तलब नपाएपछि गल्याङ अस्पतालमा तालाबन्दी
स्याङ्जा — गल्याङ नगर अस्पतालका कर्मचारीले अस्पतालमा तालाबन्दी गरेका छन् । ८ महिनादेखि तलब नपाएको भन्दै कर्मचारीले बिहीबार साँझ तालाबन्दी गरेका हुन् ।
गल्याङ नगरपालिका–३ मा रहेको उक्त अस्पतालको च्यानल गेटमा ताला लगाएर अस्पताल बन्द गरिएको हो ।
पटकपटक नगरपालिकासँग तलबबारे अनुरोध गर्दा सुनुवाइ नभएपछि अस्पतालमा ताला लगाउन बाध्य भएको अस्पतालका डाक्टर निरन्जन चौधरीले बताए ।
‘हाम्रो पटकपटकको अनुरोधलाई नगरपालिकाले बेवास्ता गरेपछि हामीले सोमबार ताला लगाएका थियौ,’ उनले भने, ‘नगरपालिकाले बुधबारसम्म तलबबारे टुंगो लगाउने मौखिक सहमति गर्यो । हामीले पुनः काम सुरु गरेका थियौ । तर, बुधबारसम्म पनि तलब सुविधाबारे कुनै टुंगो नलगाएपछि पुनः तालाबन्दी गर्न बाध्य भयौं ।’
यसैबीच घटनाको छानबिन नगरपालिकाले उपप्रमुख देवीसरा थापाको संयोजकत्वमा ६ सदस्यीय समिति गठन गरेको छ ।
प्रकाशित : वैशाख १२, २०७७ १५:२७