पोखराका पेट्रोल पम्प खतरामा

कान्तिपुर संवाददाता

कास्की — पोखराको केही पेट्रोल पम्म खतरायुक्त रहेको कास्की प्रहरीले जनाएको छ । पेट्रोल पम्प मानवबस्तीसँगै अझ घरमै रहेकाले कुनै पनि बेला ठूलो दुर्घटना निम्तिन सक्ने प्रहरीको भनाइ छ ।

कास्की प्रहरी प्रमुख एसपी दानबहादुर कार्कीले शुक्रबार पत्रकार सम्मेलनमार्फत यस्तो बताएका हुन् । उनले भने, ‘पोखरका केही पेट्रोल पम्प पम्प नभई एकप्रकारको बमजस्तै भएका छन् । उनका अनुसार नागढुंगा, पृथ्वीचोक र नयाँबजार लगायतमा सडकसँगै जोडिका घरमा पेट्रोल पम्प छन् ।

यसले सडक पेटीमा हिँडेका यात्रु बाटो नपाएर सडकमा हिंडन बाध्य रहेको प्रहरीले जनाएको छ । दुर्घटना हुन नदिनका लागि यसबारे सम्बन्धित निकायले पहल गर्नुपर्नेमा उनले जोड दिए । कतिपय पेट्रोल पम्पमा सुरक्षाका रूपमा फायर फाइटिङसमेत नराखिएको पाइएको प्रहरीले जनाएको छ ।

यसैगरी पोखराका विभिन्न शैक्षिक संस्थासँगैका पसलमा मादक पदार्थ बिक्री–वितरण गरेको पाइएकाले बिक्रीमा प्रतिबन्ध लगाएको प्रहरीले जनाएको छ । पोखरामा चल्ने ट्याक्सीले मिटरमा जान नमानेकाले कारबाही भइरहेको प्रहरीले जनायो । उनले पछिको समयमा सडकमा बसेर माग्नेको संख्या बढेकाले समस्या आएको बताए ।

माग्नेहरू जनकपुर, नेपालगञ्जबाट आएका छन् । केही भारतीय नागरिक छन् । विदेशी पर्यटकसँग पैसा मागेको पाइएकाले समस्या भएको कार्कीले बताए । उनीहरूलाई उद्धार गरी व्यवस्थापनका लागि मानव सेवा आश्रम र बाह्य जिल्लादेखि आएकालाई उनीहरूकै घर पठाइएको छ ।

कौंडाको खालबाट पक्राउ परेका तीन एनआरएनलाई नियमअनुसार चाहिएका बेला हाजिर हुनेगरी जनही ५० हजार रुपैयाँमा छाडिएको प्रहरीले स्वीकारेको छ । १५ जना पक्राउ परेकोमा १२ हिरासतमा रहेका र तीन जनालाई छाडिएको भन्दै कास्की प्रहरीको आलोचना भएको थियो । एनआरएनको निर्वाचनमा मतदान गर्न उनीहरूलाई छाडिएको थियो ।

प्रकाशित : कार्तिक २, २०७६ १९:२७
प्रतिक्रिया
पठाउनुहोस्
ADVERTISEMENT

दूषित पानी बेच्ने धरौटीमा रिहा

कान्तिपुर संवाददाता

विराटनगर — दिसामा पाइने जीवाणु ‘कोलिफर्म’ मिसिएको पानी बेच्ने विराटनगर–७, बुद्धमिलन चोकस्थित ओम जेके पानी उद्योगका तीन सञ्चालकलाई जिल्ला अदालत मोरङले शुक्रबार जनही २ लाख रुपैयाँ धरौटी लिएर छाडेको छ ।

थुनछेक बहस लगतै न्यायाधीश सूर्यप्रसाद अधिकारीको इजलासले दिएको आदेश अनुरूप उद्योगका सञ्चालकहरू सुनसरी कोशी गाउँपालिका–१ का २९ वर्षीय जितेन्द्र यादव, महोत्तरीका २९ वर्षीय कैशलेन्द्र कुमार कर्ण र सप्तरी कंकालिनी नगरपालिका–१ का २७ वर्षीय ओमप्रकाश राउतले धरौटी बुझाएका थिए ।

खाद्य प्रविधि तथा गुण नियन्त्रण कार्यालयले खाद्य ऐन २०२३ अन्तर्गत ‘गुणस्तरहीन प्रशोधित पिउँने पानी उत्पादन तथा बिक्री–वितरण’ मा मुद्दा दर्ता गरेको थियो ।

उक्त कार्यालयले कानुनी प्रावधान अनुरूप ५० हजार जरिवाना, ५ वर्षसम्म कैद वा दुवै सजायको माग दाबी गरेको छ । उक्त उद्योगले ‘एच टू’ नामबाट जार र बोतलको पानी बेच्दै आएको छ । उनीहरूलाई प्रतिवादी बनाएर हाजिर जमानीमा राखिएको थियो ।

उक्त कार्यालयले १७ भदौमा उक्त पानी उद्योगको आकस्मिक अनुगमन गर्दा शौचालयको सेफ्टी ट्यांकी नजिक उत्पादनमा प्रयोग हुने बोरिङ मेसिन राखिएको फेला परेको थियो । अनुगमन टोलीले तत्कालै उद्योगको पानीको उत्पादन एवं बिक्री–वितरणमा रोक लगाएर नमुना संकलन गरेको थियो । २२ भदौमा आएको प्रयोगशाला प्रतिवेदनले उक्त उद्योगको पानीमा दिसामा पाइने जिवाणु ‘कोलिफर्म’ देखिएको ठोकुवा गर्‍यो ।

झन्डै एक महिना लगाएर उद्योग सञ्चालकहरूको बयान र अनुसन्धान प्रक्रिया पूरा गरेपछि उक्त कार्यालयले सरकारी वकिलको कार्यालयमार्फत अदालतमा बिहीबार मुद्दा दर्ता गरेको थियो । दुई दिनमै बयान र थुनछेक बहस सकेर अदालतबाट आदेश आएको हो ।

प्रकाशित : कार्तिक २, २०७६ १९:११
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT