जसलाई लकडाउनले छोएन

पर्वतको फलेबास नगरपालिकाका केही महिला अहिले झन् व्यस्त छन् । गार्मेन्ट उद्योग चलाएका उनीहरूलाई मागअनुसार कपडा उत्पादन गर्नै भ्याइनभ्याइ छ ।
अगन्धर तिवारी

पर्वत — फलेबास नगरपालिका–६ देवीस्थानका केही महिला लकडाउनमा अझ व्यस्त छन् । लकडाउनको दुई महिना कट्दा उनीहरू सामान्य बेलामा भन्दा बढी सक्रिय देखिन्छन् ।


सृजना बराइलीको अगुवाइमा २ वर्षअघि सुरु गरिएको देवीस्थान सामूहिक महिला उद्योगका आधा दर्जन महिलालाई बिहानदेखि साँझसम्मै फुर्सद छैन । महिला र बालबालिकाका कपडा उत्पादन गरिने सामुदायिक गार्मेन्ट उद्योगमा लकडाउनकै कारण कामको चाप बढेको हो । यहाँ उत्पादित मेक्सी, गाउन, अलादिन, कुर्तासुरुवाललगायत कपडाको सदरमुकाम कुस्मा बजारसम्मै माग छ । सामान्य अवस्थामा व्यापारीहरू काठमाडौं र भैरहवासम्म पुगेर यस्ता कपडा खरिद गर्थे । ‘पहिला यहीँ आसपासका पसलबाट मात्रै माग आउँथ्यो,’ उद्योगकी अध्यक्ष बराइलीले भनिन्, ‘अहिले अन्यत्रका व्यवसायीबाट धेरै अर्डर आउन थालेको छ ।’

बराइलीसहित नीलम श्रेष्ठ, कविता श्रेष्ठ, निरमा श्रेष्ठ, रीता भुसाल, निर्मला भुसालले सामूहिक रूपमा उद्योग दर्ता गरेका हुन् । घरको काम गरेर बचेको समय सदुपयोग गर्न थालेको व्यवसायलाई लकडाउनले मुख्य पेसा बनाइदिएकोमा उनीहरू दंग छन् । ‘टाइम पास गर्न यो उद्योग सुरु गरेका थियौं,’ नीलमले भनिन्, ‘अब व्यवसायी नै भइएलाजस्तो छ ।’ उद्योगमा चार महिलाले नियमित र अरू केहीले आंशिक रूपमा काम गर्दै आएका छन् ।

यहाँ उत्पादित कपडा फेन्सी व्यवसायीलाई थोक मूल्यमा बिक्री गरिँदै आएको छ । गाउँको बीचमा भएकाले कतिपयले एक–दुई थान पनि माग गर्छन् । ‘थोक र खुद्रा बेच्दा मूल्य फरक–फरक हुन्छ,’ बराइलीले भनिन्, ‘एउटै मूल्य कायम गर्दा सबै उपभोक्ता यहीँ आउँछन् । व्यवसायीलाई मार पर्छ ।’

हालसम्म करिब ८ लाख लगानी पुगेको उद्योगलाई थप बिस्तार गरी रोजगारी र व्यवसाय बढाउने सोचमा महिलाहरू छन् । उनीहरूका अनुसार अहिले मासिक करिब डेढ लाख रुपैयाँ बराबरको कपडा उत्पादन हुन्छ । ‘हामी बिहानदेखि साँझसम्मै व्यस्त छौं,’ उद्यमी रीताले भनिन्, ‘लकडाउनको कुनै असर छैन ।’ यो गार्मेन्टमा उत्पादित कपडाका लागि कच्चा पदार्थ चिनियाँ बजारबाट किलोमा जोखेर ल्याउने गरिएको छ ।

उद्योगमा अहिले इन्टरलकसहित ६ वटा सिलाइ मेसिन छन् । मेसिनलगायत उद्योग दर्ता र सञ्चालनमा फलेबास नगरपालिकाले सहयोग गरेको छ । नगरप्रमुख पदमपाणि शर्माका अनुसार एक वडा एक लघु उद्योग कार्यक्रमअन्तर्गत उद्यमी महिलालाई सहयोग गरिएको हो । हरेक वडामा उद्यमी तयार गर्न गत वर्षदेखि नगरपालिकाले सुरु गरेको कार्यक्रमअन्तर्गत यो नमुना काम भएको उनले बताए ।


प्रकाशित : जेष्ठ २२, २०७७ ११:२९
प्रतिक्रिया
पठाउनुहोस्

व्यवसायीले लकडाउन अवज्ञा गर्ने चेतावनी दिएपछि उपत्यकाका तीनवटै प्रशासनको आकस्मिक बैठक

मातृका दाहाल

काठमाडौँ — उद्योगी/व्यवसायीहरुले लकडाउन अवज्ञा गर्ने चेतावनी दिएपछि परिस्थिति नियन्त्रणमा लिन उपत्यकाभित्रका तिनवटै जिल्ला प्रशासन कार्यालयको संयुक्त रुपमा आकस्मिक बैठक बसेको छ ।

काठमाडौं, भक्तपुर र ललितपुरका प्रशासन, सुरक्षा निकाय तथा स्थानीय निकायका पदाधिकारीलगायतको उपस्थितिमा बसेको आकस्मिक बैठकमा लकडाउन व्यवस्थित बनाउने विषयमा छलफल भइरहेको छ ।

काठमाडौंका प्रमुख जिल्ला अधिकारी(प्रजिअ) जनकराज दाहालले तीनवटै जिल्ला प्रशासन तथाअन्तर्गतका सुरक्षा निकायको संयुक्त बैठकले लकडाउन कसरी व्यवस्थित बनाउने भन्ने विषयमा छलफल भइरहेको बताए ।

बैठकस्थलबाट प्रजिअ दाहालले कान्तिपुरसँग भने, ‘व्यवसायीहरुले लकडाउन अवज्ञा गर्ने भन्नु भएको छ, यसप्रति हाम्रो ध्यानाकर्षण भएको छ, तर यसलाई कसरी व्यवस्थित गर्न सकिन्छ भन्नेमा तीनवटै जिल्लाका प्रशासन, सुरक्षा निकाय, जिल्ला समन्वय समिति, स्थानीयतहलगायत मिलेर एउटा समाधानको बाटो खोज्छौं, यस विषयमा छलफल जारी छ ।’

प्रजिअ दाहालले शैक्षिक संस्था, होटल तथा पार्टी प्यालेस, सार्वजनिक यातायात/सनेमा हल, सार्वजनिक भेला सम्मेलनलगायतलाई पूर्ण रुपमा नियन्त्रण गरेर बाँकी क्षेत्र नियन्त्रित ढंगले सुचारु गर्ने सम्वन्धमा छलफल जारी रहेको बताए । यस विषयमा केन्द्रित भएर जिल्ला क्राइसिस म्यानेजमेन्ट सेन्टर निष्कर्षमा पुग्ने उनले बताए ।

लकडाउनले जनजीवन कठिन बनाएको भन्दै बिहीबारदेखि मुलुकका विभिन्‍न ठाउँहरुमा पसलहरु खुल्न थालेका छन् । बिहीबार काठमाडौंको न्युरोडमा रहेका केही पसलहरु पनि खुलेका छन् ।

सम्बन्धित समाचार

काठमाडाैंकाे न्युराेडका पसल खुल्न थाले [तस्बिरहरू]

प्रकाशित : जेष्ठ २२, २०७७ ११:२५
पूरा पढ्नुहोस्
प्रतिक्रिया
पठाउनुहोस्
×