बागलुङमा भीड बढेसँगै थपिए क्वारेन्टाइन- गण्डकी - कान्तिपुर समाचार

बागलुङमा भीड बढेसँगै थपिए क्वारेन्टाइन

प्रकाश बराल

बागलुङ — लकडाउनको दुई महिनासम्म खाली देखिएका बागलुङका क्वारेन्टाइन खचाखच भरिन थालेका छन् । चार सय जना अट्ने क्वारेन्टाइनले नधानेपछि सबै पालिकाले विद्यालय, सामुदायिक भवन र प्राविधिक शिक्षालयलाई पनि प्रयोगमा ल्याएका छन् ।

जेठ ५ यता भारतबाट भित्रिनेहरू बढेसँगै क्वारेन्टाइन भरिएका हुन् । शुक्रबारसम्म जिल्लाभरका १० पालिकामा गरी ५ सय १५ जना क्वारेन्टाइनमा रहेको स्वास्थ्य कार्यालयप्रमुख सुरज गुरौले बताए । ‘आएकाहरू कोही पनि घर गएका छैनन्, बरु मापदण्ड नपुगेकालाई पुर्‍याउन लगाएका छौं,’ उनले भने, ‘आएर बस्न थालेको ५ दिन कटेका सबैको स्वाब संकलनको क्रम चलिरहेको छ ।’

सबैभन्दा धेरै ढोरपाटन नगरपालिकामा १ सय ३३ र निसीखोला गाउँपालिकामा १ सय २४ जना छन् । त्यस्तै तमानखोलामा १४, ताराखोलामा १६, बडिगाडमा १ सय ७, काठेखोलामा २२ र बरेङ गाउँपालिकामा ४ जना छन् । बागलुङ नगरपालिकामा ३४, जैमिनी नगरपालिकामा १२ र गलकोट नगरपालिकामा ५० जना क्वारेन्टाइनमा बसेका छन् ।

यसअघि बागलुङ नगरपालिकाले ३ सयभन्दा बढीलाई क्वारेन्टाइन राखेकामा नेगेटिभ रिपोर्ट आएपछि घर पठाएको थियो । मापदण्ड नपुगेको टिप्पणी भएपछि पहिला बनेका क्वारेन्टाइनमा सेवासुविधा थप गरिएको छ । सातादिनमै जिल्लामा झन्डै १ सय ५० क्वारेन्टाइन थपिएका छन् । अझै भारतबाट आउने क्रम जारी रहेकाले क्वारेन्टाइन थपिएको गलकोट नगरपालिकाका प्रमुख भरत शर्मा गैरेले बताए । ‘खानेपानी, सरसफाइ, साबुन, शौचालय र खानपानको गुणस्तरमा ध्यान दिएर मात्रै क्वारेन्टाइनमा राखिएको छ,’ उनले भने, ‘यसअघि पनि भारतबाट पैदलै आएकालाई राखेर स्वास्थ्य परीक्षणपछि मात्रै घरमा पठाएका थियौं ।’ बुधबार संक्रमण पुष्टि भएकाहरुको कन्ट्याक्ट ट्रेसिङ भइसकेको गुरौले जानकारी दिए ।

सबै क्वारेन्टाइनका मानिसको स्वाब संकलनका लागि धौलागिरि अञ्चल अस्पतालका दुई टोली खटिएका छन् । उनीहरूले स्वाब संकलन गर्दै परीक्षणका लागि पोखरा पठाउने गरेका छन् ।

भारतबाट आएका मध्ये ६ जनामा कोरोना संक्रमण देखिएपछि धौलागिरि अस्पतालको आइसोलेसन कक्षमा भर्ना गरिएको छ । उनीहरूको अवस्था सामान्य रहेको मेडिकल सुपरिटेन्डेन्ट डा. शैलेन्द्र पोखरेलले बताए । ‘एक–दुई जनामा सामान्य खोकी थियो, त्यो पनि दुई दिनमा निको भइसक्यो,’ उनले भने, ‘सामान्य अवस्थामा आराम गरेर बसिरहनुभएको छ ।’

प्रकाशित : जेष्ठ १७, २०७७ १२:२३
प्रतिक्रिया
पठाउनुहोस्

झापाको एउटै क्वारेन्टाइनमा बसेका ९९ मध्ये ५२ जनामा संक्रमण

अर्जुन राजवंशी

बिर्तामोड — प्रदेश १ मा सबैभन्दा बढी कोरोना भाइरसका संक्रमित पुष्टि भएको झापामा एउटै क्वारेन्टाइनमा बसेका ५२ जनामा संक्रमण देखिएको छ । कचनकवल गाउँपालिका ४ केचनास्थित महेन्द्र रत्न माविको क्वारेन्टाइनमा बसेकामध्ये ५२ जनामा कोरोना संक्रमण पुष्टि भएको हो ।

उक्त क्वारेन्टाइनमा भारतबाट लुकीछिपी नेपाल प्रवेश गरेकाहरुलाई राएिको थियो । त्यहाँ रहेका ९९ जनामध्ये ५२ जनामा संक्रमण पुष्टि भइसकेको छ । शुक्रबार २७ जनामा पुष्टि भएको प्रदेश १ सामाजिक विकास मन्त्रालयले जनाएको छ । अर्का भद्रपुरका एकजनासहित शुक्रबार झापाका २८ जनामा संक्रमण पुष्टि भएको हो ।

थपिएका २७ र यसअघिका समेत गरी उक्त क्वारेन्टाइनमा रहेका ५२ जनामा संक्रमण पुष्टि भएको गाउँपालिकाका स्वास्थ्य शाखा प्रमुख जागेश्वरप्रसाद यादवले बताए । विराटनगरस्थित कोसी अस्पतालको प्रयोगशालामा स्वाब नमुना परीक्षणका लागि पठाइएकामा पोजिटिभ रिपोर्ट आएको यादवले बताए ।

त्यही क्वारेन्टाइनका २७ जनामा शुक्रबार अनि अरुमा बिहीबार संक्रमण पुष्टि भएको स्वास्थ्य तथा जनसंख्या मन्त्रालयले पनि पुष्टि गरिसकेको छ ।

कचनकवलमा मात्रै संक्रमितको संख्या सय पुगेको छ । भारतबाट लुकीछिपी नेपाल प्रवेश गरेकालाई सीमा वारि आएलगत्तै नियन्त्रणमा लिएर क्वारेन्टाइन र होल्डिङ सेन्टरमा राख्ने गरिएको छ ।

उनीहरुलाई सीमा क्षेत्रमै नियन्त्रणमा लिने गरेकाले संक्रमितहरुबाट समुदायमा भने संक्रमण फैलिन नपाएको जिल्ला प्रहरी प्रमुख एसपी कृष्णप्रसाद कोइरालाले जानकारी दिए । भारतको दिल्ली, मुम्बई, गुजरात, उत्तर प्रदेशलगायत स्थानबाट आएकालाई राख्न कचनकवलमा मात्र ६ वटा क्वारेन्टाइन निर्माण गरिएका छन् ।

कचनकवलमा लक्ष्मी मावि बनियानी, जानकी आधारभूत विद्यालय पाठामारी, लक्ष्मीप्रसाद देवकोटा मावि सुकुनाडिघी, महेन्द्र रत्न मावि केचना, पथरिया मावि पथरिया र बुद्ध आधारभूत विद्यालय घेराबारीमा क्वारेन्टाइन निर्माण गरिएको छ । ६ मध्ये लक्ष्मी मावि र बुद्ध आधारभूतमा बसेकाहरुको पीसीआर परीक्षणका लागि शुक्रबार स्वाब नमुना संकलन गरिएको थियो । अन्य चारवटा क्वारेन्टाइनमा रहेकाहरुमा भने संक्रमण पुष्टि भइसकेको छ ।

झापामा अहिलेसम्म १०५ जनामा कोरोना संक्रमण पुष्टि भएको छ भने संक्रमण पुष्टि भएकामध्ये २ जना निको भएका छन् ।

प्रकाशित : जेष्ठ १७, २०७७ १२:२१
पूरा पढ्नुहोस्
प्रतिक्रिया
पठाउनुहोस्
×