तनहुँमा जिल्ला बाहिरबाट तरकारी आयतमा प्रतिबन्ध

सम्झना रसाइली

तनहुँ — तनहुॅमा जिल्ला बाहिरबाट तरकारी ल्याउन प्रतिबन्ध लगाइएको छ । कोरोना भाइरस (कोभिड–१९) को जोखिम बढ्दै गएपछि छिमेकी जिल्ला र भारतबाट आयत गरिने तरकारी रोक लगाउने निर्णय जिल्लाका सरोकारवालाहरुको बैठकले गरेको हो ।

भारत तथा चीनबाट आउने तरकारी समेत देशभित्रैको भनेर आउन थालेपछि जोखिमबाट जोगिन यस्तो निर्णय गरिएको प्रमुख जिल्ला अधिकारी बद्रीनाथ अधिकारीले जानकारी दिए ।

जिल्लाका लागि आवश्यक तरकारी जिल्लाभित्रै उत्पादन हुने उनको भनाइ छ । जिल्लाका स्थानीय तह तथा अन्य सरोकारवालाहरुको बैठकले जिल्ला बासीको सुरक्षालाई मध्यनजर गर्दै अन्य जिल्लाबाट आउने तरकारी तथा फलफूललाई रोक लगाएर जिल्लाभित्रका कृषकहरुले उत्पादन गरेको तरकारी सिधै उपभोक्ताको घरघरमा लगेर बिक्री वितरण गर्ने व्यवस्था मिलाएको हो ।

लकडाउन अवधिभर स्थानीय कृषि उत्पादनहरु मात्र बिक्री वितरण गर्ने निर्णय पनि बैठकले गरेको छ । उपभोक्ताहरुका लागि हरेक दिन विहानको ७ बजेदेखि १० बजेसम्म जिल्लाका तरकारी पसलहरु खुल्ला गर्ने निर्णय भएको तनहुँ तरकारी व्यवसायी संघका अध्यक्ष बिजय बरालले जानकारी दिए ।

यस्तै, जिल्ला प्रशासन कार्यालयले शनिबारदेखि जिल्लाभित्र रहेको मन्दिर, मस्जिदको अनुगमन सुरु गरेको छ । लकडाउनको उल्लंघन गर्दै विदेश तथा अन्य जिल्लाबाट मानिसहरु आएर मन्दिर मस्जिदमा आश्रय लिएर आएका छन् कि भनेर अनुगमन सुरु गरिएको प्रजिअ अधिकारीले बताए ।

प्रकाशित : वैशाख ६, २०७७ २२:०५
प्रतिक्रिया
पठाउनुहोस्

तनहुँमा ४८० जनाको परीक्षण, सबैको रिपोर्ट नेगेटिभ

सम्झना रसाइली

दमौली — भारतलगायतका मुलुकबाट जिल्ला भित्रिएका नागरिकहरुको तनहुँमा र्‍यापिड डायग्नोस्टिक किट (आरडिटी) बाट बिहीबारसम्म ४ सय ८० जनाको परीक्षण गरिएको छ ।

जिल्ला स्वास्थ्य कार्यालय तनहुँको समन्वयमा जिल्लाका १० वटै स्थानीय तहका वडावडामा पुगेर गरिएको परीक्षण्मा सबैको नतिजा नेगेटिभ आएको छ ।

जिल्लाका ४ नगरपालिका र ६ गाउँपालिमा आइतबारदेखि सुरु गरिएको र्‍यापिड परीक्षणमा सबैको रिपोर्ट नेगेटिभ आएको जिल्ला स्वास्थ्य कार्यालयका प्रमुख शंकरबाबु अधिकारीले जानकारी गराएका छन् ।

प्रत्येक पालिकाको वडास्तरमै गएर भारत लगायतका देशबाट जिल्ला फर्किएका व्यक्तिहरुको किटबाट परीक्षण गरिएको अधिकारीले बताए । उनले भने, ‘विदेशबाट जिल्ला फर्किएर होम तथा स्थानीय तहले निर्माण गरेको क्वारेन्टाइनमा बसेर १४ दिन नाघेका र २१ दिन नकटेका व्यक्तिहरुको रगतको नमूना लिएर परीक्षण गरिएको हो । सबैको रिपोर्ट नेगेटिभ आएको छ ।’

प्रदेश सरकारमार्फत जिल्लामा ६ सय ४० वटा किट उपलब्ध भएको बताउँदै कार्यालय प्रमुख अधिकारीले भने, ‘आवश्यकताअनुसार हरेक स्थानीय तहमा किट उपलब्ध गराएर वडावडामै पुगेर कोभिड–१९ परीक्षण गरेका हौं ।’

भानु नगरपालिकामा ४३, व्यास नगरपालिकामा ९१, म्याग्दे गाउँपालिकामा ३६, शुक्लागण्डकी नगरपालिकामा ७०, भिमाद नगरपालिमा ७३, घिरिङ गाउँपालिकामा ४०, ऋषिङ गाउँपालिकामा ६२, देवघाट गाउँपालिकामा ३४, बन्दीपुर गाउँपालिकामा १५ र आँबुखैरेनी गाउँपालिकामा १६ जनाको परीक्षण गरिएको हो ।

जिल्लामा चैत्र १ गतेयता ७ सय ५४ जना विदेशबाट फर्किएका छन् । यी मध्ये देवघाटले निर्माण गरेको क्यारेन्टाइनमा १ जनामात्र बसेका र अन्य होम क्वारेन्टाइनमै बस्दै आएका छन् । हालसम्म १२ जनाको स्वाब परीक्षण गरिएकोमा सबैको रिपोर्ट नेगेटिभ आएको छ ।

परीक्षण गरिएका सबै रिपोर्ट नेगेटिभ आएता पनि जिल्लाबासी सचेत रहनुपर्ने र लकडाउनको पूर्ण रुपमा पालना गरी सबै होम क्वारेन्टाइनमै बस्नुपर्ने प्रमुख जिल्ला अधिकारी बद्रीनाथ अधिकारीले बताए ।

प्रकाशित : वैशाख ४, २०७७ १९:२५
पूरा पढ्नुहोस्
प्रतिक्रिया
पठाउनुहोस्
×