उच्च अदालतको आदेश कार्यान्वयन भएन

विना थापा

कास्की — उच्च अदालत पोखराले दिएको आदेश २ वर्ष पुग्दा पनि पोखरा महानगरले अटेर गरेको अस्थायी कर्मचारीले बताएका छन्  । अदालतले कानुनी प्रक्रिया पुरा गरी अस्थायी कर्मचारीलाई स्थायी नियुक्ति गर्न आदेश दिएको थियो  ।

साविकको उपमहानगरपालिकाका अस्थायी कर्मचारीले कार्यालय प्रमुख, कार्यकारी अधिकृत तथा पदपूर्ति समितिका सदस्य सचिवलाई विपक्षी बनाएर स्थायीका लागि मुद्दा दायर गरेका थिए ।

मुद्दामाथि अदालतले २०७४ कात्तिक २१ मा स्थानीय शासन ऐन २०५५ को दफा २४९ एवं स्थानीय स्वायत्त शासन नियमावली २०५६ को नियम २१३ ‘क’ समेतमा उल्लिखित कानुनी व्यवस्थाको प्रक्रिया पूरा गरी निवेदकलाई स्थायी नियुक्तिका लागि आदेश दिएको थियो । आदेश दिएको २ वर्षसम्म पनि महानगरले कुनै सुनुवाइ नगरेको कर्मचारीले बताएका हुन् ।

स्थायीको कुरा राखे प्रमुखले हुन्छ, हुन्छ भन्ने तर, प्रक्रिया केही नचाल्ने कर्मचारी गुनासो गर्छन् । मुख्य न्यायाधीश कुमार चुडाल र न्यायाधीश जगतप्रसाद श्रेष्ठको संयुक्त इजलासले कानुनी व्यवस्थाको प्रक्रिया पूरा गरी स्थायी नियुक्त गर्न आदेश जारी गरेको थियो ।

महानगरमा १५ देखि ३० वर्ष वढीसम्म काम गरेका कर्मचारी छन् । कोही स्थायी नहुँदै उपदानमा निस्किन्छन् भने कतिपयले राजीनामा दिन्छन् । महानगरमा २ सय बढी कर्मचारी करारमा छन् ।महानगरमा ५८ बढी कानुन निर्माण भएको अधिकृत दुर्गादेवी पौडेल न्यौपाने बताउँछिन् । ‘हामी धेरै पीडित छौं,’ उनले भनिन्, ‘कर्मचारी व्यवस्थापनमा कानुन बनाउन महानगरको वास्ता छैन ।’

महानगरले चाहे कानुन बनाएर स्थायी गर्नका लागि कुनै ठूलो कुरा नभएको उनले बताइन् । महानगरमा स्थायीका लागि १९ दिनसम्म कार्यालय बन्द गर्दा पनि सुनुवाइ नभएको कर्मचारीले सुनाए । अहिले मुद्दा फैसला भएर पनि अदालतको आदेशलाई कुुनै सुनुवाइ नहुँदा दु:ख लागेको उनको भनाइ छ । उनी १९ वर्षदेखि काम गर्दै आएकी छन् । महानगरपालिकाका कर महाशाखा प्रमुख शिवहरि शर्मा भन्छन्, ‘प्रक्रिया र नियमअनुसार स्थायी गराइदिए हामी पनि त्यहीअनुसार तयार थियौं तर महानगरको वास्तै छैन ।’ शर्मा १५ वर्षदेखि कार्यरत छन् ।


जनप्रतिनिधि आएपछि कर्मचारीले पाउने सेवासुवीधा समेत हटाइएको उनीहरूको गुनासो छ । लोकसेवा आयोगमा कर्मचारी स्थायीका लागि प्रक्रिया पूरा गरेर पठाउनका लागि पत्र पठाएको महानगरका प्रमुख मानबहादुर जीसीले बताए । ‘महानगरले सीधै आयोग बनाउन नपाइने भएकाले लोकसेवा आयोगको सुझावको पर्खाइमा छौं,’ उनले भने, ‘आयोगको आदेश आएपछि अघि बढ्छौं ।’

