कर्मचारी सरुवा विवादले हुप्सेकोट गाउँपालिकामा तालाबन्दी

नारायण शर्मा

नवलपरासी — पूर्वीनवलपरासीको हुप्सेकोट गाउँपालिकामा गत बिहीबारदेखि लागेको ताला अझै खुलेको छैन । त्यसले सेवा प्रभावित भएको छ । प्रमुख प्रशासकीय अधिकृत लिलाबल्लभ न्यौपानेको सरुवा गरिएपछि नयाँ आएका कार्यकारीलाई हाजिर गर्न नदिएको विषयमा विवाद बढ्दै जाँदा उपाध्यक्षको नेतृत्वमा नेकपा कार्यकर्ताले तालाबन्दी गरेका थिए ।

स्थानीयसमेत रहेका प्रमुख प्रशासकीय अधिकृत न्यौपानेलाई राजनीतिक आडमा सरुवा गरेको गाउँपालिकाकी अध्यक्षले लक्ष्मी पाण्डेको आरोप छ। न्यौपाने गृह मन्त्रालयमा सरुवा भएका छन्।


समान्यतया २ वर्ष काम गर्न पाउने नियम रहे पनि न्यौपानेको १० महिनामै सरुवा गराइएको छ। कार्यरत न्यौपानेलाई समय अगावै सरुवा गरी गाउँपालिकामा राजनीति गर्न खोजेको भन्दै अध्यक्ष पाण्डेले न्यौपानेलाई आइतबारसम्म रमाना पत्र दिएकी छैनन्।


रुपन्देहीको तिनाउबाट आएका नयाँ प्रमुख प्रशासकिय अधिकृत ज्ञानुप्रसाद पनेरुहुप्सेकोट गाउँपालिकामा हाजिर हुन आउँदा पहिला नेकपा कार्यालयमा छिरेका भन्दै विवाद झिकिएको छ। 'प्रमुख प्रशासकीय अधिकृत पनेरु हाजिर हुन आउनुभन्दा अघि नेकपा कार्यालयमा छिरेर नेकपाका कार्यकर्तासहित गाउँपालिकामा आए। मैले हाजिर हुन दिइनँ’ गाउँपालिकाकी अध्यक्ष पाण्डले भनिन्।


गृहमन्त्रालय सरुवा गराइएका न्यौपानेले आफूलाई बिनाकारण समयअगावै राजनैतिक आडमा सरुवा गरिएको भन्दै असहमति जनाएका छन्। 'कि पुरस्कृत गर्न पर्‍यो, नत्र सजाय गर्न पर्‍यो,' उनले भने, 'काम गर्दागर्दै राजनैतिक आडमा गरिएको सरुवाले तनाब भएको छ।'


नयाँ प्रमुख प्रशासकीय अधिकृतले आफनो कार्यकक्षमा तोडफोड गरेको भन्दै गाउँपालिका अध्यक्ष पाण्डेले प्रमुख जिल्ला अधिकारीसमक्ष लिखित जानकारी दिएकी छन्।


गाउँपालिका उपाध्यक्ष स्वतन्त्र कोपिला मल्लले नयाँ प्रशासकीय अधिकृतलाई नयाँ रजिस्टरको व्यवस्था गरेर आफ्नो कार्यकक्षमा हाजिर गराएकी छिन्।उपाध्यक्ष मल्लले सरुवा भएर आएका प्रमुख प्रशासकीय अधिकृतलाई गत बिहीबारदेखि आफनो च्याम्बरमा हाजिर गर्ने व्यवस्था गरेर काममा लगाएको जानकारी दिइन्। 'अध्यक्षले लगाउनु भएन मैले काममा लगाएँ' उनले भनिन्, 'कर्मचारीलाई काम गर्न नदिए सेवाग्राही मर्कामा पर्छन्।'


गाउँपालिका अध्यक्ष पाण्डे कांग्रेसबाट र उपप्रमुख मल्ल नेकपाबाट विजयी भएका हुन्। प्रकाशित : फाल्गुन ४, २०७६ १०:५८

प्रतिक्रिया
पठाउनुहोस्
ADVERTISEMENT

तीन गोही मृत अवस्थामा, सात जालमा

रासस

चितवन — राप्ती र नारायणी नदीमा गतवर्ष छाडिएका तीन गोही मरेको अवस्थामा भेटिएका छन् । चितवन राष्ट्रिय निकुञ्ज हुँदै बगेका यी दुई नदी र भङ्गालाहरुमा गरिएको अनुगमनका क्रममा सात  गोही जालमा बेरिएको अवस्थामा समेत फेला परेका छन् । 


