एउटै शाखामा २ जना हाकिम

आश गुरुङ

लमजुङ — मर्स्याङ्दी गाउँपालिका ३, खुदीस्थित खुदी स्वास्थ्य चौकीका प्रमुख परमेश्वर पिया स्थानीय तह गठनपछि २०७४ असारमा बेंसीसहर नगरपालिकाको स्वास्थ्य शाखामा काज सरुवा भएर आए ।

ZenTravel

उनले स्वास्थ्य शाखाको संयोजकको जिम्मेवारी सम्हाले। स्वास्थ्य कार्यालयमा कार्यरत मनोजसिंह बोहराले समायोजनमा बेंसीसहर नगरपालिका रोजे। उनी दशैंताका नगरपालिकाको स्वास्थ्य शाखा संयोजक भएर आए। समायोजनमा सुन्दरबजार नगरपालिकामा पर्‍यो। नरोजेको नगरपालिकामा पठाएको भन्दै उनले बेंसीसहर नगरपालिकाको स्वास्थ्य शाखा प्रमुखको कुर्सी छोडेका छैनन्। नगरपालिकाको वेबसाइटमा स्वास्थ्य शाखा संयोजकमा पियाकै नाम छ।

दुवैजना जनस्वास्थ्य अधिकृत (सातौं तह) का कर्मचारी हुन्। सुन्दरबजार नगरपालिकामा समायोजन भएका पियाले स्वास्थ्य कार्यालयमा रहेको पत्र बुझेका छैनन्। ‘समायोजनमा मैले बेंसीसहर रोजेको हुा। मलाई सुन्दरबजार पठाएपछि गुनासो भरेको छु। बेंसीसहर नै कायम गरी पाउँ भनेको छु’, पियाले भने। उनले तलब खुदी स्वास्थ्य चौकीबाट लिइरहेका छन्। उनी प्रमुखको कुर्सीमा बसेर ल्यापटपमा काम गरिरहेका छन्। बोहरा उनकै छेउमा डेस्कटपमा काम गरिरहेका छन्। हस्ताक्षर भने बोहराको चल्ने गरेको छ।

एउटै कार्यालयमा २ जना संयोजक भएपछि मातहातका कर्मचारी अन्यौलमा परेका छन्। स्वास्थ्यको काम सन्तोषजनक रुपमा नभएको टिप्पणी नगरपालिकामा चल्न थालेको छ। ‘दुवैजनाले आ–आफ्नो काम गर्ने हो। दाइले छोड्नु भएको छैन’, बोहराले भने। गुनासो सम्बोधन नभएसम्म कार्यालयमै बस्ने पियाले बताए। ‘मेरो गुनासो सम्बोधन हुनुपर्छ। मैले बेंसीसहर नगरपालिका नै रोजेपछि म कहाँ अन्त जाने’, उनले भने।

नगरपालिकाले आयोजना गर्ने, सरकारी तथा गैरसरकारी कार्यालयले आयोजना गर्ने कार्यक्रममा कहिलेकाहीँ दुवैजना पुग्ने गरेका छन्। कसलाई आसन ग्रहण गर्न लगाउने भन्ने विषयमा आयोजकलाई समस्या पर्ने गरेको छ। कहिलेकाहीँ एकजना पनि पुग्दैनन्।

नगरपालिका प्रमुख गुमानसिंह अर्यालका अनुसार छोड्नेले नछोड्दा समस्या भएको छ। ‘कार्यालयमा प्रमुख भनेर २ जना भएपछि स्वास्थ्यको काम हुन सकेको छैन’, उनले भने। मन्त्रालयले आवश्यकताभन्दा बढी कर्मचारी पठाएर समस्या उत्पन्न गराएको उनले बताए। ‘७ जना चाहिने ठाउँमा ८ जना पठाएको छ। ८ जना नै राख भनेको छ। आवश्यकताअनुसार पो पठाउने हो त’, उनले भने, ‘बढी पठाएर तनावमात्रै दिएको छ।’

प्रकाशित : पुस १०, २०७६ ०९:२२
ADVERTISEMENT
प्रतिक्रिया
पठाउनुहोस्
ADVERTISEMENT

दुराडाँडामा ‘कृषि क्रान्ति’

३ सय रोपनीमध्ये १ सयमा अत्याधुनिक इजरायली प्रविधि प्रयोग गरी तरकारी र फलफूल खेती । बाँकीमा पनि कृषिकर्म गर्ने योजना ।  
आश गुरुङ

(लमजुङ) — इजरायली अन्तर्राष्ट्रिय सहयोग नियोगका प्रमुख गिल हास्केल लमजुङको सुन्दरबजार नगरपालिका ३, दुराडाँडाक्षेत्र चन्द्रेश्वर जल्केनीफाँट आए । यहाँ इजरायलमा कृषि विज्ञान पढेर फर्केकालगायतका युवाले आराभा नेपाल मोर्डन एग्रिकल्चर कम्पनी खोलेर ३ सय रोपनीमा एकीकृत कृषि फार्म स्थापना गरेका छन् । यसमा इजरायली अत्याधुनिक प्रविधिमार्फत कृषि कर्म गरिएको छ ।

इजरायलमा कृषि विज्ञान पढेर आएका नेपाली युवाले गरेको एकीकृत कृषि फार्मको अध्ययन अवलोकनपछि उनले भने, ‘साँच्चिकै युवाले चाहेमा कृषिमा क्रान्ति नै ल्याउने रहेछन् ।’ जल्केनी फाँटमा इजरायलमा कृषि विज्ञान पढेर फर्किएका ६८, इजरालमा रहेका नेपाली एनआरएन २४ र नेपालमै विभिन्न क्षेत्रमा रहेका युवा गरी १ सय ३२ जनाले सञ्चालन गरेको एकीकृत कृषि फार्म हेर्न गिल हास्केलमात्रै नभएर नेपालका लागि इजरायली राजदूत बेनी ओमेर इजरायलका लागि नेपाली राजदूत डा.अन्जान शाक्य, नेपाली सेना जंगी अड्डाका बलाध्यक्ष रथी (लेफ्टिनेन्ट जर्नल) गौरव तन्डुल, कुषि तथा पशुपन्छी विकास मन्त्रालयका सहसचिव डा.राजेन्द्र मिश्र, परराष्ट्र मन्त्रालयका उपसचिव सुरेश अधिकारी, लोकगायिका बिमाकुमारी दुरा, सीटीईभीटी बालाजु प्राविधिक शिक्षालयका प्राचार्य निर्मल न्यौपानेलगायत आएका हुन् ।

इजरायलमा कृषि विज्ञान पढेर फर्केकालगायत ३८ जिल्लाका युवाले आराभा नेपाल मोर्डन एग्रिकल्चर कम्पनी लिमिडेट खोलेर उनीहरूले ३ सय रोपनीमा एकीकृत कृषि फार्म स्थापना गरेका छन् । यसमा इजरायली अत्यधुनिक प्रविधिमार्फत कृषि कर्म गरिएको छ । आराभाका संस्थापक अध्यक्ष विनोद घिमिरेका अनुसार फार्ममा दैनिक ४३ कामदारले काम गर्छन् । उनका अनुसार १ सय रोपनीमा अत्याधुनिक इजरायली प्रविधि प्रयोग गरी तरकारी तथा फलफूल खेती गरिएको छ । ३० हजार लेयर्स तथा ब्रोइलर कुखुरा पाल्दै आएको छ । १ सय २ वटा दुधालु गाई पाल्न गोठ निर्माण गरिएको र गाई ल्याउन सुरु गरिएको उनले बताए । १५ रोपनीमा माछा पाल्न पोखरी खनिएको छ । फागुनमा माछा राखिने उनले बताए । ३ सय बाख्रापालन, ५० वटा बंगुरपालन, ५ रोपनीमा हाँस र लोकल कुखुरापालन लगायत गरिने आराभाका संस्थापक अध्यक्ष घिमिरेले बताए ।

