लकडाउनमै बने ९ वटा मोटरेबल पुल - गण्डकी - कान्तिपुर समाचार
कान्तिपुर वेबसाईट
AdvertisementAdvertisement

लकडाउनमै बने ९ वटा मोटरेबल पुल 

प्रतीक्षा काफ्ले

स्याङ्जा — स्याङ्जाको भीरकोट नगरस्थित लुव्दीखोला मोटरेबल पुल ६ महिनामै सम्पन्न भएको छ । पूर्वाधार विकास कार्यालय पोखराबाट सञ्चालित उक्त योजना २०७६ असोज २९ मा सम्झौता भई मंसिरबाट निर्माण सुरु गरिएको थियो ।  यही वैशाखमा पुल निर्माण सम्पन्न भएको हो ।

साढे दुई महिनादेखि मुलुक लकडाउनमा रहे पनि पूर्वाधार कार्यालय पोखराका योजना भने धमाधम सञ्चालन भएका छन् । सामाजिक दूरी कायम गर्दै मजुदर निर्माण कार्यमा जुटेका छन् । लकडाउनकै अवधिमा यही आवभित्र निर्माण सक्नुपर्ने ९ पुल बनेका छन् । त्यसमा स्याङजाका मात्रै ६ वटा छन् ।

यसैगरी, स्याङ्जाकै विरुवा–१ र ४ वडा जोड्ने अम्बोट मोटरेबल पुल पनि हालै निर्माण भएको छ । कार्यालयका इन्जिनियर सुमन गिरीका अनुसार वालिङस्थित अर्मादीखोला पुल, आँधीखोलास्थित नाँगडाँडा–कार्कीनेटा सडकखण्डअन्तर्गत पर्ने बाँस्कोटखोला, पुतलीबजारस्थित घुम्ती–चिसापानी सडकको भुवानेखोला, फेदीखोलाको स्थानेचौर मोटरेबल पुल पनि सम्पन्न भएको छ ।

स्याङ्जाको विरुवा गाउँपालिका अम्बोटमा बनेको मोटरेबल पुल तस्बिर : प्रतीक्षा काफ्ले/कान्तिपुर ।

यसैगरी पोखरा महानगरस्थित भलामखोला मोटरेबल पुल, पोखराकै फुस्रेखोला चिसापानी, कास्कीको मादी गाउँपालिकास्थित मादी नदीमाथिको ज्याम्दु मोटरेबल पुलको पनि निर्माण सम्पन्न भएको छ । यो पुल निर्माणाधीन अवस्थामा गत वर्ष बगेको थियो । एकै आर्थिक वर्षमा एउटै जिल्लामा ६सहित ९ पुल सम्पन्न भएकोलाई इन्जिनियर गिरी ठूलो उपलब्धि मान्छन् ।

जिल्ला प्रशासन, प्रदेश र स्थानीय सरकार, जिल्ला समन्वय समितिबीच समन्वय गरी विकास निर्माणका योजना लकडाउनको समयमा पनि सम्पन्न गर्न सफल भएको उनको भनाइ छ । ‘लकडाउन भनेर पुलको काम थाँती राखेको भए के हुन्थ्यो हुन्थ्यो,’ उनले भने, ‘त्यही भएर काम सम्पन्न गरियो । निर्माण व्यवसायी, प्राविधिक र उपभोक्ता जिम्मेवार बन्दा लकडाउनमा पनि निर्माण सम्पन्न गर्न सफल भयौं ।’

प्रकाशित : जेष्ठ २९, २०७७ ११:०७
प्रतिक्रिया
पठाउनुहोस्

काठमाडौं महानगरपालिकाका विद्यार्थीलाई रेडियोबाट पढाइँदै

कान्तिपुर संवाददाता

काठमाडौँ — काठमाडौं महानगरपालिकाले मेट्रो एफएम ९४ विन्दु ६ मेगाहर्जमार्फत रेडियो शिक्षा कार्यक्रम सुरु गरेको छ । बन्दाबन्दीका बेला पनि वैकल्पिक माध्ययमबाट पठन–पाठन गराई सामुदायिक विद्यालयलाई प्रतिस्पर्धी बनाउने उद्धेश्यले महानगरपालिकाले आधारभूतदेखि कक्षा १० सम्मको रेडियो शिक्षा सुरु गरेको जनाएको छ ।

