होमस्टेमा धमाधम बुकिङ

आश गुरुङ, सम्झना रसाइली

(लमजुङ/तनहुँ) — होमस्टे जिल्लाको उपमा पाएको लमजुङमा पर्यटकीय सिजनका लागि होमस्टे धमाधम बुकिङ हुन थालेका छन् । बुकिङसँगै पर्यटक आउने क्रम पनि सुरु भएको छ । मौसममा सुधार आएसँगै पर्यटक आउन थालेको होमस्टे सञ्चालकले जनाएका छन् ।

ZenTravel

स्मार्ट भिलेजउन्मुख घलेगाउँमा सबैभन्दा बढी दसैं र तिहारबीचको समय बुकिङ भएको छ ।

अहिले दैनिक १५ बढी पर्यटक आउने गरेको र कहिलेकाहीं १ सय कट्ने गरेको पर्यटन व्यवस्थापन समिति, ग्रामीण पर्यटन घलेगाउँका कार्यालय सविच दीर्घ घलेले बताए । ‘हिजोअस्ति मात्रै १ सय पर्यटक आएर फर्किए । दैनिक कम्तीमा १५ बढी पर्यटक आउने गरेका छन्,’ उनले भने ।

उनका अनुसार गाउँका ३५ होमस्टेमा १ सय ९२ जनाको क्षमता छ । गत वर्ष सिजनमा दैनिक ३ सय बढी पर्यटक आएका उनले सुनाए ।

‘पर्यटक धेरै आउँदा वरपर व्यवस्थापन गर्नुपर्ने हुन्छ ।हामीले होमस्टे सञ्चालन नगरिएका घरमा समेत पर्यटक राख्यौं,’ उनले भने, ‘अहिले स्मार्ट भिलेज बन्दै गएपछि पर्यटकको आकर्षण भनै बढेको छ । यसपटक विगतको भन्दा बढी पर्यटक आउने सम्भावना छ ।’ उनका अनुसार पोखरा, चितवन, काठमाडौंलगायत ठाउँबाट होमस्टे बुकिङ गरिएको हो ।

पर्यटन व्यवस्थापन समिति काउलेपानीका अध्यक्ष देवबहादुर गुरुङका अनुसार केही पर्यटकले आफ्नो बुकिङको सेवा लिएर फर्किएका छन् । १५ घरमा होमस्टेको सुविधा छ । ‘असोज महिना लगभग धेरै दिन बुकिङ छ । हिजो अस्ति मात्रै ३/४ दिन बुकिङकै सुविधा लिएर पर्यटक फर्किएका छन्,’ उनले भने, ‘पर्यटक आउने क्रम सुरु भएको छ ।’

उनले काठमाडौं, पोखरा, बुटवल, दमौलीबाट बुकिङ गरिएको बताए । ‘बुकिङ हुने क्रम जारी छ । बुकिङ गरेपछि आउने पर्यटकलाई पनि ढुक्क भयो । हामीलाई पनि तयारीका लागि सहज भयो,’ उनले भने ।

पर्यटकीय गाउँ भुजुङ, राइनासकोट, सिउरुङलगायत गाउँका होमस्टेमा पनि बुकिङ सुरु भएको छ । पर्यटन व्यवस्थापन उपसमिति भुजुङका अध्यक्ष तुलबहादुर गुरुङका अनुसार दसैं–तिहारका समयका लागि होमस्टे बुकिङ भइरहेको छ । गाउँका १८ घरमा होमस्टे रहेको र पर्यटक आउन थालेको उनले सुनाए ।