आफ्नै फार्म तथा स्थानीय समुदायसहितको सहभागितामा सुन्दरबजार नगरपालिका–९, भोटेओडारमा एएनएमसी डेरी उद्योग सञ्चालन गरिएको घिमिरेले बताए । उनका अनुसार हालसम्म १८ करोड लगानी भइसकेको छ । कूल ३२ करोडको योजना रहेको उनले बताए । आराभाका अध्यक्ष कृष्णप्रसाद बजगाइँका अनुसार पञ्चर्षीय योजना अनुरुप अघि बढेको र अहिले ३ बर्ष पुगेको बताए । ‘हामी २ वर्षमा हाम्रो फार्म कम्प्लिट गर्छौं,’ उनले भने । फार्ममा ५ लाखदेखि १५ लाख रुपैयाँसम्म लगानी गरेका छन् ।

मसावका प्रमुख गिल हास्केलले इजरायली प्रविधिमार्फत नेपालमा गरिएको कृषि कर्मलाई सक्दो सहयोग गर्ने बताए । ‘जो नेपालबाट इजरायल गएर कृषि पढ्नुभो । यहाँ कृषिको क्रान्ति सुरुवात गर्नुभयो । हामी सहयोग गर्न तयार छौं । यसैको अध्ययन अवलोकनका लागि हामी आएका हौं,’ मंगलबार अवलोकन भ्रमणमा आएका उनले भने । इजरायली राजदूत बेनी ओमेरले इजरायली अत्यधुनिक प्रविधिमार्फत नेपालमा कृषि कर्म गर्ने र चाहनेका लागि सहयोग गर्न तत्पर रहेको बताए । नेपाली राजदूत अन्जान शाक्यले बढी भन्दा बढी युवालाई कृषि पढ्न र सिक्न इजरायल ल्याउन इजरायल सरकारसँग आग्रह गरिने बताइन् । ‘हामी जहाँ सिके पनि कर्म भनेको आफ्नै ठाउँमा आएर गर्नुपर्छ,’ उनले भनिन् ।

आराभाले सञ्चालन गरेको एकीकृत कृषि फार्मममा नेपाली सेनाले सैनिक कल्याणकारी कोषद्वारा सञ्चालन गरेको कृषि तालिम केन्द्रले प्रयोगात्मक अभ्यास गर्दै आएको छ । सुन्दरबजार नगरपालिका–९, सिउँडीबारमा नेपाली सेनाले नेपाली सेना व्यवसायी कृषि तथा पशुपालन तालिम केन्द्र सञ्चालन गरिरहेको छ । उक्त तालिमस्थल हेर्न नेपाली सेना जंगी अड्डाका लेफ्टिनेन्ट जर्नल गौरव तन्डुलसमेत एकीकृत फार्म हेर्न आएका हुन् । सुन्दरबजार नगरपालिका प्रमुख जनकराज मिश्रले युवाले गरे सबथोक सम्भव छ भन्ने उदाहरण इजरायलमा पढेर फर्केका युवाले देखाएको बताए ।

आधुनिक कृषि प्रणालीबारे अध्ययन गर्न इजरायल पुगेका युवाले इजरायलको आराभा भन्ने स्थानको नामबाट कम्पनी स्थापना गरेर एकीकृत कृषि फार्म सञ्चालन गरेका हुन् । यसको पूर्वाधारदेखि सबैखाले निर्माणमा उनीहरू आफैं जुटेका हुन् । ‘मरुभूमिमा हरिया तरकारी फलाउन सकिने प्रविधि हामीले सिकेका छौं,’ संस्थापक अध्यक्ष घिमिरेले भने, ‘त्यहींको प्रविधि अपनाउँदै नेपालमा कृषि परियोजना सञ्चालन गरेका छौं ।’ उत्पादित वस्तुको बजार पोखरा र काठमाडौं साथै लमजुङ रहेको उनले बताए ।

प्रकाशित : मंसिर २७, २०७६ १०:१५
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×