तिब्बतका मुख्यमन्त्री पोखरामा

कान्तिपुर संवाददाता

गण्डकी — भ्रमण वर्ष सन् २०२० लाई सफल बनाउने उद्देश्यले गण्डकी प्रदेश र नेपाल सरकारको विशेष निमन्त्रणामा चीनको तिब्बत प्रदेशका जनसरकार प्रमुख (मुख्यमन्त्री) शीतला पोखरा आएका छन् । शीतलासहित १६ जनाको चिनियाँ टोली सोमबार पोखरा आएको हो ।

ZenTravel

शीतलाले मंगलबार पोखराको सराङ्कोट पुगेर पाराग्लाइडिङको अवलोकन गरे । सराङ्कोटबाट हिमालको दृश्यालोकन गर्दै फेवातालको सुन्दरतामा रमाए । उनले डेढ घण्टासम्म फेवातालमा डुंगा सयर गरेका थिए । मुख्यमन्त्री शीतलालाई पोखराको लेकसाइडमा ढाकाटोपीले स्वागत गरिएको थियो ।

Meroghar


गण्डकी प्रदेश सरकारका प्रवक्ता रामशरण बस्नेत र प्रदेशसभा सदस्य राजीव पहारीले स्वागत गर्दै पोखरा भ्रमणमा रमाएका हुन् । ‘हाम्रो निमन्त्रणा स्वीकार गरेर भ्रमण वर्ष मनाउनकै लागि नेपाल आउनुभएको हो,’ पहारीले भने, ‘सोही क्रममा पोखरा पनि आउनुभएको हो ।’ पहारीका अनुसार चीन र नेपालको दुई प्रदेश प्रमुखले मंगलबार साँझ भेटवार्तासमेत गरेका छन् । गण्डकी प्रदेशका मुख्यमन्त्री पृथ्वीसुब्बा गुरुङले शीतलालाई गण्डकी प्रदेशका बारेमा जानकारी गराएका थिए । सोही क्रममा दुई प्रदेशबीचको मित्रता र सहकार्य कसरी गर्ने भन्ने विषयमा पनि छलफल चलेको पहारीले जानकारी दिए ।

भेटवार्ताको क्रममा शीतलाले दुई प्रदेशबीच सहकार्य गर्न आफू पनि इच्छुक रहेको बताएका छन् । उनले गण्डकीलाई आफूले गर्न सक्ने सहयोग गर्ने प्रतिबद्धता पनि जनाए ।

प्रकाशित : मंसिर १८, २०७६ १०:१८
प्रतिक्रिया
पठाउनुहोस्
ADVERTISEMENT

लागूऔषध मुद्दा खेप्नेमा ८६% युवा

सन्तोष सिंह

(धनुषा) — धनुषाधाम नगरपालिका–४ उमाप्रेमपुरका २३ वर्षीय चन्देश्वर महतो एमबीबीएसको दोस्रो वर्षका विद्यार्थी हुन् । डाक्टरी पढ्न इच्छा नहुँदै अभिभावकको करकापमा उनी एमबीबीएस पढ्न बाध्य भए । पढाइमा मन नलागेपछि उनीमा लागूऔषध सेवनको लत लाग्यो । 

मंसिर ३ मा धनुषाको धनौजीबाट ठूलो परिमाणको लागूऔषधसहित पक्राउ परेका महतोले डिप्रेसन हटाउन लागूऔषधको भर परेको प्रहरीलाई बयानमा बताए । जनकपुरको कदम चोकमा बस्ने उनलाई दालमोटको प्याकेट र जुत्तामा लुकाएको १५ सय थान नाइट्रोभेट ट्याबलेटसहित पक्राउ गरी प्रहरीले मुद्दा चलाएको छ । जिल्ला अदालत धनुषामा उनको यो प्रकरण सुनुवाइ प्रक्रियामा छ । धनुषाका प्रहरी निरीक्षक उमाशंकर साहले टिनएजरमा लागूऔषध सेवनको लत डरलाग्दो बढेको बताए ।

धनुषामा नेपाल–भारत सीमा जोड्ने जयनगर, इनर्वा, हरिणे, जटही, मधवापुर नाकामा पुगेर लागूऔषध सेवन र खरिद गरी ल्याउने युवा जमात बढ्दो छ । लागूऔषध सेवनकर्तामाथि निगरानी बढाए पनि सुधार नभएको सशस्त्र प्रहरीका निरीक्षक रञ्जित तिवारीले बताए ।

लागूऔषध नियन्त्रणका लागि प्रहरीले अपनाएको उपायलाई छल्न कारोबारीले नयाँ जुक्ति अपनाउँदा सीमा क्षेत्रमा खटिएका प्रहरी बेलाबेला झुक्किन्छन् । धनुषामा लागूऔषध ओसारपसार एवं सेवन मुद्दामा रहेकामध्ये ८६ प्रतिशत युवा छन् । थुनामा पुर्पक्षका लागि राखिएका कैदीबन्दीमध्ये ६० प्रतिशतभन्दा बढी लागूऔषधका छन् ।

लागूऔषध सेवारी गरी र लागूऔषधसहित पक्राउ पर्नेमा २० देखि ३० वर्ष उमेर समूहका युवा छन् । पक्राउ पर्ने प्रयोगकर्ताहरू अभिभावकको निगरानी नभएका युवाहरू रहेको जिल्ला प्रहरी कार्यालय धनुषाका प्रहरी उपरीक्षक शेखर खनाल बताउँछन् । ‘अभिभावकका निगरानी बाहिर रहेकाहरू लागूऔषधको कुलतमा फसेको देखिन्छ,’ उनले भने, ‘पढाइ छोडेर बसेका, काम नपाएर फुर्सदमा बसेका युवाहरू साथी–संगतको बहकाउमा परेर दुर्व्यसनीमा फसेको हो ।’ जिल्ला प्रहरीको हिरासतमा रहेको थुनुवामध्ये ६० प्रतिशत लागूऔषधकै व्यक्ति छन् । ‘छोरालाई प्रहरीले पक्राउ गरेर मुद्दा चलाउँदा पनि अभिभावकले आफ्ना बच्चा दुर्व्यसनमा लागेको पत्याउँदैन,’ उनले भने । लागूऔषधको दुर्व्यसनबाट बच्न अभिभावक, विद्यालय, शिक्षक र घर परिवार आफैं सचेत हुनुपर्ने एसपी खनाल बताउँछन् ।

कुलतमा लागेका युवा भात खान छोड्छन्, पढ्न छोड्छन्, परिवार छोड्छन् तर लागूऔषधको कुलत छोड्न सहज हुँदैन । धनुषासहित आसपासका जिल्लामा लागूऔषध ओसारपसार झन् बढेको छ । लागूऔषधको कुलतले अपराध बढ्ने भएकाले लागूऔषध सेवन र बिक्रीवितरण गर्नेमाथि प्रहरीले निगरानी बढाएको एसपी खनालले बताए ।

भारतबाट पेसेवरहरू प्रयोगकर्ताको घर–घरमा लागूऔषध उपलब्ध गराउँदै आएको प्रहरी अनुसन्धानबाट खुलेको छ । लागूऔषधको प्रयोग र ओसारपसारमा लागेका युवाले आफ्ना साथीहरूलाई यो क्षेत्रमा ल्याउने गरेको सुधारगृहको सञ्चालक मिलन पौडेलको भनाइ छ ।

बढ्दो ग्राफ
लागूऔषध कारोवबारी र प्रयोगकर्तामाथि प्रहरीले निगरानी बढाएको छ । तर, लागूऔषध सेवनकर्ता र कारोबारी बढ्दै गएको छ । पछिल्लो तिन वर्षमा लागूऔषधको मुद्दामा पक्राउ पर्नेको संख्या दोब्बर छ ।

धनुषामा आर्थिक वर्ष ०७३/७४ मा ३९ मुद्दामा ५१ , ०७४/७५ मा ७० मुद्दामा ८१, आव ०७५/७६ मा ८८ मुद्दामा १ सय ३१ र चालु आर्थिक वर्षको कात्तिकसम्म ४ महिनामा २९ मुद्दामा ४८ जना पक्राउ परेको छ । विगतको तथ्यांकअनुसार लागूऔषध कारोबारी र सेवनकर्ताको संख्या दिनानुदिन बढेको छ ।

प्रदेशको ८ जिल्लामा आर्थिक वर्ष ०७३/७४ मा ४ सय १९ जना, ०७४/७५ मा ४ सय ९३ र ०७५/७६ मा लागूऔषधसहित ६ सय ७८ जनालाई प्रहरीले पक्राउ गरेको छ । पक्राउ परेको ठूलो संख्या १६ देखि २५ वर्ष युवा अवस्थाका व्यक्तिहरू रहेको प्रदेश प्रहरी कार्यालयको तथ्यांकले देखाएको हो । प्रदेश प्रहरी कार्यालयको तथ्यांकअनुसार गत आर्थिक वर्षमा १६–२५ उमेर समूहका ५ सयभन्दा बढी रहेको प्रदेश प्रहरी कार्यालयका प्रवक्ता प्रहरी नायब उपरीक्षक ज्ञानकुमार महतोले जनाए ।

‘दुर्व्यसनमुक्त’ अभियान
प्रदेश सरकारले लागूऔषधको लतमा फसेका युवालक्षित अभियानको तयारी गरेको छ । ‘दुर्व्यसन मुक्त’ अभियान अन्तर्गत प्रदेशको ८ जिल्लामा लागूऔषध प्रयोगकर्तामाथि निगरानी बढाउन सीमामा प्रहरीको ३६ वटा पोस्ट थप्ने प्रक्रिया अगाडि बढाइएको प्रदेशका आन्तरिक मामिला तथा कानुनमन्त्री ज्ञानेन्द्र यादवले बताए ।

‘भारतीय पक्षले नेपालमा प्रतिबन्धित औषधि नेपालीलाई बिक्री नगर्ने आश्वासन दिएका छन,’ उनले भने, ‘हाम्रो आग्रहपछि भारतीय निकायले नेपालतर्फ भारतीयलाई मदिरा सेवनमा कडाइ गर्न भनेको छ । सीमा क्षेत्रमा मदिरा बिक्रीमा रोक लगाइनेछ ।’

प्रकाशित : मंसिर १८, २०७६ १०:१६
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×