ढिस्कोले पुरिएर सव‍-इन्जिनियरको मृत्यु

कुश्मा-७ खरेहास्थित सडक चौडा पार्न चौडाई नाप्दैगर्दा सडक माथिबाट एक्कासी माटोको ढिस्को खसेर राई पुरिएका थिए । पुरिएलगत्तै सुरक्षाकर्मी र सडकको एक्साभेटरको सहायताले राईलाई निकालिएको थियो । करिव आधा घण्टापछि ढिस्कोबाट निकालिएका राईलाई तत्काल जिल्ला अस्पताल कुश्मा पुर्‍याइएकोमा चिकित्सकले मृत घोषणा गरेको पर्वत प्रहरीले जनाएको छ ।

करिव एक सातासम्म परेको झरीका कारण गलेको माटोको ढिस्को एक्कासी खसेको हो । झरीका कारण प्रभावित बनेको काम आइतबारदेखि सुरु भएको थियो । मध्यपहाडी आयोजनाले कुश्मा बजारक्षेत्रमा सडक चार लेनको बनाउने गरी फराकिलो पारिरहेको छ । सडक चौडा पार्न नाली काट्ने भाग नाप्ने क्रममा सव-इन्जिनियर पुरिएको आयोजना कार्यालयले जनाएको छ । आयोजनाप्रमुख आशिष थापामगरले मेहनेती र इमान्दार सव-इन्जिनियर राईको निधनले आयोजनामा अपुरणीय क्षति भएको बताए ।

‘झरीले जमिन भिजेको छ, राम्रोसँग जोगिएर काम गर्नुस् भनेर हिजो मात्रै भनेको थिएँ,’ आयोजनाकै कामको सिलसिलामा काठमाडौं रहेका थापामगरले भने, ‘आज एक्कासी उहाँको यस्तो दुर्घटनाले बिक्षिप्त बनाएको छ ।’ राई आयोजनाको कन्ट्याक्टर लामा कन्स्ट्रक्सन तर्फका प्राविधिक भएको आयोजना कार्यालयले जनाएको छ ।