तनहुँका क्‍वारेन्टाइन भरिन थाले

सम्झना रसाइली

तनहुँ — भारत लगायत जिल्ला बहिराबाट आउने व्यक्तिलाई राख्न तयार गरिएका क्‍वारेन्टाइन भरिन थालेका छन् । 

कोरोना भाइरस (कोभिड–१९) संक्रमण फैलन नदिन तथा न्यूनिकरणका लागि गरिएको लकडाउनका कारण भारतका विभिन्न राज्यबाट सुनौली सीमा क्षेत्रमा आई अलपत्र परेका जिल्लावासीलाई उद्धार गर्न थालिएसँगै क्‍वारेन्टाइन भरिन थालेका हुन् । कोभिड–१९ कहरका कारण रोजगारी गुमाएर पैदलै यात्रा गरी सुनौली नाकामा अलपत्र परेपछि जिल्ला समन्वय समिति, जिल्ला प्रशासन कार्यालय तथा स्थानीय तहको समन्वयमा उद्धार गर्न चलिरहेको छ ।

भारतीय प्रहरीले नेपालीलाई सीमासम्म ल्याएर छाडिदिने गरेको र बन्दाबन्दीका कारण सहजै आफ्नो देश फर्कन नसकी अलपत्र परेकामध्ये हालसम्म २२० जनालाई उद्धार गरी स्थानीय तहले निर्माण गरेको क्‍वारेन्टाइनमा राखिएको जिल्ला स्वास्थ्य कार्यालयका प्रमुख शंकरबाबु अधिकारीले बताए । उनका अनुसार भानु नगरपालिकामा १५, व्यास नगरपालिकामा ४५, शुक्लागण्डकी नगरपालिकामा २५, भिमाद नगरपालिकामा ४६, आँबुखैरेनी गाउँपालिकामा ३, देवघाट गाउँपालिकामा १२, घिरिङ गाउँपालिमा १५, म्याग्दे गाउँपालिकामा २३, बन्दीपुर गाउँपालिकामा ८ र रिसिङ गाउँपालिकामा २५ जना गरी २२० जनालाई क्‍वारेन्टाइनमा राखिएका छन् । यस्तै, क्‍वारेन्टाइनमा बस्नेहरुमा ५ महिला र २१५ पुरुष रहेका छन् ।

क्‍वारेन्टाइनमा बसेकाहरूको पीसीआर परीक्षणलाई पनि तीव्रता दिइएको कार्यालयका प्रमुख अधिकारीले बताए । उनले भने, ‘हालसम्म जिल्लामा ८९ पुरुष र १८ महिला गरी १०७ जनाको पीसीआर तथा ५९३ पुरुष र ८३ महिला गरी ६७६ जनाको आरडीटी प्रविधिबाट कोरोना परीक्षण गरिएकोमा सबैको रिपोर्ट नेगेटिभ आएको छ ।’भारतका विभिन्न सहरमा रोजगारी गरी फर्किएकाहरुको उद्धार गरिएको प्रमुख जिल्ला अधिकारी बद्रीनाथ अधिकारीले बताए । उनले भने, ‘भारतबाट जिल्लाका अन्य व्यक्तिहरु फर्कन सक्ने भएकाले उनीहरूलाई राख्नका लागि प्रत्येक स्थानीय तहमा कम्तिमा पनि ५०/५० वेड क्षमताको व्यवस्थित क्‍वारेन्टाइनको तयारी गरिरहेका छौं ।’

‘जिल्लाका १० वटै स्थानीय तहमा हालसम्म १९२ शय्याको क्‍वारेन्टाइन निर्माण गरिएको भए पनि तत्कालका लागि ५०० शय्याको क्‍वारेन्टाइन बनाउने तयारीमा तनहुँका स्थानीय तह लागि परेका छन्’, प्रजिअ अधिकारीले भने, ‘एक स्थानीय तहमा कम्तीमा पनि ५० वेड क्षमताको व्यवस्थित क्‍वारेन्टाइन बनाउने कार्य अगाडि बढाइएको छ ।’

यस्तै जिल्लाको ५ स्थानमा ३४ शय्याको आइसोलेसन कक्ष तयार गरिएको छ भने जिल्ला तथा स्थानीय तह प्रवेश गर्ने नाकाहरुमा ६२ वटा स्वास्थ्य सहायता कक्षा खडा गरिएको छ ।

चैत्र १ गतेयता भारत लगायत विभिन्न मुलुकबाट ९१६ नागरिक जिल्ला भित्रिएका छन् ।

प्रकाशित : जेष्ठ १२, २०७७ २०:२४
प्रतिक्रिया
पठाउनुहोस्

मजदुरलाई राहतको सट्टा रोजगार

सम्झना रसाइली

तनहुँ — जिल्लाको बन्दीपुर गाउँपालिकाले मजदुरलाई राहतको सट्टा रोजगार दिएको छ । कोरोना भाइरस (कोभिड–१९) को संक्रमण रोकथाम तथा नियन्त्रणका लागि गरिएको लकडाउनका कारण प्रभावित बनेका मजदुरलाई गाउँपालिकाले राहतको सट्टा काममा खटाएको हो ।

