कान्तिपुर वेबसाईट
AdvertisementAdvertisement

चर्चामै सीमित व्यास पराशर क्षेत्र

सम्झना रसाइली

तनहुँ — चार वेद अठार पुराणका रचयिता महर्षि वेदव्यासको २८औं अवतरण दमौलीमा भएको बताइन्छ । व्यास पराशर क्षेत्रको रूपमा परिचित यस क्षेत्रलाई अनादि वैदिक सनातन धर्मको उद्गमस्थलका रूपमा विकास गर्न भन्दै विभिन्न धार्मिक कार्यक्रम हुँदै आएका छन् ।

यस क्षेत्रको विकास र प्रवर्द्धन गरी धार्मिक पर्यटनको आकर्षक गन्तव्यका रूपमा विकास गर्ने भन्दै जनप्रतिनिधिले पनि निकै लोभलाग्दा भाषण गर्छन् । ती भाषण व्यावहारिक रूपमा अझै पनि कार्यान्वयनमा आउन सकेका छैनन् । व्यास क्षेत्रको पहिचान र प्रवर्द्धनका लागि व्यास पराशर क्षेत्र विकास कोषले व्यास ऋषिको १०८ फिट अग्लो मूर्ति निर्माण गर्ने कार्यक्रम अगाडि बढाए पनि आवश्यक बजेट व्यवस्थापन हुन नसक्दा यो चर्चामै सीमित छ ।


व्यास–३ स्थित शिव पञ्चायन मन्दिर क्षेत्रमा निर्माण गर्न लागिएको व्यास मूर्तिसहित सबै संरचनाका लागत करिब ६२ करोड ८५ लाख ५ हजार रुपैयाँ बजेट अनुमान गरिएको छ । तर बजेट व्यवस्थापन कसरी गर्ने भन्ने अन्योलमा रहेको समितिका अध्यक्ष अशोककुमार श्रेष्ठले बताए । ‘समितिसँग जम्मा ५० लाख रुपैयाँ मात्र बजेट छ,’ उनले भने, ‘थप बजेट कसरी व्यवस्थापन गर्ने भन्नेमा अन्योल छ ।’


बजेट अभावका कारण मूर्ति निर्माणलगायत अन्य भौतिक पूर्वाधारका काम अगाडि बढ्न नसकेपछि कोषले यस विषयमा जनप्रतिनिधिसँग परामर्श कार्यक्रम आयोजना गरेको थियो । कार्यक्रममा तनहुँ क्षेत्र २ बाट निर्वाचित संघीय सांसद केदार सिग्देलले मूर्ति निर्माणको अगुवाइ कोषले नै गर्नुपर्ने र बजेट जुटाउन जनप्रतिनिधिले सहयोग गर्ने बताए ।


उनले भने, ‘मूर्ति निर्माण भएसँगै व्यास क्षेत्रको मात्र नभई जिल्लामै पर्यटन प्रवर्द्धनको सम्भावना रहेको हुँदा मूर्तिसँगैका संरचना निर्माण क्रममा लाग्ने बजेट जुटाउन जिल्लावासी, राजनीतिक दल, जनप्रतिनिधिलगायतले आफूले सक्दो सहयोग गर्नुपर्छ ।’ गण्डकी प्रदेशसभा सदस्य डोबाटे विकले मूर्ति निर्माणको दायित्व सबैको भएकाले प्रदेश सरकारका तर्फबाट बजेट विनियोजन गराउन आफूले पहल गर्ने बताए ।


संघीय सांसद कलिला खान, प्रदेश सांसद सरिता गुरुङ, जिल्ला समन्वय समितिका प्रमुख शान्तिरमण वाग्ले, व्यास नगरपालिकाका प्रमुख वैकुण्ठ न्यौपानेलगायतले मूर्ति निर्माणका लागि बजेट जुटाउन सबै एकजुट भएर लाग्नुपर्नेमा जोड दिएका थिए । विस्तृत परियोजना प्रतिवेदनले मूर्ति र स्तम्भ निर्माणका लागि मात्रै ३४ करोड १६ लाख ७६ हजार रुपैयाँ लाग्ने अनुमान गरेको छ । अन्य संरचना निर्माणका लागि २८ करोड ६८ लाख २८ हजार रुपैयाँ लाग्ने अनुमान छ ।


व्यासमूर्ति निर्माणका ३० हजार किलो तामा आवश्यक पर्ने अनुमान छ । स्तम्भभित्र संग्रहालय र पुस्तकालय हल प्रस्ताव गरिएको छ । १०८ फिटको मूर्ति निर्माणको दायित्व व्यास नगरपालिकाको मात्रै नभई जिल्लाका सबै स्थानीय तह र स्थानीयवासीको पनि जिम्मेवारी रहेकाले सबैले सहयोग गर्नुपर्ने समितिका अध्यक्ष श्रेष्ठले बताए ।

