डाँडापाखामा लक्जरी रिसोर्ट

फेवाताल वरिपरिका सराङकोट, कास्कीकोट, पुम्दीभुम्दी, नौडाँडा र मट्टीखानलगायतका स्थन रिसोर्टको रोजाइमा
दीपक परियार

पोखरा — सूर्योदयदेखि सूर्यास्तसम्मको अवलोकन । हरेक कोठाबाट ताल, हिमाल र सहरको दृश्य एकैपल्ट देख्न पाइने । स्थानीय परिवेश, प्रकृति र परिकारमा रमाउन सकिने । खर्चालु पर्यटकको रोजाइमा पर्ने स्थान हुन्, डाँडा उक्लिएका रिसोर्ट । 

तिनै खर्चालु पर्यटकलाई लक्षित गर्दै पोखरा वरपरका डाँडाकाँडामा धमाधम रिसोर्ट खुलिरहेका छन् । फेवाताल वरिपरिका सराङकोट, कास्कीकोट, पुम्दीभुम्दी, नौडाँडा रिसोर्टको रोजाइमा परेका छन् । अलि परको मट्टीखान, बेगनास, पचभैया, रूपाकोटमा समेत लक्जरी रिसोर्ट खुलिरहेका छन् । सूर्योदय र सूर्यास्तको अवलोकनका लागि चर्चित गन्तव्य सराङकोटमा रिसोर्ट खोल्नेको लर्को छ । पोखराबाट नजिक रहेको र एकैस्थलबाट माछापुच्छ्रे, अन्नपूर्ण हिमशृंखला, फेवाताल, पोखरा र हेम्जा बजारको दृश्य देखिने भएकाले पनि व्यवसायीको रोजाइमा सराङकोट परेको हो ।
सराङकोटमा खुलेको पहिलो रिसोर्ट हो, अन्नपूर्ण शेर्पा रिसोर्ट । १० वर्षअघि यो रिसोर्ट खुलेको हो । उक्त रिसोर्ट निर्माणपछि थपिने क्रम बढ्दो छ । पछिल्लोपल्ट यहीँ दसैंबाट सराङकोट माउन्टेन लज सञ्चालनमा आएको छ । व्यवसायीद्वय विप्लव पौडेल र नारायण पहारीले ३५ करोड रुपैयाँको लगानीमा लक्जरी रिसोर्ट सञ्चालनमा ल्याएका हुन् । लेकसाइडबाट विन्ध्यवासिनी मन्दिर हुँदै १३.५ किलोमिटरको दूरीमा लज पुगिन्छ । ८ रोपनीमा फैलिएको रिसोर्टमा २ स्विट र २८ डिलक्स रुम छन् । ती सबै कोठामा बाल्कोनी छन् । जहाँबाट ताल, हिमाल, पोखरा, हेम्जा फाँट, जिप लाइन, प्याराग्लाइडिङ एकैपल्ट अवलोकन गर्न सकिन्छ । ८० जना क्षमताको सभाहल, रेस्टुरेन्ट, बार, स्पा, मसाजलगायत सुविधा होटलमा छन् । गाउँका घरको झल्को दिन काठ, ढुंगा र माटो प्रयोग गरिएको छ ।

पाँचतले होटलको छतमा छ इन्फिनिटी स्विमिङ पुल । स्विमिङ पुलमा हिमशृंखलाको छायाँ टल्किँदा मनोरम देखिन्छ । ‘अन्तर्राष्ट्रियस्तरको सेवा सुविधा दिने गरी लक्जरी लज निर्माण गरेका हौं,’ वाराही ग्रुपका सञ्चालकसमेत रहेका पौडेलले भने, ‘लजको प्रमुख आकर्षण स्विमिङ पुल बनेको छ ।’ भ्रमण वर्ष २०२० लाई सहयोग पुग्ने गरी लज सुरु गरेको उनले सुनाए । पर्यटन बोर्डका कार्यकारी सदस्यसमेत रहेका उनी रिसोर्टले आन्तरिक र बाह्य पर्यटक आकर्षित गर्ने देख्छन् ।

सिस्टम एन्ड डेभलपमेन्ट म्यानेजर प्रदीप न्यौपानेका अनुसार लजले आफ्नै बोरिङको पानी प्रयोग गर्छ । बोरिङबाट निकाएिकोमध्ये ७० प्रतिशत पानी लजले प्रयोग गर्छ । बाँकी ३० प्रतिशत पानी समुदायले उपभोग गर्छन् । लजमा ३२ कर्मचारी छन् । औपचारिक उद्घाटन गरिदाँसम्म ४५ पुग्नेछन् । ४० प्रतिशत कर्मचारी स्थानीय नै भएको न्यौपानेले बताए । भने, ‘हामीले स्थानीय सहकारीसँग सहकार्य गरेर यहीँको उत्पादनलाई प्राथमिकता दिएका छौं ।’ जंगल वाक, साइक्लिङ, बर्ड वाचिङलगायत गतिविधिबाट पर्यटकको बसाइ लम्ब्याउने लजको योजना छ ।

वाराही ग्रुपअन्तर्गत पोखराको लेकसाइडमा होटल वाराही र चितवनको मेघौलीमा वाराही जंगल लज सञ्चालनमा छ । काठमाडौंको कान्तिपथमा
पाँचतारे होटल वाराही प्लाजा सञ्चालनको अन्तिम तयारीमा छ । सराङकोटका माउन्टेन लजकै अर्का सञ्चालक नारायण पहारीले पुम्दीभुम्दीमा पुम्दीकोट माउन्टेन लज सञ्चालन गरेका छन् ।

सराङकोटमा रिसोर्ट खोल्ने प्रतिस्पर्धा नै चलेको छ । सराङकोटमा ५ वर्षदेखि पाँचतारे होटल अन्नपूर्ण भ्यु निर्माणाधीन छ । जापानी मूलका नेपाली नागरिक ताकासी मियाहाराको लगानीमा होटल बनेको हो । पहिलो चरणमा डेढ अर्ब लगानी हुने र ४६ कोठा सञ्चालनमा आउनेछन् । दोस्रो चरणको काम सम्पन्न भइसक्दा ३ अर्ब रुपैयाँ लगानी र कोठा ११० पुग्नेछन् । फेवाताल किनारबाट होटलसम्म पुग्न अन्नपूर्ण केबलकार बनिरहेको छ । केबलकारको निर्माण सम्पन्न हुने क्रममा छ ।

सराङकोटमै ४ वर्षअघि सञ्चालनमा आएको रिसोर्ट हो, हिमालय फ्रन्ट रिसोर्ट । चारतारे स्तरको यो रिसोर्टमा ५५ कोठा छन् । पाँच रोपनीमा फैलिएको रिसोर्टको हरेक कोठाबाट आँखैअघि हिमालको लस्कर, फेवाताल र पोखरा उपत्यका देखिन्छ । विन्ध्यवासिनी मन्दिरबाट सराङकोटबाट जम्मा ३ किलोमिटर माथि उक्लिएपछि रिसोर्ट बाटैमा भेटिन्छ । पर्यटन व्यवसायी कर्ण शाक्यको केजीएच ग्रुपले रिसोर्ट खोलेको हो ।

सराङकोटबाट अलिपर कास्कीकोटमा रिसोर्ट खुल्ने क्रम बढ्दो छ । नौडाँडामा ३३ रोपनीमा फैलिएको हिमालयन देउराली रिसोर्ट पर्यटकीय आकर्षणको केन्द्र बनेको छ । रिसोर्टमा २४ कोठा छन् । तीमध्ये १२ डिलक्स र १२ सुपर डिलक्स हुन् । गुरुङ कला र संस्कृति झल्किने कटेज यो रिसोर्टमा छन् । पोखराबाट २० किलोमिटरको दूरीमा पर्ने रिसोर्टबाट माछापुच्छ्रे, अन्नपूर्ण हिमशृंखला, फेवाताललगायतको दृश्य अवलोकन गर्न सकिन्छ । कास्कीकोटमा कोरियनको लगानीमा ईएस देउराली रिसोर्ट सञ्चालनमा छ । सिंगापुरका व्यवसायीको लगानीमा कास्कीकोटमै नयाँ रिसोर्ट बन्दै छ । शाहवंशीय राज्यको उत्पत्तिस्थल कास्कीकोटमा कश्यप ताललगायत ऐतिहासिक स्थल छन् ।

पुम्दीभुम्दीमा पुम्दीकोट माउन्टेन रिसोर्टभन्दा अघि खुलेको हो, रानवीवन रिट्रिट । विश्व शान्ति स्तुपाको माथिल्लो डाँडामा रहेको रिसोर्ट १३ रोपनीमा फैलिएको छ । रिसोर्टमा १० कोठा छन् । पुम्दीभुम्दीमै दि पेभिलियन हिमालयज रिसोर्ट सञ्चालनमा छ । फुस्रेखोलामा ६५ रोपनीमा बनेको रिसोर्ट खर्चिलो पर्यटकको रोजाइमा पर्छ । उक्त रिसोर्टले फेवाताल पारि टेन्ट रिसोर्ट पनि हालै सञ्चालनमा ल्याएको छ । कास्की र स्याङ्जाको सिमाना मट्टीखानमा मट्टीखान माउन्टेन भ्यु रिसोर्ट खुलेको छ ।

फेवातालपछि बेगनास र रूपाताल वरपरका डाँडामा रिसोर्ट खुल्ने क्रम बढ्दो छ । १० वर्षअघि बेगनास लेक रिसोर्ट खुलेपछि लगानीकर्ता त्यता आकर्षित भएका हुन् । रिसोर्टमा १६ भिल्ला र ४० कोठा छन् । २५ रोपनीमा फैलिएको रिसोर्ट तीनतारे स्तरको हो । काठमाडौं र पोखरामा तारे होटल चलाइरहेको सांग्रिला होटल एन्ड रिसोर्टले बेगनासस्थित पचभैयामा ‘द लस्ट होराइजन रिसोर्ट’ बनाइरहेको छ । ५ अर्बको लगानीमा बन्ने रिसोर्टले उच्चस्तरका पर्यटक भित्र्याउने लक्ष्य लिएको छ ।

रूपा गाउँपालिकामा बनेको रूपाकोट रिसोर्टले पर्यटक आकर्षित गरिरहेको छ । रिसोर्टमा १२ भिल्ला, ४२ डिलक्स कोठा छन् । २ सय रोपनीमा फैलिएको रिसोर्टबाट रूपाताल, बेगनास ताल र हिमशृंखला एकैपल्ट देख्न सकिन्छ । पोखरा–२८ कालिकामा टाइगर माउन्टे पोखरा लज दुई दशकअघि खुलेको हो । बेलायती राजकुमार चार्ल्सले पदयात्रा गरेको मार्ग ‘रोयल ट्रेक’ मा यो रिसोर्ट पर्छ । पोखरा–२९ भण्डारढिकको राधेराधे डाँडामा १९ करोड रुपैयाँ लगानीमा सेभेन लेक्स रिसोर्ट यसैवर्षदेखि सञ्चालनमा आएको छ । रिसोर्ट बनाउने उद्देश्यले व्यवासायीले डाँडामा जग्गा किनेर राख्ने गरेका छन् । उद्योग वाणिज्य महासंघका पूर्वअध्यक्ष सुरज वैद्यले बेगनासको पचभैयामा होटल खोल्ने उद्देश्यले जग्गा किनेर राखेका छन् ।

प्रकाशित : मंसिर २, २०७६ ११:०१
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

कर तिर्नेको लहर

कान्तिपुर संवाददाता

बागलुङ — पोखरा पुगेर मात्र तिर्नुपर्ने बाध्यता हटेपछि कहरले कर तिर्नेहरू रहरले तिर्न थालेका छन् । जिल्लामा गत भदौदेखि आन्तरिक राजश्व कार्यालय खुलेपछि कर तिर्नेको लहर चलेको हो । 

एकै वर्षमा करदाताको संख्या दोब्बर बढ्नुको साथै लक्ष्यको ४२ प्रतिशत बढी कर संकलन भएको छ । कार्यालय प्रमुख हेमराज सुवेदीका अनुसार बागलुङमा चालु वर्षको पहिलो चार महिनामा मात्र १२ हजार करदाता सूचिकृत भएका छन् । गत बर्षको भदौमा करदाता सेवा कार्यालयबाट बढुवा भएर आन्तरिक राजश्व कार्यालय बनेकोमा १८ हजार ३ सय संस्थागत करदाता छन् । त्यस्तै १९ हजार १ सय जना व्यक्तिगत प्यान नम्बर लिएर कर तिर्न लागेको उनले बताए ।

कर तिर्नेले पनि नजिकमा सेवा पाएको बताए । ‘प्यान नम्बर लिन र कर तिर्न पोखरा जानु पर्थ्यो, अहिले यहीं सेवा पाईयो,’ जैमिनी नगरपालिका–१ की पुष्पा आचार्यले भनिन्, ‘गाउँका साना करदाता समूह मिलाएर सदरमुकाम आउने गरेको छन् ।’ सेवाग्राहीमै जागरण आएपछि गत बर्ष ५१ करोड २४ लाख रुपैयाँ कर संकलन गर्ने लक्ष्य राखेको कार्यालयले ४२ प्रतिशत बढी संकलन गरेको थियो ।

गत वर्ष ६८ करोड १८ लाख कर संकलन भएको थियो । चालु बर्ष उक्त करमा ४१ प्रतिशत वृद्धि गरेर ९६ करोड ५४ लाख संकलन गर्ने लक्ष्य राखिएको छ । ‘कर तिर्नुपर्छ भन्ने बुझाउन सकियो भने करदाता र करको दायरा आँफै बढ्ने रहेछ’ सुवेदीले भने, ‘चालु बर्षको पहिलो चार महिनामा पनि हामीले लक्ष्यको ५० प्रतिशत बढी कर संकलन गरिसकेका छौं ।’ चार महिनाका लागि राखिएको २४ करोड ५८ लाख करको लक्ष्यमा ३५ करोड ५ लाख संकलन भइसकेको उनले बताए ।

उत्कृष्ठ करदातालाई पुरस्कृत गर्ने, सबै स्थानीय तहमा उद्योग बाणिज्य संघको सहकार्यमा कर शिक्षा संचालन गर्ने र साझेदारीमा काम गर्ने अभियान चलाएपछि कर तिर्नेको लर्को लागेको कर अधिकृत सुन्दर श्रेष्ठले बताए । बागलुङ उद्योग बाणिज्य संघले कर्मचारी खटाएर करदातालाई फारम भर्न लगाउने र प्रक्रियाबारे बुझाउन थालेको छ । ‘कार्यालयबाट आग्रह भएपछि हेल्पडेक्स राखेर काम थालेका छौं,’ संघका अध्यक्ष युवराज राजभण्डारीले भने, ‘करदाता र व्यवसायीलाई यसले थप सहयोग मिलेको छ ।’

प्रकाशित : मंसिर २, २०७६ १०:५४
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
×