कान्तिपुर वेबसाईट
AdvertisementAdvertisement

लमजुङमा गौहत्या आरोपमा २ जना पक्राउ

आश गुरुङ

लमजुङ — गौहत्या आरोपमा लमजुङ प्रहरीले २ जनालाई पक्राउ गरेको छ । घटनाको २ दिनपछि उनीहरुलाई प्रहरीले पक्रेको हो । राइनास नगरपालिकाका ७ विशालटारका ६३ वर्षीय मुसे सार्की र ५३ वर्षीय भीमबहादुर सार्कीलाई मंगलबार विशालटारबाटै पक्राउ गरेको प्रहरीले जनाएको छ ।

जिल्ला प्रहरी कार्यालयका सूचना अधिकारी इन्पसेक्टर ओमप्रकाश पुनका अनुसार जेठ ४ गते आइतबार उनीहरुले गाई काटेको खुलेको छ ।

मंगलबार घटना बाहिरिएको र स्थानीय सुराकीको आधारमा प्रहरीले दुवै जनालाई पक्राउ गरेको उनले बताए । स्थानीयका अनुसार उनीहरुले मासु काटेर सुकुटी बनाएको र सुकुटीको विषयमा झगडा हुन थालेपछि घटना बाहिरिएको हो ।

दुई जनालाई पक्राउ गरी जिल्ला प्रहरी कार्यालयमा ल्याइएको र अनुसन्धान थालिएको डीएसपी रवीन्द्रमान गुरुङले बताए । उनीहरुलाई प्रहरीले पशुपन्छीसम्बन्धी कसुरमा मुद्दा चलाउने भएको छ ।

प्रकाशित : जेष्ठ ७, २०७७ ११:११
प्रतिक्रिया
पठाउनुहोस्

सरकारका अनेकौैं काम आलोचनायोग्य तर नक्सा जारी गर्नु स्वागतयोग्य : गौतम

'पार्टीको सामूहिक निर्णयलाई सरकारले अनुमोदन गरेको हो, कसैको देवत्वकरण नगरौं'
कान्तिपुर संवाददाता

काठमाडौँ — नेकपाका सचिवालय सदस्य वामदेव गौतमले वर्तमान सरकारले गरेका अनेकौं कदम आलोचनायोग्य भए पनि अतिक्रमित भूभाग समेटेर नयाँ नक्सा जारी गर्ने काम स्वागतयोग्य भएको बताएका छन् । 

बुधबार बिहान समाजिक सञ्जाल फेसबुकमार्फत नेता गौतमले सिमाना व्यवस्थापनकसँ सम्बन्धित ऐतिहासिक अभिलेखलाई नयाँ नक्साले बलियो बनाएको उल्लेख गर्दै गौतमले आगामी पुस्तालाई सीमा रक्षाका निमित्त प्रेरणा, उत्साह र ऊर्जा दिएको बताएका छन् ।

नेता गौतमले नेपालका अतिक्रमित भूमिलाई समेटेर मुलुकको नयाँ नक्सा जारी गर्न सुरुदेखि नै आफूले माग गर्दै आएको बताएका छन् ।

‘नक्सा जारी हुनु सामूहिक प्रयास’

त्यस्तै नेता गौतमले कोही निश्चित व्यक्तिको प्रयासबाट नभएर सामूहिक प्रयासबाट नयाँ नक्सा जारी गर्ने निर्णय भएको बताए । उनले भनेका छन्, अनुयायीहरु व्यक्ति केन्द्रित हुन्छन् र निश्चित व्यक्तिका नामलाई देवत्वकरण गर्न व्यस्त हुने प्रचलन छ । तर, 'यो निर्णय पार्टीको सामूहिक निर्णयप्रक्रिया अनुसार भएर, नेपाल सरकारबाट पनि त्यहीअनुरुप अनुमोदन भएको वास्तविकतालाई सबैले स्वीकार गर्नुपर्छ । हामीले राम्रोलाई राम्रो र नराम्रोलाई नराम्रो भन्न सक्नुर्छ ।'

नक्सा बुधबार सार्वजनिक गरिने

यसैबीच मुख्य सचिव लोकदर्शन रेग्मीले कालापानी, लिम्पियाधुरा र लिपुलेक समेटिएको नेपालको नयाँ राजनीतिक नक्सा प्रमाणीकरण गरेका छन् । भूमि व्यवस्था, सहकारी तथा गरिबी निवारण मन्त्रालयका सचिव केदार न्यौपानेको प्रस्तावअनुसार मुख्य सचिव रेग्मी मंगलबार लिपुलेक, लिम्पियाधुरा र कालापानीलाई दार्चुला जिल्लाको व्यास गाउँपालिकामा समेटेर नक्सा प्रमाणीकरण गरेका हुन् ।

प्रमाणित नयाँ नक्सा बुधबार भूमि व्यवस्था मन्त्रालयले सार्वजनिक गर्न लागेको उच्च स्रोतले कान्तिपुरलाई बतायो । नयाँ नक्साअनुसार नेपालको कुल क्षेत्रफल १ लाख ४७ हजार ५ सय १६ वर्ग किलोमिटर कायम हुनेछ । अतिक्रमित भूभागको क्षेत्रफल ३३५ वर्गकिलोमिटर छ । अतिक्रमित भूभागबाहेकको नेपालको क्षेत्रफल १ लाख ४७ हजार १ सय ८१ वर्गकिलोमिटर छ ।

प्रकाशित : जेष्ठ ७, २०७७ ११:०६
पूरा पढ्नुहोस्
प्रतिक्रिया
पठाउनुहोस्
×