तरकारी पसल बन्द
काठमाडौँ — व्यास नगरपालिका–३ स्थित तरकारी पसलहरु बिहीबारदेखि बन्द गरिएको छ । कोरोना भाइरसको सम्भावित जोखिम नियन्त्रण गर्न लागू गरिएको लकडाउन अवधिमा खुल्ला रहने भनिएका तरकारी पसलहरुमा लापरवाही भएकाले पसल बन्द गर्ने निर्णय गरिएको हो ।
तरकारी बिक्री वितरणमा सुरक्षा, सतर्कता र सामाजिक दूरी कायम गर्ने विषयमा चरम लापरवाही भएको हुँदा लकडाउन अवधिभर तरकारी पसल बन्द गरिने भएको वडाध्यक्ष प्रेमकुमार श्रेष्ठले बताए ।
जिल्ला प्रशासनका अनुसार बिहान ६ बजेदेखि १० र साँझ ४ देखि ७ बजेसम्म अत्यावश्यक खाद्यान्न पसल खुल्ला गर्ने निर्णय बमोजिम तरकारी पसल खुल्ला रहँदै आएको थियो ।
‘पसलहरुमा सामाजिक दुरी कायम गरी आ–आफ्नो पालोमा तरकारी लिने भनिएता पनि पालना भएन’, उनले भने, ‘अब उपभोक्तालाई तरकारी उपलब्ध गराउन जिल्लाभित्रको उत्पादन ट्रकमा राखेर टोल टोलमा र घरघरमा आपूर्ति गरिनेछ । लकडाउन अवधिभरी तरकारी पसल भने बन्द रहनेछन् ।’
यस्तै, व्यास–३ स्थित शवदाहघाटमा मलामी जाँदा संख्या कम र सामाजिक दूरी कायम गर्न अनुरोध गरिएको छ । वडा कार्यालयले दैनिक ज्यालामजदुरी गरी छाक टार्ने व्यक्तिहरुलाई खाद्यान्न वितरण गर्नका लागि टोल विकास संस्थामार्फत् विवरण संकलन पनि सुरु गरिएको उनले बताए ।