स्थानीय पूर्वाधार विकास कार्यक्रम : टुक्रे योजनालाई प्राथमिकता

कान्तिपुर संवाददाता

(गोरखा) — संघीय सरकारबाट विनियोजन हुने स्थानीय पूर्वाधार विकास कार्यक्रमअन्तर्गत निर्वाचन क्षेत्र नम्बर १ का लागि आएको ६ करोड रुपैयाँको बजेट ३४ योजनामा बाँडफाँड भएको छ । चालु वर्ष साझेदारी कार्यक्रम बजेटसहित बाँडिएको हो । 

संघीय सांसद हरिराज अधिकारीको उपस्थितिमा भएको बैठकले ६ योजनामा ५०/५० लाख छुट्याएको छ । १६ भवन, १० सडक मर्मत तथा स्तरोन्नति, २ विद्यालय घेराबार, पर्यटन सूचना केन्द्र र खानेपानी योजनामा रकम छुट्याइएको छ । अधिकांश टुक्रे योजनामा १० लाख छुट्याइएको हो ।

गण्डकी गाउपालिका–२ ठुटेपिपल–पातिस्वारा–घ्याप्रीङ गाउँ–दलभञ्ज्याङ सडक, शहिद लखन गाउँपालिका ५, ६, ७ को बुंकोट–देउराली–रानीस्वारा–चिसोपानी–तिनमाने सडक, भीमसेन थापा गाउपालिकाको–६, ७, ८ स्थित अश्राङ–रिप–अमलाभञ्ज्याङ–नारायपुर–हेल्थपोस्ट सडक, आरुघाट–४ आर्खेत–थुमी–गणेश मावि–वासपुर–मालस्वाराँ सतिडाडा सडक, धार्चे– ५ र ७ को गुम्दा–पैटु–लापु सडक, गोरखा नगरपालिका–५ को गोरखा क्याम्पस–नाङलेपानी–सानोरिप–अमराइ बेनीखोला सडक स्तरोन्नतिका लागि ५०/५० लाख छुट्याइएको छ ।

चुमनुव्री गाउपालिका–२ ल्हो हेलिप्याड र हेलिप्याड जाने मुल बाटो निर्माणमा १५ लाख छुट्याइएको जिल्ला समन्वय अधिकारी यमेन्द्र उपाध्यायले बताए । चुमनुब्री–३ को बुद्घ आवासीय मावि सिर्दिवास गेट निर्माण, चुम्चेतको सिम्चेतमा सामुदायीक भवन, प्रोकमा सामुदायिक भवन, धार्चेको लाप्राकमा आमा समूह भवन, यमगाउँ महिला समूह सामुदायिक भवन, माछाखोला सामुदायिक भवन, रुन्चेत सामुदायिक भवन र सिङ्ला सामुदायिक भवन निर्माणका लागि १०/१० लाख छुट्याइएको छ ।

भीमसेन थापा गापा–५ सहिद स्मृति भवन तथा पार्क मर्मत, दलित बस्ती सामुदायिक भवन, काशीखोला भगवती मावि सडक नाला, सपुगे तालखोला सडक स्तरोन्नती, सहिद लखन गाउँपालिका–६ हिमालय युवा क्लब सामुदायिक भवन, मकैपुर भण्डारी गाउँ सामुदायिक भवन, हाडेखोला चौरमन्दिर सामुदायिक भवन, बक्रेश्वर मावि बक्राङ र जनशक्ति मावि खेल मैदान निर्माणका लागि पनि १०/१० लाख छुट्याइएको छ ।

गण्डकी गाउँपालिका–१ विजय भवानी मावि, भलायडाँडा महिला सामुदायिक भवन र बेनीगाउँ चण्डीभञ्ज्याङ युवा क्लब सामुदायिक भवन निर्माणका लागि १०/१० लाख छुट्याइएको छ । त्यसैगरी गण्डकी–५ रानीस्वारा सामुदायिक भवन निर्माण १४ लाख ६० हजार बजेट विनियोजन भएको छ । सदरमुकामको ताप्ले तल्लो कोखे खानेपानी, पर्यटन सूचना केन्द्र, नारेश्वर दलित कृषक सेवा समाज समूह भवन मर्मतका लागि पनि १०/१० लाख छुट्याइएको छ ।

प्रकाशित : कार्तिक २६, २०७६ ११:०७
ADVERTISEMENT
प्रतिक्रिया
पठाउनुहोस्
ADVERTISEMENT

खेतबारी उपयोग गर्नेलाई पुरस्कार

प्रकाश बराल

(बागलुङ) — रोजगारीका लागि बिदेसिने युवा बढेपछि ताराखोला गाउँपालिकाले जमिन बाँझो हुनबाट रोक्ने अभियान चलाएको छ । अध्यक्ष प्रकाश घर्तीका अनुसार खेतबारी पूर्णरूपमा उपयोग गर्नेले पुरस्कार पाउने भएका हुन् । 

‘सबै खेतबारी पूर्णरूपमा उपयोग गर्नेलाई पुरस्कृत गर्ने निर्णय गरेका छौं,’ अध्यक्ष घर्तीले भने, ‘आफैं कमाउन नसक्ने भए भाडामा भए पनि काम गर्नेलाई दिनैपर्ने भनेका छौं ।’ शर्त र सूचकसमेत राखेर कानुन बनाउन मस्यौदा थालिएको उनले बताए । ताराखोलामा घरघरै उद्यमी बनाउने अभियान सुरु भएको छ । यो अभियानले कृषि, पशुपालन र अन्य उत्पादनका लागि जमिन आवश्यक पर्छ । पाखोमा ढुंगाखानी, खोलाखोल्सीमा अलैंची खेती, मुख्य बारीमा आलु र तरकारी खेतीका लागि किसानलाई प्रोत्साहित गरिएको उनले बताए । गाउँपालिकालाई आलु र अलैंची जोन बनाउन लागिएको छ । त्यसका लागि अधिकतम जमिन उपयोग गर्नुपर्दा बाँझो जमिन रहनै नदिने उनले बताए । यहाँ प्रधानमन्त्री कृषि आधुनिकीकरण परियोजना पनि सञ्चालनमा छ । बाँझिएको जमिनलाई उत्पादनमा लगाउन परियोजनामार्फत आगाडि बढाउने घर्तीले बताए ।

काठेखोला–५ को कर्लिम र ८ को लेखानीका अधिकांश जमिन बाँझो छ, आधा बढी घर रित्ता छन् । जमिनमा आवादी गर्नका लागि गाउँपालिकाले कानुन बनाएर उपयोग गर्न सक्छ, तर अहिलेसम्म त्यस्तो बनेको छैन । बसाइँ सराइले बाँझिएका जमिन उपयोग गरेर उत्पादन बढाउने योजना भए पनि कानुन नबनेको गाउँपालिका अध्यक्ष अमर थापाले बताए । भूउपयोग नीति बनाउने भन्ने चर्चा चले पनि केन्द्र र प्रदेश कानुन कुरेर बसेको उनले बताए । ‘यसअघि कानुन ल्याउने भनेका थियौं, त्यसका लागि प्रक्रिया, छलफल र केन्द्रीय कानुन पर्खेका छौं’ थापाले भने, ‘अभियानको रूपमा सन्देश भने सबैलाई पुर्‍याएका छौं ।’ खेर गएको जमिन उपयोग गरेर सहकारीमार्फत सामूहिक खेतीका लागि आह्वान गर्ने योजना उनले सुनाए ।

गलकोट नगरपालिकामा यो समस्या जटिल बन्दैछ । जापानलगायत अन्य देश जाने दर बढेपछि धेरै घर खाली छन् । जमिनमा आवादी गरिदिने कोही छैनन् । ‘हाम्रो राम्चेढुंगा गाउँका धेरै घर रित्तो भइसकेका छन्,’ स्थानीय थमन थापाले भने, ‘गाउँमा रोजगारी, शिक्षाको गुणस्तर र स्वास्थ्यको सेवा सहज भइदिए बसाइँसराइ कम हुन्थ्यो ।’ नगरप्रमुख भरत शर्मा गैह्रेले भू उपयोग नीति ल्याउने कुरा संघको अगुवाइमा भरपर्ने बताए ।

प्रकाशित : कार्तिक २६, २०७६ ११:०६
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×