु कोरोना संक्रमण पुष्टि भएको दुई दिनसम्म पनि प्रशासनले बसोबासको व्यवस्था मिलाउन नसकेको भन्दै असन्तुष्ट बनेका छन् । तुरुन्तै व्यवस्थित बसोबाससहित उपचारको ग्यारेन्टी हुनुपर्ने उनीहरुको माग छ । स्वास्थ्यकर्मीहरुले बाँकी ८१ जनाको रिपोर्ट पोजिटिभ आए स्थिति अझै चुनौतीपूर्ण हुने भन्दै सचेतसमेत गराएका छन् ।

संक्रमित स्वास्थ्यकर्मीहरु दुई दिनसम्म सुत्न र खानसमेत नपाएको गुनासो गरेका छन् । ‘दुई जना एउटा सरकारी कार्यालयको कोठामा हुनुहुन्छ,’ एक स्वास्थ्यकर्मीले भने, ‘अरु दुई जना अस्पतालकै सुत्केरी वार्डमा । अस्पतालमा भएकाहरुले खानसमेत पाएका छैनन् ।’

संक्रमित स्वास्थ्यकर्मीहरुले यस्तो समयमा आफूहरुको मनोबल बढाउनुको सट्टा प्रशासनले हेलचेक्र्याइँ गरेको आरोप लगाए । ‘अहिलेसम्म हामीलाई कुनै रेपोन्स छैन,’ एक स्वास्थ्यकर्मीले भने, ‘हाम्रो समस्या न अस्पतालले बुझ्यो न प्रशासनले ।’ संकलित नमुनाको रिपोर्ट आएपछि मात्रै काममा फर्किने अडान लिएका उनीहरुलाई अस्पताल प्रशासनले दबाब दिएर काममा लगाएको समेत पाइएको छ । ‘रिपोर्ट आउन दुई साता पनि लाग्न सक्छ । प्रशासनले भनेपछि काममा फर्किनुपर्छ’भन्दै दबाब दिएर अस्पताल प्रशासनले संक्रमितहरुलाई ३ दिनसम्म काममा लगाएको थियो ।

बिहीबार राति कोरोना पोजिटिभ देखिएका दुई चिकित्सकसहित ५ जना स्वास्थ्यकर्मी शनिबार साँझसम्म अस्पताल र आसपासमै थिए । कोरोना रोकथाम जिल्लास्तरीय कमान्ड फोर्सले संक्रमित स्वास्थ्यकर्मीको व्यवस्थापनमा लापरबाही गरेको भन्दै अस्पतालमा कार्यरत स्वास्थ्यकर्मीहरुले शनिबार दिउँसो सामूहिक अपिल लेख्दै दु:ख व्यक्त गरेका छन् ।

कोरोना रोकथाम जिल्लास्तरीय कमान्ड फोर्सका संयोजक एवं प्रमुख जिल्ला अधिकारी शम्भुप्रसाद रेग्मीले व्यवस्थापन गरिएको स्थानबाट स्वास्थ्यकर्मीहरु फर्किएको आरोप लगाए । ‘ब्लु एञ्जलमा निर्णय भएर उहाँहरु जानुभएको हो,’ प्रजिअ रेग्मीले भने, ‘केहीबेर बसेपछि फोहोर भयो भनेर फर्किनुभएको हो । अब सरसफाई गरेर नयाँ कपडा फेरेर त्यहीं पठाउँछौं ।’

प्रकाशित : असार ६, २०७७ २१:०६
प्रतिक्रिया
पठाउनुहोस्

कुवेतबाट फर्केका थप ८ महिलामा संक्रमण

लीला श्रेष्ठ

भक्तपुर — कुवेतबाट फर्केका थप ८ महिलामा कोभिड–१९ संक्रमण पुष्टि भएको छ । जेठ ३० मा फर्किएका उनीहरु भक्तपुरको चाँगुनारायण नगरपालिका–७ खरिपाटीस्थित विद्युत् प्राधिकरण तालिम केन्द्र क्‍वारेन्टाइनमा छन् ।

