तीन पालिका जोड्ने चक्रपथ कालोपत्र हुँदै

कान्तिपुर संवाददाता

बागलुङ — जिल्लाका तीन पालिका समेट्ने चक्रपथको स्तरोन्नति थालिएको छ । कम्तीमा नौ मिटर चौडा गरेर गलकोट– ताराखोला सडक कालोपत्रसमेत गर्न लागिएको हो । 

ताराखोला गाउँपालिकालाई केन्द्र बनाएर काठेखोला गाउँपालिका र गलकोट नगरपालिका समेट्नेगरी गतवर्ष चक्रपथको रेखांकन भएको थियो । गण्डकी सरकारले चालुवर्ष ४० करोड रुपैयाँ लगानी गरेको छ । ‘चालुवर्ष गलकोट–६ को ठूलोगाउँदेखि ताराखोलाको साँदीसम्म १२ किमी कालोपत्र हुनेछ,’ गाउँपालिका अध्यक्ष प्रकाश घर्तीले भने, ‘डीपीआर गरेर मात्र लगानी भित्र्याएकोले सडक दिगो हुनेछ ।’ चक्रपथको गत वर्षै डीपीआर बनाइएको थियो । बहुवर्षे योजनामा समेटेकोले हरेक वर्ष कालोपत्रको काम अगाडि बढ्नेछ ।


चक्रपथको काठेखोला–५ रिजालचोकदेखि ताराखोला–१ र २ तर्फको सहिद मार्ग सुधारको काम भइरहेको छ । घर्तीले भने, ‘यो सडकको पूर्वाधार पनि आगामी वर्ष कालोपत्र हुनेगरी निर्माण गरिएको छ ।’ प्रदेश र गाउँपालकाले संयुक्त लगानी गर्नेगरी समपूरक कोषमार्फत ताराखोलादेखि सीप जाने सडकमा ५ करोड रुपैयाँ माग गरिएको छ । वडा नं. १ को माझखर्कतर्फको सडक स्तरोन्नतिका लागि ५० लाख रुपैयाँ लगानी भएको छ । समपूरक कोषमा वडा नं. ३ को घुस्मेली हुँदै भातखाने डाँडातर्फ १ करोड माग भएको प्रमुख प्रशासकीय अधिकृत रामप्रसाद शर्माले बताए ।

द्वन्द्वको समयमा श्रमदानबाट खनिएको रिजालचोकदेखि ताराखोला सडकलाई सहिद मार्ग नामकरण भएको थियो । यो सडक पनि चौडा पारिँदै छ । ताराखोलादेखि म्याग्दीको रुम जोड्न नौ मिटर चौडा भइसकेपछि कालोपत्र गरिनेछ । पहिलो वर्ष १२ किमी भए पनि आगामी वर्ष दोब्बर खण्ड कालोपत्र गर्ने गरी दाताको खोजी भइरहेको शर्माले जानकारी दिए । रिजालचोकदेखि ताराखोलाको सीपसम्म ४० किमी, गलकोटदेखि ताराखोला जोड्ने झण्डै १५ किमी खण्ड पर्छ ।


प्रकाशित : चैत्र १०, २०७६ ११:१५
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

‘मेमोरी किङ’को शिक्षा सपना

कान्तिपुर संवाददाता

वीरेन्द्रनगर — कालीकोट, महावै गाउँपालिकाका विजय शाहीको कक्षा १ देखि १० सम्म पढ्दा कहिल्यै उत्कृष्ट अंक आएन । अभिभावकले छोराले ‘केही प्रगति गर्न सक्दैन’ भन्दै उनलाई गाली गरिरहन्थे । उत्कृष्ट अंक नआए पनि एसएलसी उत्तीर्ण भएपछि उनले विज्ञान विषय रोजे ।

‘कक्षा ११ मा त दाइले घोकाएर पढाउनुभयो,’ १९ वर्षीय शाहीले भने, ‘१२ कक्षामा पुगिसकेपछि बिस्तारै आफूलाई थाहा भयो कि पढेको जे कुरा पनि म छिट्टै याद गर्न सक्छु ।’ कक्षा ११ मा १८ देखि २० घण्टासम्म नसुतेरै भए पनि पढेका उनी अहिले दुई घण्टाभन्दा कम समयमा एउटा किताब जस्ताको तस्तै याद गर्न सक्छन् ।

पढेको जुनसुकै कुरा पनि एकछिनमा याद गर्न सक्ने आफ्नो क्षमतालाई प्रस्फुटन गर्दै शाहीले गत माघ २५ गते ‘च्याम्पियन बुक्स अफ द वर्ल्ड रेकर्ड’मा आफ्नो नाम दर्ता गराएका छन् । अहिले उनको परिचय ‘मेमोरी किङ’ बनेको छ । पहिला सबैभन्दा कम नम्बर ल्याएर पास हुने आफू अहिले जुनसुकै कुरा पनि आफ्नै सुत्रद्वारा याद गर्न सक्ने भएको उनले सुनाए । शाहीले एक मिनेटमा एक सय दुई शब्द याद गरी भारतका सागर भुजीको रेकर्डलाई तोडेका हुन् । उनले एमबीबीएस कोर्ष तयारीसँगै एमबीबीएसको तयारी किताब पनि लेखिसकेका छन् ।

उनले कर्णाली प्रदेश शिक्षामा पछाडि परेको भन्दै आफ्नो सुत्र प्रयोग गरी कर्णालीका विद्यार्थीलाई याद गर्नसक्ने बनाउने बताए । ‘मैले २५ शब्दको एउटा सुत्र बनाएको छु,’ उनले भने, ‘यही सुत्रबाट किताब याद गर्ने तरिका मसँग छ, केही महिनापछि म यो सुत्र विद्यार्थीका माझ भन्नेछु, जो मसँग सिक्न चाहन्छन् ।’

आफ्नो सुत्रमार्फत विद्यार्थीले पढेका सबै कुरा याद गर्न सक्ने उनको दाबी छ । जुनसुकै उमेर समूहकालाई आफूले सिकाउनसक्ने उनको भनाइ छ । उनले ९ घण्टाको अवधिमा पुरै किताब कण्ठ गर्नसक्ने सुत्र सिकाउन खोजिएको जानकारी दिए । ‘मेरो मेमोरी क्षमतालाई कर्णालीको शिक्षामा लगानी गर्ने सपना छ,’ उनले भने, ‘सुत्र प्रयोग गरे विद्यार्थीले सात/आठ विषयका लागि एक वर्षको समय खर्चिनै पर्दैन ।’

प्रकाशित : चैत्र १०, २०७६ ११:१४
पूरा पढ्नुहोस्
प्रतिक्रिया
पठाउनुहोस्
ADVERTISEMENT
×