निकुञ्जका सहायक संरक्षण अधिकृत वेदबहादुर खड्काका अनुसार नारायणीको गोलाघाट क्षेत्रमा दुईवटा र राप्तीको बाराही होटल नजिकै एउटा गोही मृत अवस्थामा भेटिएको हो। ती गोही मर्नुका कारण पत्ता लगाउन पोष्टमार्टम गर्न अङ्ग पठाइएको छ। उनले भने, 'मर्नुको कारण यहाँ पत्ता नलागे विदेशी विज्ञहरुसँगसमेत परामर्श गर्ने तयारीमा छौँ।' ती तीनै वटा गोही गत साल नदीमा छाडिएका हुन्।

यसअघि यसै वर्ष दुईवटा गोही मरेको अवस्थामा भेटिएको थियो। संरक्षण अधिकृत खड्काका अनुसार भदौमा राप्तीको ढुङ्ग्रे खोलामा पुछर र सेटेलाइट मात्रै फेला परेको थियो। त्यस्तै असोजमा निलडामसहित अमलटारी क्षेत्रमा नारायणी नदीमा एउटा गोही फेला परेको थियो। यी दुवै गोही सेटेलाइट जडान गरी छाडिएका हुन्। मानिसले गोही मारेर खाएको आशङ्का समेत गरिएको जनाइएको छ।

राप्तीमा चारवटा र नारायणीमा तीन गोही जालमा बेरिएको अवस्थामा भेटिएका छन्। ती गोहीलाई नियन्त्रणमा लिएर जाल हटाउने काम आजबाट थालिने निकुञ्जले जनाएको छ। मुखमा बेरिएको अवस्थामा गोही फेला परेका हुन्। अनुगमनका क्रममा नारायणीमा चार वटा र राप्तीमा एउटा भाले गोही फेला परेका छन्।

ती दुई नदीमा भाले गोही नभए पछि बबहीबाट एउटा भाले गोही ल्याइएको थियो। अनुगमनका क्रममा बबहीबाट ल्याइएको समेत तीन ठूला र दुई साना भाले गोही देखिएको उहाँले जानकारी दिनुभयो। यससँगै नदीमा भाले गोहीको अभाव हटेको छ।

निकुञ्जले दुई नदी र भङ्गालालाई १३ भागमा विभाजन गरेर बाह्र वटा टोलीले डुङ्गामार्फत र एउटाले पैदल अनुगमन गरेको थियो। तीन दिनसम्म गरिएको अनुगमन शनिबार साँझ सकिएको हो। अनुगमनमा निकुञ्ज र राष्ट्रिय प्रकृति संरक्षण कोषका विज्ञसहित ६५ जना सहभागी थिए। निकुञ्ज बाहिरको नारायणी नदीको देवघाटदेखि सिख्रौलीघाटसम्म केही दिनमा नै अनुगमन गरिने निकुञ्जले जनाएको छ। नारायणीको भेलौजीमा एउटा डल्फीनसमेत भेटिएको थियो। विश्वबाट नै लोप हुन लागेको घडियाल गोहीलाई निकुञ्जको कसरामा रहेको प्रजनन् केन्द्रमा हुर्काएर विभिन्न नदीमा हालसम्म एक हजार ४६५ वटा गोही छाडिसकिएको छ। ती मध्ये राप्तीमा मात्र ७८५ गोही छाडिएको छ।
निकुञ्जका अनुसार नारायणी नदीमा ३९९, कालीगण्डकीमा ३५, सप्तकोशीमा ९५, कर्णालीमा ४१ र बबहीमा ११० वटा गोही छोडिसकिएको छ। पछिल्ला वर्षहरुमा राप्ती र नारायणीमा मात्रै गोही छाडिने गरिएको छ। यस वर्ष यसै महिनाबाट प्रजनन् केन्द्रमा हुर्काएका गोही नदीमा छाड्ने तयारी गरिएको छ। नदीहरुमा गोही छोड्दै गए पनि सङ्ख्या बढ्दै जान भने सकेको छैन। पछिल्लो गणनाअनुसार राप्तीमा ११८ र नारायणीमा १०१ गोही रहेका छन्।
सन् १९७८ मा प्रजनन् केन्द्र स्थापना भएपछि गोहीका बच्चा हुर्काएर सन् १९८१ बाट नदीमा छोड्न थालिएको हो। नदी प्रदूषण बन्दै जाँदा सङ्कटापन्न अवस्थामा रहेको घडियाल संरक्षणमा चुनौती थपिँदै गएको छ। हरेक वर्ष यी दुई नदी किनारबाट गोहीको अण्डा सङ्कलन गरी प्रजनन् केन्द्रमा कोरलेर हुर्काउने गरिन्छ।

प्रकाशित : फाल्गुन ४, २०७६ १०:२०
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
ADVERTISEMENT
×