ठाडोभाका सर्जकको स्मृतिमा संग्रहालय

परम्परागत घुमाउने खरको छानो भएको घरमा देउबहादुर दुरा, ठाडोभाका गीत र दुरा जातिसँग सम्बन्धित सामग्री संग्रह सुरु गरिएको छ । संग्रहालयकै माध्यमबाट उनका विषयमा थप जानकारी संकलन गर्ने स्थानीय अगुवा डीलबहादुर दुराले बताए । मध्यनेपाल नगरप्रमुख रमेशकुमार पाण्डेले दुराकै स्मृतिमा देउबहादुर दुरा मार्ग निर्माणको प्रक्रिया अघि बढेको जानकारी दिए ।

नेपाली लोकगीत क्षेत्रको पुरानो र मौलिक ठाडोभाका गीतलाई पछिल्लो समय ठाडोभाका शिरोमणि भेडीखर्के साइँला (दीर्घराज अधिकारी) ले संरक्षण र संवर्द्धन गर्दै आएका थिए । उनको २०७४ भदौ २६ मा ८४ वर्षको उमेरमा निधन भएपछि भाका जोगाउन विभिन्न रचनात्मक काम हुँदै आएको छ । ठाडोभाका लोककला प्रतिष्ठानका संरक्षक बुद्धिमान दुराले नेपाली गीत–संगीत क्षेत्रलाई देउबहादुर दुराले ठुलो गुन लगाएको बताए ।