मदारबाबा मेलामा भारतीयको घुइँचो 

नारायण शर्मा

पूर्वी नवलपरासी — पूर्वी नवलपरासीको दाउन्ने डाँडामा १० दिनसम्म लाग्ने मदारबाबा मेलामा भारतीय भक्तजनको घुइँचो लागेको छ । गत सोमबारदेखि सुरु मेला महाशिवरात्रिसम्म लाग्छ । 

ZenTravel

सुस्ता गाउँपालिकाको महलबारी बजारबाट पैदल ५ घण्टा उकालोपछि मदारबाबा थान पुगिन्छ । यहाँ जानेमा ९५ प्रतिशत भक्तजन भारतीय छन् । भारतको उत्तर प्रदेश मकनपुरका मुस्लिम धर्मगुरु मदारबाबाले ५ सय वर्षअघि दाउन्ने पर्वतमा आएर तपस्या गरेको स्थललाई मदारबाबा थान ‘मजार’ भनिन्छ । यहाँ हरेक वर्ष माघको कृष्ण पञ्चमीदेखि शिवरात्रीसम्म मेला लाग्ने गर्छ । निःसन्तान, अपांगता भएका र अन्य दुःखकष्टमा परेकाले तपस्या गरेको स्थलमा आएर पूजाआजा गर्नाले मनोकांक्षा पूरा हुने विश्वासका साथ लाखौं भक्तजन यहाँ आउने गरेका छन् । मेला लागेको बेलामा मदारबाबाका चेला आउने र भक्तजनलाई आशीर्वाद दिने गर्छन् ।

Meroghar

सुस्ता गाउँपालिकाको महलबारीमा मस्जिद छ । त्यहाँबाट पैदल हिँडेर मदारबाबा थान पुगिन्छ । तपस्या गरेका मुस्लिम धर्मगुरुले मदारको (चोप भएको रूख) दूध खान्थे भन्ने विश्वास गरिन्छ । त्यसैले उनलाई मदारबाबा भनिएको किंवदन्ती छ । मुस्लिमको मजार भए पनि हिन्दू र मुस्लिम दुवैले उत्तिकै श्रद्धा गर्छन् । भारतको दिल्ली, लखनउ, कानपुर, वाराणसीलगायत क्षेत्रबाट लाखौं भक्तजन वर्षेनि मजारमा आउने गरेका छन् । तराईका जिल्लाबाट पनि उत्तिकै भक्तजन आउँछन् ।

मेलाको आम्दानी अपारदर्शी
दशौं लाख भक्तजन आउने भए पनि यस मेलाको व्यवस्थापनमा कसैले जिम्मेवारी लिएको छैन । मेलामा प्रहरी र स्वयंसेवकको उपस्थिति न्यून छ । मेलाको आम्दानी पनि पारदर्शी छैन । मदारथानमा चढाइने भेटी कसले लिने गरेको छ भन्ने पनि यकिन छैन । केही समूह मेलाको बेलामा दानभेटी लिन सक्रिय हुने गरेका छन् ।

मेलाको प्रवेशद्वार ५ नम्बर प्रदेशको सुस्ता गाउँपालिकाको महलबारी र मदारबाबास्थान गण्डकी प्रदेशको विनयी त्रिवेणी गाउँपालिकाको वडा–१ र ६ मा पर्छ । यसपटक वडा नं. ६ ले मेला व्यवस्थापनको जिम्मेदारी पाएको छ ।

विनयी त्रिवेणीका अध्यक्ष डम्बर जिसीले मदारबाबा संरक्षण समिति गठन गरेर पहिलोपटक काम थालिएको जानकारी दिए । उनले सयौं वर्षदेखि मेला लाग्दै आए पनि आम्दानीबारे जानकारी नभएको बताए । मेलाका लागि जिल्ला प्रशासन कार्यालय पूर्वी नवलपरासीले विशेष सुरक्षाको व्यवस्था गरेको छ । मेला अवधिमा ५ सयभन्दा बढी प्रहरी परिचालन गरेको प्रहरीले जानकारी दिएको छ । भारतीय सीमासँग जोडिएको त्रिवेणी बजार नजिक भएका कारण यहाँ भारतबाट भक्तजन आउने स्थानीय हैदरअलि मोमिनले बताए । मदारबाबा थानमा पुग्न सहज बाटो छैन । भक्तजन जंगल हुँदै पैदलै उक्त स्थानमा पुग्ने गरेका छन् ।



प्रकाशित : फाल्गुन १, २०७६ १०:२३
प्रतिक्रिया
पठाउनुहोस्
ADVERTISEMENT

कुबेतमा मृत्यु हुने ६ नेपाली कामदारमध्ये ४ को पहिचान खुल्यो [अपडेट]

कान्तिपुर संवाददाता

काठमाडौँ — कुवेतमा बालुवाको ढिस्कोले पुरिएर मृत्यु भएका ६ जना नेपाली कामदारको ४ जनाको पहिचान खुलेकाे छ ।

ढिस्कोले पुरिएर मृत्यु भएकामध्ये पहिचान हुनेहरु एक बहादुर गाहा–पाल्पा, गंगाराम चाैधरी–सिराहा, बसन्त गुरुङ–ताप्लेजुङ र श्याम नारायण चाैधरी–दाङ हुन्। कुवेतस्थित नेपाली राजदूतावासले प्रेस विज्ञप्ति जारी गर्दै पहिचान हुनेरुकाे विवरण सार्वजनिक गरेकाे हाे।


अरब टाइम्सले जनाएअनुसार कुवेतको अल मुत्ला क्षेत्रमा निर्माणस्थलमा बालुवाको ढिस्को खस्दा ६ जना नेपाली कामदारको मृत्यु भएको हो।

चिनियाँ कम्पनीले निर्माणको जिम्मा लिएको मुत्ला सिटी प्रोजेक्टको निर्माणस्थलमा काम गरिरहँदा एक्कासि बालुवा र ढुंगा खसेको थियो। ढिस्कोमा पुरिएकामध्ये ६ जनाको सकुशल उद्धार गरिएको कुवेती अधिकारीले जनाएका थिए।

कुवेतको भौतिक मामिलासम्बन्धी मन्त्री राना अल फरिसले घटनाको अनुसन्धान गर्न छानबिन समिति गठन गर्न निर्देशन दिएकी छिन्। उनले दुर्घटनाको कारण पत्ता लगाइ दोषीलाई कारबाहीको दायरामा ल्याउन पनि निर्देशन दिएकी छिन्।

दूतावासबाट यस घटनाबारे स्थलगत अध्ययन भइरहेकाे छ।

प्रकाशित : फाल्गुन १, २०७६ ०९:५१
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
×