बाँझो जग्गामा खेती गरे प्रतिरोपनी ५ हजार अनुदान

आश गुरुङ

लमजुङ — लमजुङको मध्यनेपाल नगरपालिकाले बाँझो जमिनमा तरकारी तथा फलफूल खेती गरेमा प्रतिरोपनी ५ हजार रुपैयाँसम्म अनुदान दिने भएको छ ।

नगरपालिकाले ४० वर्षमुनिका युवालाई लक्षित गरी यो कार्यक्रम अघि सारेको जनाएको छ । बेरोजगार युवालाई मध्यनजर राखेर नगरपालिकाले बाँझो जमिनमा खेती गर्नेलाई अनुदानको कार्यक्रम ल्याएको नगरपालिकाका मेयर रमेशकुमार पाण्डेले बताए । उनका अनुसार जो कसैले पनि बाँझो जमिनमा खेती गरेमा प्रतिरोपनी ४ हजार रुपैयाँ र अरुको जग्गा भाडामा लिएर बाँझो जमिनमा खेती गरेमा ५ हजार अनुदान दिने निर्णय गरिएको छ ।

कोराना महामारीसँगै आउँदा दिनमा आउन सक्ने खाद्यान्न संकट टार्न र दीर्घकालीन रुपमा पनि युवालाई कृषिकर्ममा टिकाउन कार्यक्रम लागू गर्न लागेको उपमेयर राजकुमार श्रेष्ठले बताए । ‘एकातिर बाँझो जमिनमा खेती हुनेछ । अर्को कुरा युवा स्वदेशमै स्वरोजगार बन्नेछन् । व्यावसायिक बन्नेछन् । फलफूल, तरकारी तथा खाद्यान्नमा नगरपालिका आत्मनिर्भर बन्नेछ ।’

बाँझो जमिनमा खाद्यबाली, तरकारी तथा फलफूल साथै मसालेदारलगायत खेती गर्न सकिने नगरपालिकाले जनाएको छ । खेती गर्नका लागि वडा कार्यालयमामार्फत निवेदन संकलन गर्ने र संकलित निवेदनलाई ‘युवा एवं महिला, कृषि तथा पशुपालन लक्षित कार्यक्रम कार्यान्वयन कार्याविधि २०७५’ अनुसार गठित समितिले सिफारिस गरेपछि अनुदान दिइने मेयर पाण्डेले बताए । नगरपालिकाले चालु आर्थिक वर्षमा स्वीकृत ‘नगरप्रमुख कृषि आधुनिकरण अनुदान कार्यक्रम’ शीर्षकमा छुट्याएको ५० लाख रुपैयाँ अहिलेको अवस्थामा खरिद प्रक्रिया पूरा गरी खरिद तथा वितरण गर्ने सम्भावना नभएकाले उक्त बजेटलाई बाँझो जमिनमा खेती गर्नेलाई अनुदान दिने प्रक्रिया अघि बढाएको उनले बताए ।

नगरपालिकाका प्रमुख प्रशासकीय अधिकृत नरबहादुर खड्काका अनुसार बाँझो जमिनमा खेती गर्न इच्छुकको वडा कार्यालयमार्फत निवेदन संकलन भइरहेको र निवेदन नगरपालिकामा प्राप्त भएपछि तत्कालै कार्यान्वयन प्रक्रियामा अघि बढाइने बताए । ‘अहिले धेरै युवा बेरोजगार छन् । काम पाएनौं भनिरहेको अवस्था छ । बरु बाँझो जमिनमा खेती गरेमा हामीले अनुदान दिने भनेका छौं,’ उनले भने, ‘कृषि कर्ममा युवा लागेमा हामी अन्य अनुदानका कार्यक्रम पनि सहयोग गर्छौं ।’

प्रकाशित : जेष्ठ १०, २०७७ १०:५३
ADVERTISEMENT
प्रतिक्रिया
पठाउनुहोस्
ADVERTISEMENT

सर्लाहीमा संक्रमितको संख्या ३३ पुग्यो

काठमाडौंमा उपचाररत दुर्घटनाका घाइते युवकमा पनि संक्रमण
ओमप्रकाश ठाकुर

सर्लाही — सर्लाहीमा थप १३ जनामा कोरोना भइरस संक्रमण भएको पुष्टि भएको छ । जिल्लाको गोडैता नगरपालिकामा १२ तथा कविलासी नगरपालिकामा १ गरी १३ जनामा संक्रमण पुष्टि भएको हो । योसहित जिल्लामा संक्रमितको संख्या ३३ पुगेको छ । 

उनीहरु सबै केही दिनअघि भारतबाट घर फर्केका हुन् । गोडैताका १२ जना संक्रमित स्थानीय तहको क्वरेन्टाइनमा बसेका छन् । उनीहरुको गत मंगलबार स्वाब संकलन गरी काडमाडौं पठाइएको थियो । कविलासीका एक जना भारतबाट फर्किने क्रममा दुर्घटनामा परेपछि उपचारको क्रममा काठमाडौंमा चेक गराउँदा पोजिटिभ देखिएको हो । शुक्रबार मात्र गोडैताको क्वरेन्टाइनमा बसेका १३ जना र रामनगरको क्वरेन्टाइनमा बसेको एक जनामा कोरोना संक्रमण पुष्टि भएको थियो ।

पछिल्लो समय भारतबाट मजदुरी गरेर नेपाल फर्केका मजदुरहरुमा कोरोना संक्रमण पुष्टि भएको प्रमुख जिल्ला अधिकारी मोहनबहादुर जिसीले बताए । खुला सीमाका कारण भारतबाट लुकिछिपी नेपाल प्रवेश गर्न थालेपछि स्थानीय तहहरुले आ–आफ्ना नागरिकलाई ल्याएर क्वारेन्टाइनमा राख्दै आएको छ ।

गत मंगलवार क्वारेन्टाइनमा बस्दै आएका गोडैताका ८१ जना र रामनगरका ५ जनाको स्वाब संकलन गरी काठमाडौं पठाइएको थियो । जसमध्ये हालसम्म गोडैताका २५ जना र रामनगरका १ जनामा कोरोना संक्रमण पुष्टि भए पनि अन्यको रिपोर्ट आउन बाँकी रहेको प्रमुख जिल्ला अधिकारी जिसीले बताए । संक्रमितहरुलाई उपचारका लागि प्रादेशिक अस्पताल जनकपुर पठाउने तयारी भइरहेको जिल्ला प्रशासन कार्यालयले जनाएको छ ।

दुर्घटनामा परेर काठमाडौं चेक गराउँदा कोरोना पोजिटिभ देखिएको कविलासीका पुरुषसँगै आएका अन्य ४० जना स्थानीय तहको क्वारेन्टाइनमा बसिरहेका छन् । सीमामा अझै पनि ठूलो संख्यामा भारतबाट फर्केका मजदुरहरु बसिरहे पनि स्थानीय तहले क्वारेन्टाइनको व्यवस्थापन गर्न नसक्दा उनीहरुलाई ल्याउन सकेका छैनन् ।

प्रकाशित : जेष्ठ १०, २०७७ १०:४४
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
×