योजनाविहीन सडक कार्यालय

सम्झना रसाइली

(तनहुँ) — सडक डिभिजन कार्यालय तनहुँलाई संघीय सरकार अन्तर्गतका चार र प्रदेश सरकार अन्तर्गतको एक जिल्ला गरी पाँच जिल्लामा काम गर्ने जिम्मेवारी तोकिएको छ । दमौलीस्थित चपाघाटमा रहेको कार्यालयले तनहुँसँगै गोरखा, लमजुङ, मनाङमा केन्द्रीय सरकारको र नवलपुर जिल्लामा प्रदेश सरकारअन्तर्गतका सडक पूर्वाधारका काम गत वर्ष सम्पादन गरेको थियो ।

ZenTravel

मुलुक संघीय संरचनामा गएसँगै सिंहदरबारको अधिकार गाउँगाउँमा भनिए पनि कार्यालय अहिले भूमिकाविहीन अवस्थामा पुगेको छ । पृथ्वीराजमार्गसँगै भित्री सडकमा मर्मत सुधार तथा स्तरोन्नतीका काम गर्नुपर्ने भए पनि कार्यालयसँग न कुनै योजना छन् न त विकासे बजेटै । ‘संघीयतापछि साविक कार्यालय यथावतै रहे पनि बजेट केन्द्रमै भएकाले हामी भूमिकाविहीन छौं,’ कार्यालय प्रमुख विष्णुप्रसाद काफ्लेले भने, ‘हामी संघीय कि प्रदेश सरकार मातहतको कर्मचारी हौं भन्ने पनि अन्योल छ ।’

Meroghar


आवश्यक बजेट र कर्मचारी दरबन्दीको अभावले कुनै पनि कार्यक्रमलाई प्रभावकारी सञ्चालन गर्न नसकिएको उनले बताए । ‘संघ र प्रदेशअन्तर्गत विभिन्न पाँच जिल्लामा काम गर्दै आएका छौं । तर कर्मचारी दरबन्दी र बजेटको भने अहिलेसम्म टुंगो लागेको छैन,’ उनले भने ।

संघ र प्रदेश सरकारको विभिन्न बैठक र निर्णयले काम गर्ने क्षेत्र छुट्याए पनि बजेट अभावले पृथ्वी राजमार्गअन्तर्गत तनहुँ खण्डमा खाल्डाखुल्डी पुर्न पनि उधारो वा ऋण सहयोग लिएर गर्नुपर्ने बाध्यता आइलागेको काफ्लेको भनाइ छ । कर्मचारीको तलब आए पनि अहिलेसम्म यस कार्यालयका नाममा कुनै योजना तथा विकास बजेटै नआएको उनले बताए ।

‘कार्यालयबाट सडक मर्मत र विकासका कार्यक्रम जुन गतिमा हुनुपर्ने थियो त्यो भइरहेको छैन,’ उनले भने, ‘कहींकतै भत्किएका सडक मर्मत गरिए पनि उधरोमा चल्नुपरेको छ । काम त पूरा हुन्छ तर जब भुक्तानी दिने समय आउँछ कार्यालयलाई समस्या पर्छ ।’ कार्यालयमा १४ कर्मचारी रहे पनि उनीहरू भूमिकाविहिन छन् । डिभिजन प्रमुखसहित १/१ लेखापाल, नासु, कम्प्युटर अपरेटर, खरिदार, ल्याब असिस्टेन्ट, ७ इन्जिनियर, १६ सव–इन्जिनियार र ४/४ जना हलुका सवारी चालक र कार्यालय सहयोगीको माग भएको कार्यालयले जनाएको छ ।

माग दरबन्दी अनुरूप कर्मचारी र कार्यक्रमअनुसारको बिकास बजेट तनहुँ शाखालाई उपलब्ध गराइदिने हो भने कार्यक्षेत्र तोकिएको सबै जिल्लामा सहज र प्रभावकारी तरिकाले काम सम्पादन गर्न कुनै कठिनाइ नहुने डिभिजन प्रमुख काफ्ले बताउँछन् ।

प्रकाशित : कार्तिक ३, २०७६ १०:०९
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT

झोलुङ्गे पुलमा मोटरसाइकल !

अग्ला र लामा पुलको डिजाइन बाइक कुदाउने गरी बनाइएको नभए पनि बाटो छोटिने हुँदा प्रयोग गर्नेको संख्या बढेको छ 
अगन्धर तिवारी

(पर्वत) — सिङ्गल स्पानमा मुलुककै अग्ला र लामा दाबी गरिएका जिल्लाका झोलुंगे पुलमा पैदल यात्रु मात्रै नभएर सवारी साधन समेत वारपार हुने गरेका छन् । सामान्यतया नदी वारपार गर्न पदयात्रीका लागि निर्माण गरिएका अग्ला पुलले मोटरसाइकल चालकका लागि समेत सहज गन्तव्य बन्दै गएका छन् । सदरमुकाम कुश्माबजारमा रहेका चारवटै अग्ला पुल मोटरसाइकल बाहकका लागि छोटोछरितो बाटो भएको छ । तर पैदलयात्रुलाई भने असहज भएको छ । 

कुश्मा–मुडिकुवा, कुश्मा–खरेहा, कुश्मा–कटुवा र कुश्मा–कैया जोड्ने चारवटा झोलुङ्गे पुलमा पैदलयात्रुको भन्दा मोटरसाइकलको चाप बढी हुन्छ । सुरुमा कुश्मा–कैया र कुश्मा बलेवामा मात्रै खुला गरिएका मोटरसाइकल वारपार पछिल्लो समय भने सबैमा गरिएको हो । बिहानदेखि साँझसम्म सबैजसो अग्ला पुलमा मोटरसाइकलमा सवार गर्नेको चाप थेगिनसक्नु हुनेगरेको स्थानीय बताउँछन् ।

सिंगल स्पानको पुलमा एउटा बाइक गुडाएपछि यात्रुलाई पैदल हिंड्न सहज हुँदैन । मोटरसाइकलकै कारण पैदल यात्रुलाई हिंडडुल गर्न समस्या हुने मुडिकुवाका थानेश्वर भुषाल बताउँछन् । ‘पिच सडकमै जस्तोगरी बाइक हुईंक्याएर ल्याउँछन्,’ उनले भने, ‘एउटा–एउटा हिंड्ने बनाइएको नियम पालना भएन ।’ कुश्मा–मुडिकुवा झोलुङ्गे पुलमा सुरुसुरुमा दैनिक २/४ वटा मोटरसाइकल वारपार हुनेगरेकोमा यतिबेला सयौं वारपार गर्ने उनले बताए । मुडिकुवा, देविस्थान, खानीगाउँ, कुर्घा, पाङराङलगायत दक्षिण पर्वतका बासिन्दाका लागि कुश्मा–मुडिकुवा र फलेवास–कुर्घा जोड्न बनेका झोलुङ्गे पुलले ४ घण्टा बाटो छोटिएको छ ।

बिगतमा दिनभर समय खर्च हुने दक्षिण पर्वतबासीका लागि मोटरसाइकलमा यात्रा गर्दा कुश्माबाट अढाई घण्टामै हुवास पुग्न सकिन्छ । झोलुङ्गे पुलमा सहजै बाइक गुडाउन पाएपछि ४ घण्टाको बाटो २ घण्टामै छोटिएको रानीपानीका हरि न्यौपानेले बताए । ‘कुर्घाबाट चिर्दी घुमेर फलेबास आउँदा एक घण्टा लाग्थ्यो,’ उनले भने, ‘मुडिकुवाबाट दोबिल्ला हुँदै कुश्मा अर्को एक घण्टा । ती दुवै ठाउँका पुलले दुई घण्टा बाटो छोटिएको छ ।’

