पोखरामा क्यान इन्फोटेक मेला

कान्तिपुर संवाददाता

पोखरा — गण्डकी प्रदेशस्तरीय क्यान इन्फोटेक–२०२० मेला पोखराको नयाँबजारस्थित प्रदर्शनी केन्द्रमा आइतबार सुरु भएको छ । कम्प्युटर एसोसिएसन नेपाल (क्यान) महासंघ कास्कीले आयोजना गरेको मेला फागुन १५ सम्म चल्नेछ ।

सूचना तथा प्रविधिको क्षेत्रमा महत्वपूर्ण योगदान पुर्‍याउने उद्देश्यले मेला आयोजना गरिएको क्यान कास्कीका अध्यक्ष रुक्मागत भण्डारीले बताए । मेला एघारौं संस्करण हो । ‘प्रभु पे क्यान इन्फोटेक–२०२० इन एसोसिएसन विथ वर्ल्डलिंक’ नाम दिइएको मेलाको प्रदेश प्रमुख अमिक शेरचनले उद्घाटन गरे । कम्प्युटर तथा सूचना प्रविधिसम्बन्धी अत्याधुनिक एवं नवीनतम प्रविधिबारे जानकारी दिंदै ग्रामीण क्षेत्रसम्म पहुँच पुर्‍याउने लक्ष्य मेलाको छ ।


बृहत सूचना प्रविधि प्रदर्शनी, आईसीटी कन्फेरेन्स, प्रदेश तथा जिल्ला स्तरका टाइपिङ प्रतियोगिता, आईसीटी वक्तृत्व प्रतियोगिता, विद्यालयस्तरीय जिल्ला तथा प्रदेश स्तरीय आईटी क्विज कन्टेस्ट पनि मेलामा आयोजना गरिएको छ ।


कम्प्युटर तथा ल्यापटपको निःशुल्क मर्मत सेवा, आईसीटी क्षेत्रमा स्थानीयस्तरबाट गरिएका उत्पादन, रोबोट प्रदर्शनी एवं प्रतियोगिता तथा आईसीटीसँग सम्बन्धित अन्य नवीनतम गतिविधिहरू प्रदर्शनी, मोबाइल गेमिङ, वैज्ञानिक आईसीटी उपकरण प्रदर्शनी एवं नवीनतम प्रविधिका मोबाइलहरूको प्रदर्शनी एवं बिक्री वितरण पनि मेलामा हुनेछ । इन्फोटेकमा आईसीटीसँग सम्बन्धित सय स्टल छन् । प्रकाशित : फाल्गुन १२, २०७६ १०:२३

ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

प्रदेशस्तरीय बाल अस्पताल बनाइने

कान्तिपुर संवाददाता

गण्डकी — पोखराको शिशुवामा प्रदेशस्तरीय बाल अस्पताल सञ्चालनमा ल्याइने भएको छ । अस्पताल सञ्चालनका लागि पोखरा महानगर र काठमाडौं इन्स्टिच्युट अफ चाइल्ड हेल्थ (किओच) बीच आइतबार सम्झौता भयो ।

महानगरप्रमुख मानबहादुर जिसी र किओच संस्थापक अध्यक्ष प्राडा भगवान् कोइरालाले मुख्यमन्त्री पृथ्वीसुब्बा गुरुङको उपस्थितिमा अस्पताल सञ्चालनसम्बन्धी १७ बुँदे सम्झौतापत्र आदानप्रदान गरे । अस्पताल पोखरा–२७ को वडा कार्यालयमा सञ्चालन हुनेछ ।

अस्पताल निर्माणको लागि महानगरले ३७ रोपनी क्षेत्रफल उपलब्ध गराएको जिसीले जानकारी दिए । ‘चालु वर्षदेखि नै सेवा सुरु गर्न लागिपरेका छौं,’ उनले भने । किओचले सबै प्रदेशमा विशिष्टीकृत बाल स्वास्थ्य सेवा प्रदान गर्ने तथा बाल स्वास्थ्यसम्बन्धी अध्ययन अनुसन्धान गर्ने लक्ष्य राखेको कोइरालाले बताए । सम्झौताअनुसार उक्त जग्गा महानगरले किओचलाई ३० वर्षसम्म निःशुल्क दिनेछ ।

अस्पताल निर्माणका लागि आवश्यक स्रोत जुटाउन समन्वय तथा सहयोग गर्ने, वडा कार्यालयसँगै बाल अस्पताल सञ्चालनमा ल्याउने र अस्पतालको तर्फबाट एक प्रदेशस्तरीय समिति बनाउने सम्झौतामा उल्लेख छ । समितिमा स्थानीय र प्रदेशको उपस्थिति रहने, अस्पताल निर्माणको विस्तृत डिजाइन, आवश्यक संरचना पुनर्निर्माण गर्ने, सञ्चालनका लागि उपकरण, प्रविधि, प्राविधिक तथा अन्य जनशक्तिको व्यवस्थापन गर्नेलगायत सम्झौता भएको छ ।

मुख्यमन्त्री गुरुङले कोइरालासँग बाल अस्पताल खोल्ने विषयमा भएको कुराकानीले सार्थक रुप लिन थालेकोमा खुसी व्यक्त गरे । ‘अस्पताललाई प्रदेश सरकारको पूर्ण सहयोग रहन्छ,’ उनले भने । अस्पताल करिब ५० करोड रुपैयाँ लागतमा बन्ने अनुमान रहेको प्राडा कोइरालाले बताए । अस्पतालमा बाल विशेषज्ञ रहनेछन् । ‘पोखराका बासिन्दाको मात्र नभई प्रदेशवासीको सहयोग चाहिन्छ,’ उनले भने, ‘यो प्रदेशमा पहिलोपटक थालिएकाले तत्काल काम सुरु गर्छौं । ३ महिनाभित्र पूर्वाधारका इस्टिमेट तयार गर्नेछौं ।’

प्रकाशित : फाल्गुन १२, २०७६ १०:१९
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
×