राइनास होमस्टे व्यवस्थापन समितिका उपाध्यक्ष विष्णु गुरुङका अनुसार पर्यटकीय सिजनका लागि होमस्टेको बुकिङ सुरु भएको छ । दसैं र तिहारको बिदामा गाउँ घुम्न आउने र होमस्टेमा आउन रुचाउने पर्यटकले होमस्टे बुकिङ गर्न थालेको उनले बताइन् । भूकम्पपछि पुनर्निर्माण गरिएको राइनासकोटको १४ घरमा होमस्टे सञ्चालन गरिएको छ । ‘घर पुनर्निर्माणपछि हामीले होमस्टे चलायौं । सिजनमा पर्यटकको चाप छ । अहिले बुकिङ हुन थालेको छ,’ उनले भनिन् ।

गण्डकी प्रदेश सरकारले समृद्धिको पहिलो आधारमा पर्यटनलाई राखेको छ । तर, पर्यटन प्रवर्द्धनका कार्यक्रम भने खासै सञ्चालनमा आउन सकेको छैनन् । गण्डकी प्रदेशमा २ सय ७३ दर्ता भएका होमस्टेमध्ये लमजुङमा घलेगाउँसहित २३ गाउँ छन् । होमस्टे प्रवर्द्धन, प्रचारप्रसार, पर्यटकलाई ल्याउने वातावरण, सडक, बिजुलीलगायत क्षेत्रमा गण्डकी प्रदेश सरकारको ध्यान नपुगेको होमस्टे सञ्चालकको गुनासो छ ।

तनहुँको भानु नगरपालिका–१३ मिर्लुङस्थित टुटेपानीका ननित गुरुङ दुई वर्ष वैदेशिक रोजगारीमा गए । तर भनेजस्तो भएन । अब उनलाई विदेश जान मन छैन । गाउँमै घरपरिवार, इष्टमित्रसँग रमाउँदै होमस्टे सञ्चालन गरी राम्रो आम्दानी भएपछि अब फेरि विदेश जाने सोच नभएको २६ वर्षीय गुरुङ बताउँछन् ।

उनले भने, ‘गाउँलाई पर्यटकीय हिसाबमा अगाडि लैजाँदा यति राम्रो कमाइ हुन्छ भने अरूको देशमा गएर किन रगत–पसिना बगाउनु । दुई वर्ष विदेशमा दुःख गरे, अब आफ्नै गाउँमा बसेर यही व्यवसायलाई निरन्तरता दिन्छु ।’ होमस्टेबाट आएको धेरै–थोरै पैसाले गाउँमा सपरिवार हाँसीखुसी बस्न पाएकोमा उनी दंग छन् ।

यसैगरी वैदेशिक रोजगारीमा १४ वर्ष बिताएका ५० वर्षीय वीरबहादुर गुरुङ पनि अहिले गाउँमा होमस्टे सञ्चालन भएपछि विदेशलाई माया मारेका छन् । ‘विदेशमा के–के नै हुन्छ भनेर घरपरिवारबाट टाढा रही धेरै दुःख गरें,’ उनले भने, ‘त्यहाँ गरेको दुःख गाउँमै गरेको भए बिदेसिनुपर्ने थिएन ।’ आफ्नै गाउँमा घरपरिवारसँगै बसेर पनि मासिक १० देखि १५ हजार रुपैयाँसम्म आम्दानी भइरहेको उनले सुनाए ।

ग्रामीण क्षेत्रका धेरै युवा वैदेशिक रोजगारीमा जाने क्रम बढ्दो छ । आफ्नो गाउँठाउँमा स्वरोजगारको कुनै अवसर नभएको भन्दै खाडी मुलुक धाउनेको लर्कोनै लाग्छ । टुटेपानीबाट रोजगारीको खोजीमा थुप्रै युवा विदेशिएका छन् । यतिबेला भने ती युवा गाउँमै फर्केर उद्यममा सक्रिय हुन थालेका छन् । सहरकेन्द्रित पर्यटनलाई ग्रामीण क्षेत्रमा आकर्षित गर्ने लक्ष्यसाथ टुटेपानी गाउँमा होमस्टे (घरबास) सञ्चालनमा ल्याइएको छ ।