सदरमुकाममा कोठा खोजेर बस्दैआएका ज्ञादी, फलेबास र बिहादीसम्मका कर्मचारी, शिक्षक, विद्यार्थी पनि मोटरसाइकलमा केही मिनेटमै आउजाउ गर्छन् । ‘कुश्माबाटै बिहादी आउजाउ गर्न भ्याएको छु,,’ बिहादी–१ बाच्छाको जनकल्याण माविका शिक्षक झलक चापागाईंले भने, ‘बाइक भएपछि एक घण्टामै स्कुल पुगिन्छ ।’

बिहान ९ बजे खाना खाएर हिँडेपछि १ घण्टामै बिहादी पुग्न सकिने उनले बताए । ३ वर्षअघि फलेवास नगरपालिकाले मुडिकुवास्थित माटेदेवल मावि हुँदै झोलुङ्गे पुलसम्मको ३ किमि सडक स्थानीयको सक्रियतामा खनिएको हो । मुडिकुवास्थित माटेदेवल माविदेखि पुलसम्म ट्रयाक खुलेपछि मोटरसाइकल वारपार गर्न सहज भएको हो । अहिले मोटरसाइकलमा यात्रा गर्नेहरू कुश्माबाट जिल्लाको सुदुर दक्षिण हुवाससम्म अढाई घण्टामै पुग्छन् । कुश्मा र फलेवासको पुल बन्नुअघि ५/६ घण्टा लाग्थ्यो ।

त्यस्तै बागलुङतर्फको झोलुङ्गे पुलमा समेत दैनिक करिव दुई सय मोटरसाइकल वारपार गर्ने स्थानीय बताउँछन् । बलेवाका रामबहादुर पौडेलले दसैंयता सबेरैदेखि साँझ अबेरसम्म पुलमा बाइक वारपार गर्नेको भीड लागेको बताए । ‘पहिला बाइक तार्न नदिने कि भन्ने सोचेका थियौं,’ पुल निर्माण समितिका अध्यक्ष रहेका उनले भने, ‘पछि सबैको माग भयो, प्राविधिकको सल्लाहमा तार्न दिने निर्णय गर्‍यौं ।’ स्थानीय प्रशासनले समेत पुलमा मोटरसाइकल वारपार गर्न दिने निर्णय गरेपछि सहज भएको उनले बताए । तर, लत्रिनेगरी एकैपटकमा ५–६ ओटासम्म बाइक चलाउँदा भने पुलको आयु छोटो हुने सरोकारवाला बताउँछन् । समितिकै पहलमा पुलसम्म आउने सडक खनेपछि पुलमा बाइक वारपार गर्न सहज भएको छ ।

प्राविधिक हिसाबले भने झोलुङ्गे पुलमा मोटरसाइकल वारपार गर्नु उपयुक्त नहुने जानकार बताउँछन् । ‘यस्ता अग्ला पुलमा बाइक तार्नु प्राविधिक हिसाबले उपयुक्त होइन,’ कुश्मा–मुडिकुवा पुलका डिजाइनर इन्जिनियर रबिन्द्र तिवारी भन्छन्, ‘अहिले सजिलोका लागि गुडाउँछन् । पुल डिजाइन गर्दा बाइकका लागि होइन ।’ इन्जिनियर तिवारीकै अगुवाइमा बनेको कुश्मा–मुडिकुवा पुल बाइक तार्नेगरी डिजाइन नगरिएको उनले बताए ।

२०६६ सालमा कुश्मा–ज्ञांदी जोड्न ३ सय ३५ मिटर लामो पुल बनेपछि त्यसलाई सिंगल स्पानको मुलुककै लामो पुल दाबी गरियो । त्यही पुल हेर्न आउने पर्यटकको केही वर्ष भीड नै लाग्यो । त्यस्तै मुडिकुवा–कैया र कुश्मा १ पाङबाट बागलुङ बजार जोड्न थप दुई पुल निर्माणाधीन छन् । यिनमा भने मोटरसाइकल वारपार गर्न मिल्ने गरी डिजाइन गरिएको छ ।

प्रकाशित : कार्तिक ३, २०७६ १०:०९
पूरा पढ्नुहोस्
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT
×