पर्वतका सबै संक्रमित भारतबाट आएका

सँगै आएका अरु व्यक्तिमा भने देखिएन संक्रमण
अगन्धर तिवारी

पर्वत — पर्वतमा पहिलोपटक कोरोना स‌ंक्रमण देखिएका पाँच जनासँगै भारतबाट आएका अरु व्यक्तिहरुको पीसीआर परीक्षण रिपोर्ट नेगेटिभ आएको छ ।

पर्वत अस्पतालले दिएको जानकारीअनुसार भारतबाट नेपालको सुनौली नाका हुँदै बिहीबार पर्वतको कुश्मास्थित दुई स्थानको क्वारेन्टाइनमा राखिएका पाँच जना व्यक्तिहरुमा रिपोर्ट पोजिटिभ आएको हो ।

गण्डकी प्रदेशस्तरीय प्रयोगशालामा सोमबार साँझ रिपोर्ट पोजिटिभ देखिएका उनीहरुको बिववरण मंगलबार बिहान सार्वजनिक भएको हो । पोजिटिभ देखिनेहरुमा फलेबास नगरपालिकाका २० र ४० वर्षका पुरुष तथा महाशिला गाउँपालिकाका १९, २० र २१ वर्षका पुरुष छन् ।

उनीहरुसँगै आएका अरु व्यक्तिहरुको रिपोर्ट भने नेगेटिभ आएको पर्वत अस्पतालले जनाएको छ । भारतबाट आएका सबैको पीसीआर परीक्षण गर्ने निर्णयअनुसार आइतबार पठाएका ३९ मध्ये पाँच जनाको रिपोर्ट पोजेटिभ आएको हो । उनीहरु सबैलाई उपचारका लागि सदरमुकाम कुश्माकै गुप्तेश्वर क्याम्पसमा तयार गरिएको अस्थायी कोरोना अस्पतालमा लगिएको पर्वत अस्पतालका निमित्त मेडिकल सुपरिटेन्डेन्ट डा. शिशिर देवकोटाले बताए । उनका अनुसार कोरोना पोजिटिभ देखिएकाहरुको स्वास्थ्य अवस्था सामान्य छ । ‘लक्षण पोजिटिभ आएको भए पनि उहाँहरुमा कुनै लक्षण छैन,’ उनले भने, ‘सँगै आएका अरुको पनि रिपोर्ट नेगेटिभ आएको छ । पोजिटिभ देखिएका बाहेक सबै सुरक्षित हुनुहुन्छ ।’ कुश्मासहित सबै पालिकाहरुको लगानीमा २० शय्याको अस्थायी कोरोना अस्पताल तयार गरिएको छ ।

संक्रमण पुष्टि भएका व्यक्तिहरुसँगै भारतबाट आएका अरु व्यक्ति तथा कुश्मा आइसकेकपछि राखिएका स्थान आसपासका व्यक्तिहरुको समेत पहिचान गरी सदरमुकाम र समग्र जिल्लालाई संक्रमणबाट जोगाउने पहल भइरहेको कोरोना रोकथाम जिल्लास्तरीय कमाण्ड फोर्सले जनाएको छ । त्यसका लागि मंगलबार दिउँसो जिल्ला प्रशासनमा बैठक बसेको छ । बैठकमा कोरोना पोिजटिभ भेटिएकाहरुको कन्ट्याक्ट ट्रेसिङ गर्ने, उनीहरु बसेका स्थानमा कीटाणुनाशक रसायन छर्किने, आइसोलेसन अस्पताललाई व्यवस्थित गराउने लगायत विषयमा छलफल भएको पर्वतका प्रहरी नायब उपरीक्षक श्यामु अर्यालले बताए ।

पर्वत प्रशासनको पहलमा भारतबाट पछिल्लो दुई सातायता एक सय ६९ जना भित्रिएका छन् । उनीहरु सबैको पीसीआर परीक्षण भइरहेको छ । परीक्षण गरिएकामध्ये ४५ जनालाई सम्बन्धित स्थानीय तहका क्वारेन्टाइनमा पठाइएको छ । सबैलाई एकद्वार प्रणालीबाट सदरमुकाम ल्याएर सदरमुकामकै क्वारेन्टाइनमा राखिएको छ ।

