शाश्वतधाममा घुइँचो [तस्बिरहरु]
नवलपरासी — महाशिवरात्रि पर्वका अवसरमा यहाँको शाश्वतधाममा शुक्रबार बिहानैदेखि घुइँचो छ । धाम परिसरमा रहेका एकाम्बरेश्वर मन्दिर, एक सय ८ शिवलिंगमा जल चढाउने र पूजा गर्नेको भीड छ । आगन्तुकहरुलाई पञ्चेबाजा, बुद्धधर्मावलम्बीहरुको सांस्कृतिक झाँकी प्रस्तुत गरिएको थियो ।
मन्दिर व्यवस्थानपनले भक्तजनहरुको सुविधाको लागि प्रवेशद्वारमै बेलपत्र, फूल प्रसादको व्यवस्था गरेको छ ।
शिवलिंगमा बेलपत्र, दूध, जल चढाउनेहरुको समूहले छुट्टाछुट्टै भजनकीर्तन नाच गरेर श्रद्धा व्यक्त गर्नेहरुको लस्कार दिउँसोसम्मै देखिन्थो । शाश्वतधाम तेस्रो वर्ष प्रवेश गरेको अवसरमा शिवलिंग राखिएको स्थानमा महारुद्री अभिषेक, पूजा गरिएको थियो । एकैथलोमा हिन्दुधर्मका सबै देवीदेवताको पूजागर्न पाइने भएकाले भक्तजनहरुको विशेष श्रद्धा रहेको छ ।
मन्दिरको मुख्य प्रदेशद्वारमा १२ वटा ओम लेखिएको झन्डा शुक्रबार फहराइएको छ । पूर्वी नवलपरासीका प्रमुख जिल्ला अधिकारी लगायत शन्तमहन्तहरुले महाशिवरात्रिका अवसरमा एक वर्षसम्म राखिने झण्डोत्तलन गरेका थिए । शुक्रबार राति १० बजेसम्म पूजा भइरहने शाश्वतधाम व्यवस्थान समितिका रामचन्द्र धितालले जानकारी दिए । उनका अनुसार ३३ महिनामा ३३ लाखले शाश्वतधाम दर्शन गरेका छन् ।
प्रकाशित : फाल्गुन ९, २०७६ १३:३३