बन्दीपुरमा साहसिक पर्यटकलाई आकर्षित गर्नका लागि निर्माण गर्न लागिएको मुकुन्देश्रवरी–रामकोट साइकल लेनका लागि स्थानीय मजदुरहरुलाई काम दिइएको प्रधानमन्त्री रोजगार कार्यक्रमका संयोजक सरनसिं गुरुङले बताए । ‘गाउँपालिकाले सोमबारमात्र बन्दीपुर २ र ३ वडाका २६ जनालाई ५ किलोमिटरको साइकललेन निर्माण कार्यमा खटाएको छ’, उनले भने, ‘सूचीकृत बेरोजगार संख्याको आधारमा उनीहरुलाई प्रधानमन्त्री रोजगार कार्यक्रमअन्तर्गत काममा खटाइएको हो ।’

६ लाख ५० हजार रुपैयाँको बजेट रहेको उक्त लेन निर्माणमा खटिएका मजदुरलाई प्रतिदिन ७ सय रुपैयाँको दरमा पारिश्रमिक प्रदान गरिने उनले बताए । यसरी गाउँपालिकाले राहतको सट्टामा रोजगार प्रदान गर्दा गाउँवासीहरु खुसी भएको संयोजक गुरुङ बताउँछन् । यस्तै, दुई पटक राहत लिएका बन्दीपुर–३ रामकोटका खिमबहादुर थापा राहतभन्दा काम नै बेस भनेर साइकल लेन निर्माण कार्यमा खटिएका छन् । उनले भने, ‘गाउँपालिकाले राहत त दिएको थियो नि तर के गर्नु ८ जनाको परिवार छ, पाएको थोरै राहतले कति दिन नै पुर्‍याउनु र ? हामी काम गरेर बिहान बेलुकाको छाक टार्नेलाई त राहत भन्दा काम नै ठिक छ ।’

लकडाउन भएसँगै काम नपाउँदा निरास भएकी बन्दीपुर–३ रामकोटकी दिलमाया राना गाउँपालिकाले नै रोगजार दिँदा खुसी लागेको बताउँछिन् । ‘गाउँपालिकाले राहतको सट्टा काम गर्ने ठाउँ दियो, म यसैमा खुसी छु’, उनले भनिन्, ‘दुई चोटी थापेको राहतले ५ जनाको परिवारलाई १० दिन पनि पुग्दैन कति राहतमात्र थाप्नु । बरु काम गरेर आफ्नै कमाई खानु ठीक लाग्छ ।’ यसरी राहतले २/४ छाकमात्र टार्न सहज भएको अवस्थामा काम नै पाइएपछि अभावको समस्या हटेको उनीहरु बताउँछन् ।

यस्तै, गाउँपालिकले श्रममा आधारित राहत कार्यक्रमअन्तर्गत बन्दीपुरदेखि छिम्केश्वरी डाँडासम्म पुग्ने साइकललेन पनि निर्माण गर्ने भएको गाउँपालिका अध्यक्ष पूर्णसिं थापाले बताए । उनले भने, ‘करिब ६ लाख रुपैयाँ बराबरको योजना हो । यसमा साइकललेन निर्माण सँगसँगै लेन वरपर फलफूलका बोटबिरुवा निर्माणका काम पनि गरिनेछ ।’

‘गाउँपालिकाले २ चरण राहत प्रदान गर्‍यो र विभिन्न संघसंस्थाको सहयोगमा अतिआवश्यक परिवार पहिचान गरी धेरै पटक नै राहत बाँडियो’ उनले भने, ‘तर सधैं राहत दिएरमात्र नहुने रहेछ । अहिले गाउँपालिकाले राहतको सट्टा कामको अभियान चलाएपछि सबै खुसी हुनुहुन्छ ।’ उनका अनुसार गाउँपालिकाले श्रममा आधारित राहत कार्यक्रमअन्तर्गत ६ वटै वडामा प्रतिवडा १/१ लाख छुट्टाइएको छ ।

विश्वभर फैलिएको कोभिड–१९ को संक्रमणलाई मध्यनजर गर्दै सामाजिक दूरी कायम गरी उच्च सतर्कताका साथ मजदुरहरुलाई काममा खटाइएको गाउँपालिकाले जनाएको छ ।

प्रकाशित : जेष्ठ ६, २०७७ १६:२५
पूरा पढ्नुहोस्
प्रतिक्रिया
पठाउनुहोस्
×