रेडियो शिक्षाका लागि कक्षा १ देखि ३ सम्मका लागि २५ मिनेट र कक्षा ४ देखि १० सम्मका लागि ३० मिनेटको समय उपलब्ध गराइएको महानगरपालिकाले जनाएको छ । कक्षा बिहान ९ बजेदेखि बेलुका ५:३० सम्म हुने महानगरको शिक्षा विभागका शाखा अधिकृत मोतिप्रसाद भट्टराइले बताए । रेडियो शिक्षा कार्यक्रममा नेपाली, अंग्रेजी, विज्ञान, सामाजिक, स्वास्थ्य जनसंख्या र वातावण, पेशा व्यवसाय र प्रविधि विषय समावेश छन् । त्यस्तै कक्षा १ को एकीकृत पाठ््यक्रम अनुसारका नेपाली, अंग्रेजी र मेरो सेरोफेरो विषय पनि समावेश हुने उनले बताए ।

महानगरका शिक्षा विभागका अनुसार रेडियो शिक्षा कार्यक्रमलाई विस्तार र स्तरोन्नति गर्दै अनलाइनमा आधारित प्रयोगात्मक र प्रदर्शनात्मक कक्षा चलाइनेछ । त्यस्तै कार्यक्रमको मूल्याङ्कन र प्रभावकारिता बिश्लेषणका लागि प्रविधिमा आधारित प्रणाली विकास गरिनेछ । अहिलेको कार्यक्रम शैक्षिक सत्र २०७७ को अन्तिम नतिजासमेत प्रकाशन गर्ने लक्ष्यसहित सुरु गरिएको विभागको भनाइ छ ।

रेडियो शिक्षा कार्यक्रम सञ्चालन विद्यालयका शिक्षकहरुले गर्नेछ भने रेडियोकर्मीहरुले सहजीकरणको काम गर्नेछ । दैनिक कक्षा शिक्षक व्यवस्थापन गर्ने, विषय तालिका मिलाउने, दैनिक पाठ योजना स्वीकृत गर्नका लागि २ तह बनाएर जिम्मेवारी दिइएको छ । जसमा कक्षा १ देखि कक्षा ६ सम्मको संयोजन सरस्वती निकेतन माविका प्रधानाध्यापक रविना महर्जनले र कक्षा ७ देखि १० सम्मको संयोजन विश्व निकेतन माविका प्रधानाध्यापक हेरम्बराज कँडेललाई जिम्मा दिइएको छ ।

महानगरपालिकाका मेयर एवं शिक्षा समितिका अध्यक्ष विद्यासुन्दर शाक्यले बुधबार राष्ट्रिय सभा गृहमा रहेको मेट्रो एफएममार्फत् रेडियो शिक्षा कार्यक्रमको शुभारम्भ गरेका हुन् । ‘मुलुकमा जारी लकडाउनका कारण नियमित पठन–पाठन गराउन सम्भव नहुने भएका कारण घरमै बसिरहेका विद्यार्थी भाइ–बहिनीलाई वैकल्पिक शिक्षा प्रदान गर्ने उद्धेश्यले आधारभूतदेखि कक्षा १० सम्मको रेडियो शिक्षा सुरु गरेको हो,’ उनले भने, ‘यसले सामान्य जीवनप्रति उत्साहित गराउन र शैक्षिक गतिविधिलाई निरन्तरता दिन पनि सहयोग पुग्ने अपेक्षा लिएका छौँ ।’

रेडियो शिक्षामार्फत महानगरभित्रका ९१ वटा सामुदायिक विद्यालय, ३ वटा विशेष विद्यालय र ६ सय ४३ वटा संस्थागत विद्यालयलमा अध्ययनरत विद्यार्थीेहरु प्रत्यक्ष तथा अप्रत्यक्ष रुपमा लाभान्वित हुने महानगरले जनाएको छ ।

प्रकाशित : जेष्ठ २९, २०७७ १०:५२
पूरा पढ्नुहोस्
प्रतिक्रिया
पठाउनुहोस्
×