२०७२ मा सामुदायिक होमस्टे सञ्चालनपछि गाउँको मुहार फेरिंदै गएको छ । सेवासुविधाको खोजी गर्दै बसाइसराइ तथा रोजगारीका लागि युवा विदेश धाउन थालेपछि उजाडिँदै गएको गाउँमा पछिल्लो केही वर्षदेखि पुनः चहलपहल बढ्न थालेको छ । होमस्टेले गाउँमै आम्दानी हुन थालेपछि आधा दर्जनभन्दा बढी युवा गाउँमै फर्किएका छन् ।

विदेशमा आफूले झेलेको दुःख, कष्ट सम्झिँदै वीरबहादुरले अब होमस्टेलाई उत्कृष्ट बनाउन लाग्ने बताए । ‘गाउँकै मकै, ढिंडो र गुन्द्रक खाएर परिवारसँग यहीं बस्छु । मेरा छोरानातिलाई पनि यही सिकाउँछु,’ उनले भने ।

ननित र वीरबहादुर मात्र नभई अन्य केही युवासमेत वैदेशिक रोजगारी छाडी गाउँमा रम्न थालेका छन् । उनीहरूले यही रोजगारी पनि पाएका छन् ।

प्रकाशित : आश्विन ६, २०७६ १२:१३
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

पर्यटकलाई ‘प्रिभिलेज कार्ड’

प्रतीक्षा काफ्ले

(गण्डकी) — आन्तरिक तथा बाह्य पर्यटकलाई डाक्नका लागि गण्डकी प्रदेश सरकारले सहुलियत (प्रिभिलेज कार्ड) को व्यवस्था गरेको छ । पर्यटन भ्रमण वर्षलाई लक्षित गर्दै सरकारले यस्तो योजना ल्याएको हो । 

आन्तरिक पर्यटन वर्ष मनाइरहँदा बढीभन्दा बढी पर्यटक ल्याउन र आगमनका लागि प्रोत्साहन गर्नका लागि सरकारले प्रिभिलेज कार्ड उपलब्ध गराउने भएको हो । उद्योग, पर्यटन, वन तथा वातावरणमन्त्री विकास लम्सालले सरकारसँग सहमति भएका जुनसुकै स्थानमा पनि कार्ड देखाएपछि मात्र छुट पाइने बताए ।

‘होमस्टे जाने पर्यटक हुन् या होटल रेस्टुरेन्टमा,’ मन्त्री लम्सालले भने, ‘यातायातका साधनदेखि साहसिक खेलसम्म सहभागी हुने पर्यटकलाई कार्ड दिन्छौं । सोही कार्डका आधारमा व्यवसायीले छुट दिनुहुन्छ ।’ पर्यटन वर्षलाई लक्षित गर्दै सरकारले विभिन्न सेवामा निश्चित छुटसहितको व्यवस्था मिलाउन लागेको मन्त्रालयले जनाएको छ । मन्त्री लम्सालले उक्त कार्ड गत बिहीबार सार्वजानिक गरेका हुन् ।

‘भ्रमण वर्ष मनाइरहँदा सरकारले पर्यटकलाई के दियो त भन्ने प्रश्न आउँछ,’ मन्त्री लम्साल भन्छन्, ‘हामीले योजनाअनुरूप तोकिएको समयमा बोलाइने पाहुनाका लागि केही न केही सुविधा दिनैपर्छ । यसै क्रममा पहिलो प्राथमिकतामा सहुलियतको व्यवस्था गरेका हौ ।’ आन्तरिक पर्यटन वर्ष घोषणा गरेको ९ महिना बितेपछि सरकारले कार्डको योजना पहिलोपटक अघि सारेको हो ।