प्रकाशित : जेष्ठ २०, २०७७ १३:२७
प्रतिक्रिया
पठाउनुहोस्

'रुकुम घटनामा न्यायलाई बिग्रिन दिइन्न'

रुकुम घटनाबारे मानवअधिकार समितिमा गृहमन्त्री, सचिव, आइजिपी र महान्यायाधिवक्ता 
जयसिंह महरा

काठमाडौँ — महान्यायाधिवक्ता अग्नि खरेलले ५ जनाको हत्या भएको र एकजना बेपत्ता रहेको रुकुम घटनामा न्याय गरिने बताएका छन् । संसदको कानून, न्याय तथा मानवअधिकार समितिमा बोल्दै खरेलले भने, 'यो मुद्दालाई बिग्रिन दिइन्नँ । एउटा ठूलो समुदायले यसमा हाम्रो कामको निगरानी गरिरहेको छ । न्यायको आशा गरिरहेका छन् । यसमा न्याय गरिन्छ ।' 

उनले कञ्चनपुरकी किशोरी निर्मला पन्तको बलत्कार र हत्याको घटनातिर संकेत गर्दै केही घटनाहरु बिग्रिएर गएको भन्दै यो घटनामा त्यस्तो गर्न नदिइने बताए । उनले राजनीतिक वा अन्य प्रभावबाट अनुसन्धानलाई प्रभावित हुन नदिने पनि बताए । समितिको मंगलबारको बैठकमा दलित अधिकारकर्मीहरुलाई पनि बोलाइएको छ । खरेलले विगतमा छुवाछुतसम्बन्धि कानुनहरु बनाए पनि कार्यान्वयनमा चुक्दा यस्ता घटना भइरहेको बताए ।

समिति बैठकमा प्रहरी महानिरिक्षक ठाकुरप्रसाद ज्ञवालीले घटनाको निष्पक्ष छानविन भइरहेको बताए । उनले गृह मन्त्रलायका सहसचिव नेतृत्वको एउटा टोली तथा सिआइबीको अर्को टोली र नेपालगञ्जबाट संघीय प्रहरीको अर्को टोली गरी तीनवटा टोली घटनाको अनुसन्धान र जाँचबुझमा खटिएको समितिलाई बताए । घटनामा २० जना विरुद्ध किटानी जाहेरी दर्ता भएकोमा २ जनामात्र पक्राउ पर्न बाँकी रहेको पनि उनले बताए । 'बेपत्ता एकजना युवाको खोजी पनि जारी छ,' उनले बताए ।

समितिमा गृहसचिव महेश्वर न्यौपानेले घटना जेजसरी भएको हो त्यसै अनुसार अभियोजन गर्ने तयारी रहेको बताए । उनले गृहको टोलीले पक्राउ परेकासँग बयान लिइसकेको र आज घटनामा घाइते भएका युवाहरुलाई घटनास्थलमा लगेर 'सिन रिक्रियट' गर्ने काम भइरहेको जानकारी गराएका थिए ।

समिति बैठकमा गृहमन्त्री रामबहादुर थापा पनि उपस्थित छन् । अहिले सांसदहरुले बोलिरहेका छन् । बैठकको अन्त्यमा थापाले जवाफ दिनेछन् ।

समितिका सभापति कृष्णभक्त पोखरेलले अहिलेको परिस्थितिमा जातीय विभेदविरुद्ध महाअभियान चलाउनु पर्ने बताए । 'रुकुमको घटना जातीय विभेद र मानवअधिकार उल्लंघनको निकृष्ट घटना हो। जातीय विभेदविरुद्ध महाअभियान अब नचलाउने हो भने हाम्रोमा पनि अमेरिकाकोजस्तो भयावह स्थिति आउन सक्छ,' सभापति पोखरेलले भने ।

प्रकाशित : जेष्ठ २०, २०७७ १३:२२
पूरा पढ्नुहोस्
प्रतिक्रिया
पठाउनुहोस्
×