प्रकाशित : मंसिर २३, २०७६ १२:४१
प्रतिक्रिया
पठाउनुहोस्

एउटै कार्यालयमा २ प्रमुख

आश गुरुङ

लमजुङ — बेंसीसहरस्थित घरेलु तथा साना उद्योग विकास समिति कार्यालयमा दुई प्रमुख रहेका छन् । एक जना संघीय सरकारअन्तर्गतका प्रमुख हुन् भने अर्कालाई प्रदेशले खटाएको हो । दुवै प्रमुखले ६ महिनायता तलब पाएका छैनन् ।

समायोजन रोजेको ठाउँमा नभई सरकारले अन्यत्रै खटाएको भन्दै घरेलुका प्रमुख उद्योग अधिकृत मणिराम नेपाल कार्यालयकै प्रमुख भएर बसेका छन् । प्रदेश सरकारले घरेलुको अधिकृतका रूपमा खटाएका तोपलाल भुसाल पनि कार्यालय प्रमुखको रूपमा छन् । संघीय सरकार मातहतको घरेलु तथा साना उद्योग विकास समितिको कार्यालयलाई प्रदेश सरकारअन्तर्गत घरेलु तथा साना उद्योग कार्यालय बनाइएको छ ।

दुवै कार्यालय प्रमुखलाई कार्यालय सञ्चालन तथा योजना अघि बढाउन अख्तियारी दिइएको छैन । नेपाल बिदा लिएर एक सातादेखि काठमाडौंमा छन् । मागेको ठाउँमा नदिएपछि उनी मुद्दा मामिलामा छन् । प्रदेशले खटाएका भुसाल भने अख्तियारीका लागि प्रदेश मन्त्रालयमा दौडधुप गरिरहेका छन् । भुसाल साउन १५ देखि कार्यालयमा हाजिर गरिरहेका छन् ।
नेपालका अनुसार सरकारले पहिले ७ सय ५३ स्थानीय तह रोज्न भनेको थियो । पछि निजामती मात्रै दिइयो । घरेलु विकास समितिका कर्मचारीलाई ४८ जिल्लाभित्रका स्थानीय तहमा मात्रै समायोजन हुन भनी मन्त्रिपरिषद्को बैठकले २०७६ जेठ १३ गते निर्णय गर्‍यो ।

‘मैले आफू समायोजन हुन पाऊँ भनी १६ स्थानीय तह छनोट गरें । तर मलाई रामेछापको मन्थली नगरपालिकामा समायोजन गरियो,’ उनले भने, ‘मजस्ता घरेलुका कर्मचारीले मागेको ठाउँमा समायोजन हुन पाएनौं । त्यसैले हामी समितिका कर्मचारीले सर्वोच्चमा मुद्दा हालेका छौं ।’

सर्वोच्चले साउन १ मा यसअघिको कार्यालयमै यथावत् काम गर्न ‘स्टे अर्डर’ जारी गरेपछि कर्मचारी कार्यालयमै हाजिर गरिरहेका छन् । सर्वोच्चले समयमै फैसला नगर्दा कर्मचारी मर्कामा परेको नेपालले बताए । ‘न हामी काम गर्न पाएका छौं, त तलब पाएका छौं । अब पुस ६ मा सर्वोच्चमा पेसी छ,’ उनले भने ।

कार्यालयकै लेखापाल उद्धव पराजुलीले समायोजनमा जान झापाका लागि फर्म भरेकोमा लमजुङकै मध्यनेपालमा पारिएको बताए । उनले पनि साउनयता तलब पाएका छैनन् । अन्य कर्मचारी भने समायोजनमा गइसकेका छन् । भुसालले अख्तियारीका लागि पोखरा रहेको बताए ।

‘अख्तियारी पाएको छैन । साउनदेखि तलब खाएको छैन । अरू कर्मचारी पनि खटाएको छैन,’ उनले भने । उनले लेखा, प्रशासन, कार्यालय सहयोगीलगायत ७ कर्मचारीको दरबन्दी तोकेको बताए । ‘भदौ ११ मा यसअघिको समितिलाई कार्यालयको रूपमा स्थापना गर्‍यौं । यो अब सम्पूर्ण रूपमा प्रदेशअन्तर्गतको कार्यालय हो,’ उनले भने ।

कार्यालय प्रमुख दुवै जना भएपछि कार्यकक्षमा बस्न दुवैलाई समस्या परेको छ । एउटा छोडेर जाने कार्यालय प्रमुख र अर्को खटाएको प्रमुख भएपछि दुवै जना अन्योलमा परेका छन् । कार्यालयको आधिकारिक मोबाइल नम्बर प्रमुख उद्योग अधिकृत नेपालले नै प्रयोग गरिरहेका छन् । प्रदेश सरकारको अख्तियारी पाएपछि उक्त मोबाइल आफूले प्रयोग गर्न पाउने भुसालले बताए ।

प्रकाशित : मंसिर २३, २०७६ १२:३५
पूरा पढ्नुहोस्
प्रतिक्रिया
पठाउनुहोस्
×