क्‍वारेन्टाइनमा रहेकी एक महिलामा बुधबार कोरोना संक्रमण पुष्टि भएपछि अन्य १ सय २ जनाको पीसीआर परीक्षण गरिएको थियो ।

वीरदल गण सूर्यविनायकका प्रमुख सेनानी शिवप्रसाद पौडेलका अनुसार शनिबार कोरोना संक्रमण पुष्टि हुनेहरुमा मोरङ रतुवामाईकी ४२ र पथरीकी ४१ वर्षीया, कास्की घान्द्रुककी २३ वर्षीया, नवलपरासी देवचुलीकी २३ र कावासोतीकी २९ वर्षीया, झापा हल्दिबारीकी ३७ वर्षीया, सुर्खेत छिन्चुकी २८ र बाराकी २८ वर्षीया महिला छन् । जसमध्ये, ७ जनालाई पाटन अस्पताल र एक जनालाई शुक्रराज ट्रपिकल तथा सरुवा रोग अस्पताल टेकुमा पठाइएको पौडेलले बताए । उनका अनुसार कोरोना संक्रमित सबैको स्वास्थ्य अवस्था सामान्य छ ।

कुवेतबाट आएका ९ बालबालिकासहित १ सय ५० मध्ये २ जना शंकास्पद देखिएको भन्दै उनीहरुलाई सम्बन्धित जिल्ला नपठाई खरिपाटी क्‍वारेन्टाइनमा राखिएको हो । शंकास्पद देखिएकाको सोही दिन ‘नेजल स्वाब’ को नमुना संकलन गरेर शुक्रराज ट्रपिकल तथा सरुवा रोग अस्पताल टेकुमा भर्ना गरिएको थियो । जसमध्ये एक महिलामा संक्रमण पुष्टि भएको थियो । कन्ट्याक ट्रेसिङ गरेर पीसीआर परीक्षण गराउँदा बुधबार नवलपरासी गैंडाकोटकी २२ वर्षीया महिलामा संक्रमण देखिएको थियो ।

उनीहरु जजिरा एयरलाइन्सको जे–९ १५४१ नम्बरको उडानमार्फत नेपाल आइपुगेका हुन्, जसमध्ये प्रदेश नम्बर १, २, ५, गण्डकी र कर्णाली प्रदेशका १ सय ३ जनालाई खरिपाटी क्‍वारेन्टाइनमा राखिएको थियो । वाग्मती प्रदेशका व्यक्तिलाई भने ललितपुर जावलाखेलस्थित स्टाफ कलेज क्‍वारेन्टाइनमा राखिएको छ । गैरकानुनी रूपमा कुवेत बसेर आममाफी पाएका नेपाली महिला कामदारलाई कुवेत सरकारले पठाएको हो ।

यस्तै, यूएईबाट जेठ २३ मा आएर खरिपाटी क्‍वारेन्टाइनमा बसेका १० जनाको शनिबार पुन: ‘नेजल स्वाब’को नमुना संकलन गरिएको छ । यूएईबाट आएका एक महिला र पुरुषमा संक्रमण पुष्टि भएको थियो । अन्यको पुन: पीसीआर परीक्षण गर्न लागिएको वीरदल गणका प्रमुख सेनानी पौडेलले बताए । यूएईबाट जेठ २३ मा एयर अरेबियाको जी–९ १७५१ चार्टर फ्लाइटबाट आएकी सिन्धुली दुधौली–९ की ३० वर्षीया महिला र मोरङ उर्लाबारीका २९ वर्षीय पुरुषमा बुधबार संक्रमण पुष्टि भएको थियो । सोही दिन जापानबाट आएर खरिपाटी क्‍वारेन्टाइनमा बसेका ४ जनाको पीसीआर रिपोर्ट नेगेटिभ आएपछि शनिबार उनीहरुलाई घर पठाइएको छ ।

प्रकाशित : असार ६, २०७७ २०:२७
पूरा पढ्नुहोस्
प्रतिक्रिया
पठाउनुहोस्
×