प्रकाशित : कार्तिक ४, २०७६ १३:४७
ADVERTISEMENT
प्रतिक्रिया
पठाउनुहोस्
ADVERTISEMENT

समयमा खुल्दैनन् विद्यालय

अवधेशकुमार झा

सप्तरी — सप्तरीको विष्णुपुर गाउँपालिका ७ स्थित जनता आधारभूत विद्यालय अगाडि आइतबार बिहान साढे ९ बजे विद्यार्थी आएका थिए  । तर, विद्यालयको मूलगेटमै ताल्चा लागेको थियो  ।

उनीहरू विद्यालयको छेवेमा निर्माणाधीन विद्यालय भवनका अगाडि किताब राख्दै बसे । केही बेरसम्म बस्दा पनि उनीहरूको विद्यालय खुलेन ।


१० बज्नै लाग्दा एकजना बालक आएर कक्षा ७ की छात्रा प्रियंकाकुमारी मण्डलका हातमा साँचोको झुत्तो दिए । प्रियंकाले विद्यालयको मूलगेटको ताल्चा खोलिन् । विस्तारै विद्यार्थी कक्षा कोठा तर्फ लागे । विष्णुपुर गाउँपालिकाको कार्यालयसित टाँसिएकै विद्यालयको अवस्था हो यो ।


विद्यार्थी आफैं ताल्चा खोलेर विद्यालय प्रवेश गरेपछि तस्बिर लिन लाग्दा नजिकै रहेका गाउँपालिकाका एकजना कर्मचारीले प्रधानाध्यापक नन्दलाल यादवलाई फोन गरी विद्यालयमा पत्रकार आएको सुनाए । लगतै प्रअ यादव विद्यालय पुगे ।


विद्यालय त विद्यार्थीले खोले नि ? भन्ने प्रश्नमा प्रअ यादव केही बेर अक्मकिए । उनले अरू सबै दिन आफू नै विद्यालय खोल्ने गरेको बताउँदै आज (आइतबार) बाटोमा आफूलाई काम परेकाले विद्यार्थीलाई नै साँचो जिम्मा लगाएको बताए । उक्त विद्यालयमा कार्यालय सहयोगी छैनन् । प्रअ यादवबाहेक अन्य ६ जना शिक्षक विद्यालयमा कार्यरत छन् । एकजना क्रियाबिदाबाहेक अन्य शिक्षक पनि समयमा आएनन् ।


सात कक्षासम्म अध्ययापन हुने उक्त विद्यालयमा गत शुक्रबार १६ जना विद्यार्थी रहेको कक्षा ७ मा ६ जना, ३३ जना विद्यार्थी रहेको कक्षा ६ मा ११ जना, २९ जना विद्यार्थी रहेको कक्षा ५ मा ९ जना, २५ जना विद्यार्थी रहेको कक्षा ४ मा ७ जना र २९ जना विद्यार्थी रहेको कक्षा ३ मा ९ जना विद्यार्थी मात्र उपस्थित रहेको हाजिरी रजिष्टरको तथ्यांकमा देखियो । कक्षा १, २ र बालविकासको त दैनिक हाजिरी समेत गरेको देखिएन ।

प्रधानाध्यापक यादवले शुक्रबार शिक्षकहरूको हडतालका कारण केही कक्षाको हाजिरी गर्न नभ्याएको प्रष्टीकरण दिए । उनले चाडपर्वका कारण विद्यार्थी कम भएको बताए । ‘हामी दैनिक समयमै विद्यालय आउछौं तर आज अलि ढिलो भयो,’ प्रअ यादवले भने । विद्यालयमा कक्षा सञ्चालन भइरहँदा पनि केही शिक्षक कक्षा बाहिरै घुमिरहेका थिए । गाउँपालिका अध्यक्ष लीलाम्बर यादवले विद्यालयका समस्याबारे आफू गम्भीर रहेको र सुधारको प्रयास गर्ने बताए ।

प्रकाशित : कार्तिक ४, २०७६ १३:४६
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT