एक दिनमै उप्कियो कालोपत्रे

कान्तिपुर संवाददाता

(बागलुङ) — बागलुङ सदरमुकामको रामरेखामा कालोपत्रे गरेको भोलिपल्टै उप्केको छ । बागलुङ नगरपालिका र सडक बोर्डको संयुक्त लगानीमा निर्माणाधीन सडकको कालोपत्रे उप्केको हो । 

बुधबार दिउँसो कालोपत्रे गरेर छाडिएको स्थानमा शुक्रबार दिउँसो हलुका सवारी गुड्दा कालोपत्रे उप्केको हो । उप्केको देखेपछि स्थानीयले हातैले कालोपत्रे उधाङ्गो बनाएर फालिदिएका छन् । रामरेखास्थित जसबीर टोलको सय मिटर खण्डमा कमसल भएको भन्दा भन्दै कालोपत्रे उप्काइएको इन्जिनियर मनोज शर्माले बताए ।

‘धुलो उडाएर पानीले पखालेपछि मात्र कालोपत्रे हाल्नुपर्नेमा नभएको भेटियो,’ शर्माले भने, ‘स्थानीयले गुनासो गरेपछि आफैं पुगेर उक्त खण्डको छेउछेउको कालोपत्रे उप्काउन लगाएको छु ।’ ठेकेदार कम्पनीलाई फोन गरेर सडक पुनर्निर्माण गर्न निर्देशन दिएको उनले बताए ।

८२ लाख रुपैयाँको लागतमा भित्रि सडक मर्मतका लागि गत असारदेखि नै काम भएको थियो । चाडपर्वका कारण रोकिएको काम तिहारभित्रै सक्नेगरी पुन: थालिएको थियो । उक्त घटना सार्वजनिक भएपछि नगरपालिकाका कर्मचारी र जनप्रतिनिधिले समेत काम गुणस्तरीय गर्न माग गरेका छन् । ‘झारा टार्ने काम गर्दा नगरपालिका प्रतिको विश्वास गुम्छ, त्यसैले गुणस्तरीय काम गर्न भनेका छौं,’ वडा १ का अध्यक्ष दुर्गाबहादुर बोहोराले भने, ‘ठेक्काको काम भने पनि जस्तो पनि गर्न पाइँदैन ।’

कालोपत्रे नउप्केको स्थानमा पनि लेबल नमिलाएको भेटिएको छ । नालीको सतह बराबर बनाउनुपर्नेमा खाल्डैखाल्डा छाडेको भेटिएको थियो । ती खाल्डा पनि पुर्न लगाएर पानी सडकमा नजम्ने बनाउन लगाउने शर्माले बताए ।

प्रकाशित : कार्तिक ३, २०७६ १०:१०
ADVERTISEMENT
प्रतिक्रिया
पठाउनुहोस्
ADVERTISEMENT

योजनाविहीन सडक कार्यालय

सम्झना रसाइली

(तनहुँ) — सडक डिभिजन कार्यालय तनहुँलाई संघीय सरकार अन्तर्गतका चार र प्रदेश सरकार अन्तर्गतको एक जिल्ला गरी पाँच जिल्लामा काम गर्ने जिम्मेवारी तोकिएको छ । दमौलीस्थित चपाघाटमा रहेको कार्यालयले तनहुँसँगै गोरखा, लमजुङ, मनाङमा केन्द्रीय सरकारको र नवलपुर जिल्लामा प्रदेश सरकारअन्तर्गतका सडक पूर्वाधारका काम गत वर्ष सम्पादन गरेको थियो ।

मुलुक संघीय संरचनामा गएसँगै सिंहदरबारको अधिकार गाउँगाउँमा भनिए पनि कार्यालय अहिले भूमिकाविहीन अवस्थामा पुगेको छ । पृथ्वीराजमार्गसँगै भित्री सडकमा मर्मत सुधार तथा स्तरोन्नतीका काम गर्नुपर्ने भए पनि कार्यालयसँग न कुनै योजना छन् न त विकासे बजेटै । ‘संघीयतापछि साविक कार्यालय यथावतै रहे पनि बजेट केन्द्रमै भएकाले हामी भूमिकाविहीन छौं,’ कार्यालय प्रमुख विष्णुप्रसाद काफ्लेले भने, ‘हामी संघीय कि प्रदेश सरकार मातहतको कर्मचारी हौं भन्ने पनि अन्योल छ ।’

आवश्यक बजेट र कर्मचारी दरबन्दीको अभावले कुनै पनि कार्यक्रमलाई प्रभावकारी सञ्चालन गर्न नसकिएको उनले बताए । ‘संघ र प्रदेशअन्तर्गत विभिन्न पाँच जिल्लामा काम गर्दै आएका छौं । तर कर्मचारी दरबन्दी र बजेटको भने अहिलेसम्म टुंगो लागेको छैन,’ उनले भने ।

संघ र प्रदेश सरकारको विभिन्न बैठक र निर्णयले काम गर्ने क्षेत्र छुट्याए पनि बजेट अभावले पृथ्वी राजमार्गअन्तर्गत तनहुँ खण्डमा खाल्डाखुल्डी पुर्न पनि उधारो वा ऋण सहयोग लिएर गर्नुपर्ने बाध्यता आइलागेको काफ्लेको भनाइ छ । कर्मचारीको तलब आए पनि अहिलेसम्म यस कार्यालयका नाममा कुनै योजना तथा विकास बजेटै नआएको उनले बताए ।

‘कार्यालयबाट सडक मर्मत र विकासका कार्यक्रम जुन गतिमा हुनुपर्ने थियो त्यो भइरहेको छैन,’ उनले भने, ‘कहींकतै भत्किएका सडक मर्मत गरिए पनि उधरोमा चल्नुपरेको छ । काम त पूरा हुन्छ तर जब भुक्तानी दिने समय आउँछ कार्यालयलाई समस्या पर्छ ।’ कार्यालयमा १४ कर्मचारी रहे पनि उनीहरू भूमिकाविहिन छन् । डिभिजन प्रमुखसहित १/१ लेखापाल, नासु, कम्प्युटर अपरेटर, खरिदार, ल्याब असिस्टेन्ट, ७ इन्जिनियर, १६ सव–इन्जिनियार र ४/४ जना हलुका सवारी चालक र कार्यालय सहयोगीको माग भएको कार्यालयले जनाएको छ ।

माग दरबन्दी अनुरूप कर्मचारी र कार्यक्रमअनुसारको बिकास बजेट तनहुँ शाखालाई उपलब्ध गराइदिने हो भने कार्यक्षेत्र तोकिएको सबै जिल्लामा सहज र प्रभावकारी तरिकाले काम सम्पादन गर्न कुनै कठिनाइ नहुने डिभिजन प्रमुख काफ्ले बताउँछन् ।

प्रकाशित : कार्तिक ३, २०७६ १०:०९
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT