हिउँले ढाकेपछि लाप्राक बस्ती पुननिर्माण रोकियो- गण्डकी - कान्तिपुर समाचार
कान्तिपुर वेबसाईट
AdvertisementAdvertisement

हिउँले ढाकेपछि लाप्राक बस्ती पुननिर्माण रोकियो

हरिराम उप्रेती

गोरखा — हिउँले ढाकेपछि धार्चे गाउँपालिका–४ लाप्राकस्थित गुप्सीपाखामा निर्माणाधिन एकिकृत नमुना बस्ती पुननिर्माणको काम रोकिएको छ ।

गैरआवासीय नेपाली संघ (एनआरएनए)ले लाप्राकका पाँच सय ७३ स्थानीयका लागि गुप्सीपाखामा घर निर्माण गरिरहेको छ । शुक्रबार बिहानबाट काम रोकिएको एनआरएनएका साइट म्यानेजु लक्ष्मण अर्यालले बताए । यो वर्ष पहिलो पटक हिउँ परेर काम रोकिएको अर्यालको भनाइ छ ।


बिहानदेखि लगातार हिमपात हुँदा निर्माणाधिन एकिकृत बस्ती हिउँले ढाकेको र काम गर्न नसकिएको उनले बताए । उनले भने, ‘बिहान फुस फुस मात्र थियो, १० बजेबाट लगातार हिउँ परेर १५/२० सेन्टिमिटर जमिसक्यो ।’ हाल एनआरएनएका ८० कामदार लाप्राक बस्ती पुननिर्माणमा खटिएका छन् । ‘घरका काम ९० प्रतिशत सकिसकेका थियौँ, शौचालय निर्माणको ६० प्रतिशत प्रगति छ,’ उनले भने, ‘अब काम गर्न सकिएन, कामदारहरु पनि फर्कन थालेका छन्, चिसोले बिरामी परे रेस्क्यू गर्न पनि गारो हुन्छ ।’


त्यस्तै उत्तरी गोरखामा पनि शुक्रबार बिहानैबाट हिमपात जारी छ । चुमनुब्री गाउँपालिका–१ सामागाउँमा यस वर्ष पहिलो पटक शुक्रबार बिहान हिमपात भएको स्थानीय मिङमार लामाले बताए । हिउँ परेसँगै चिसो बढेको उनले टेलिफोन कुराकानीमा बताए । ‘करिब पाँच इन्च जति हिउँ जमेको छ,’ लामाले भने ।


शुत्रबार साँझसम्म नै हिउँ परिरहेको र हिमपात जारी रहेको जनजिवन अझै कष्टकर बन्ने भन्दै स्थानीयले चिन्ता जनाएका छन् । चुमनुब्री गाउँपालिका अन्तर्गत साम्दो, छेकम्पार र चुम्चेतको उपल्लो भेगमा पनि हिमपात भएको स्थानीयहरुले बताए । छेकम्पारमा हिउँ परेसँगै प्रहरी इकाइमा समेत टेलिफोन सम्पर्क हुन नसकेको डिएसपी मित्रवन्दु शर्माले बताए । छेकम्पारमा शुक्रबार दिउँसैबाटै फोन सम्पर्क विच्छेद भएको छ ।

प्रकाशित : मंसिर २७, २०७६ १९:४६
प्रतिक्रिया
पठाउनुहोस्

तातोपानी भन्सार प्रमुख बस्नेतमाथि १० करोड भ्रष्टाचारको मुद्दा

कृष्ण ज्ञवाली

काठमाडौँ — अख्तियार दुरुपयोग अनुसन्धान आयोगले तातोपानी भन्सार कार्यालयका प्रमुख कृष्णबहादुर बस्नेत विरुद्ध गैरकानूनी सम्पत्ति आर्जन गरेको अभियोगमा १० करोड ५६ लाख रुपैंयाको भ्रष्टाचार मुद्दा दायर गरेको छ । अर्थ मन्त्रालयका उपसचिव बस्नेतमाथि आफ्नो र जेठानको नाममा सम्पत्ति लुकाएको आरोप छ । अख्तियारले उनीमाथि १७ लाख रुपैंया घुस लिएको आरोपमा अर्को मुद्दासमेत दायर गरेको छ ।

बस्नेतमाथि मुद्दा जाने निश्चित भइसकेपछि केही दिनअघि अर्थ मन्त्रालयले बस्नेतलाई तातोपानी भन्सारबाट मन्त्रालयमा तानेको थियो । बस्नेतले ९ करोड २१ लाख रुपैंया संखुवासभाको खाँदवारीमा बस्ने जेठान नविनकुमार गौलीको खातामा लुकाएको आरोप लगाएको छ । बस्नेतले आफ्नो नाममा लुकाएको १ करोड ३५ लाख रुपैंयासमेत गैरकानुनी भएको अख्तियारको दावी छ ।

२०४५ सालमा लेखापाल भएर सेवा प्रवेश गरेका बस्नेत अहिले उपसचिव छन् । विभिन्न स्रोतबाट १ करोड ७८ लाख रुपैंया आर्जन गरेका उनले त्यसको ६ गुणा बढी रकम गैरकानुनी आर्जन गरेको अख्तियारको दावी छ । आफ्नै खाताबाट उनले ३ करोड १३ लाख खर्च गरी एक करोड ३५ लाख अस्वाभाविक आर्जन गरेको पुष्टि गरेको अख्तियारको दावी छ ।

भन्सार छुटाउने क्रममा व्यापारी, व्यवसायी र भन्सार एजेन्टसँग घुस लिएको उजुरीमाथि छानविन हुदा बस्नेतले उक्त रकम जेठान नविनकुमार गौलीको खातामा लुकाएको अख्तियारको भनाई छ । अनि जेठानले खरिद गरेको सम्पत्ति बस्नेतले बकसको रुपमा लिने गरेको अख्तियारको दावी छ । उनीहरुको जग्गा, होटल व्यवसाय र अन्यत्र पनि लगानी रहेको अख्तियारले जनाएको छ ।

अख्तियारका अनुसार बस्नेत विराटनगर भन्सारमा काम गरेको अवधिमा गौलीले खाँदवारी वरपर सय रोपनीभन्दा बढी जग्गा खरिद गरेका थिए भने अन्यत्र पनि लगानी फैलाए । अख्तियारले बस्नेतका साथै उनकी श्रीमती सविता गौली, जेठान नविनकुमार गौली र नविनकी श्रीमती सकुन्तला गौली र छोरा शुलभ गौली विरुद्धसमेत मुद्दा चलाएको छ ।

उपसचिव बस्नेतको सम्पत्ति छानविनको क्रममा उनको खातामा १७ लाख रुपैंया जम्मा भएको खुल्यो । जम्मा गर्नेमाथि छानविन हुदा विदेशबाट सामान ल्याउने व्यवसायीले भन्सार छुटाउने प्रयोजनका लागि घुस बुझाएको बयान दिए ।

त्यो रकम पछि उनका जेठान गौलीको खातामा सारिएको खुल्यो । अख्तियारले बस्नेत र गौलीमाथि १७ लाख रुपैंया घुस खाएको अभियोगमा समेत शुक्रवार नै विशेष अदालतमा मुद्दा चलाएको छ ।

प्रकाशित : मंसिर २७, २०७६ १९:४३
पूरा पढ्नुहोस्
प्रतिक्रिया
पठाउनुहोस्
×