प्याराग्लाइडिङमा १० प्रतिशत छुटको व्यवस्था गरेको मन्त्रालयका पर्यटन महाशाखा प्रमुख कीर्तनराज पौडेलले जनाए । यसैगरी होटलमा १५ र रेस्टुरेन्टमा १० प्रतिशत छुटको व्यवस्था गरिएको छ । पौडेलका अनुसार होटल एसोसिएसन अफ नेपाल (हान) मा संगठित भएका होटल र रेस्टुरेन्ट एन्ड बार एसोसिएसन अफ नेपाल (रेवान) मा आबद्ध रेस्टुरेन्टले उक्त सहुलियत दिनेछन् । टुर प्याकेज र यातायात भाडादरमा १५, ट्रेकिङका लागि आवश्यक साधन खरिदमा १० र गार्मेन्ट खरिदमा समेत १० प्रतिशत सहुलियत पाइने व्यवस्था गरिएको पौडेलले बताए ।

सहुलियतका लागि सम्बद्ध संस्थासँग सम्झौता गरिसकिएको उनले बताए । ट्रेकिङ गाइडको सेवा भने निःशुल्क उपलब्ध गराइने भएको मन्त्रालयले बताएको छ । मन्त्रालयका अनुसार ट्रेकिङ एसोसिएसन अफ नेपाल (टान) गण्डकी प्रदेश कार्यालयमा सूचीकृत पर्यटक गाइडमार्फत सेवा दिइने गरी सम्झौता गरिएको छ ।

सरकारले आन्तरिक भ्रमण वर्षमा मात्र १५ लाख पर्यटक भित्र्याउने योजना सार्वजनिक गरेको छ । मन्त्रालयले आन्तरिक वर्षको समय धेरै नभएकाले र पहिलोपटक नेपालीलाई पनि घुम्ने बानीको विकास गराउने लक्ष्यले विदेशीभन्दा पनि स्वदेशीलाई नै प्राथमिकतामा राखेको बताएको छ । १० प्रतिशत पर्यटकको संख्या वृद्धि भएको सरकारको दाबी छ । सरकारले सन् २०१९ लाई आन्तरिक पर्यटन वर्ष, २०२० लाई छिमेकी मुलुकका पर्यटन आकर्षण वर्ष, सन् २०२१ लाई पर्यटन पूर्वाधार निर्माण वर्ष र सन् २०२२ लाई अन्तर्राष्ट्रिय पर्यटन भ्रमण वर्षको रूपमा घोषणा गरेको छ ।

भ्रमण वर्ष निजी क्षेत्रको जिम्मेवारी भए पनि सरकार सकरात्मक रूपमा सहयोग गर्ने उद्देश्यले यसको नेतृत्व लिएर काम गर्दै आएको लम्सालको भनाइ छ । सहुलियत कार्ड पर्यटनसँग सम्बद्ध निजी संस्थामार्फत वितरण गरिने महाशाखा प्रमुख पौडेलले बताए ।

‘मन्त्रालयबाट आयोजना हुने पर्यटन प्रवर्द्धनात्मक कार्यक्रममा पनि वितरण हुनेछ,’ उनले थपे । यही असोज ९ देखि प्रदेश सरकार प्रादेशिक सरकारलाई निम्तोका लागि भ्रमणमा निस्कने भएको छ । भ्रमण टोलीमा मन्त्री, सांसद, व्यवसायी, कलाकार, पत्रकार र गैरसरकारी संस्थाबाट प्रतिनिधित्व हुनेछ । आन्तरिक भ्रमण वर्षको प्रचारप्रसार गर्नका लागि प्रवर्द्धनात्मक कार्यक्रमसहित जाने पर्यटन वर्ष २०१९–२२ कार्यक्रम संयोजक जुद्धबहादुर गुरुङले बताए ।

‘हाललाई चारवटा प्रदेशमा मात्र यो कार्यक्रम तय गरिएको छ,’ गुरुङले भने, ‘प्रदेश ५ को बुटवल र भैरहवाको बीचमा अवस्थित मणिग्राम, प्रदेश २ को वीरगन्ज, प्रदेश १ को विराटनगर र प्रदेश ३ को काठमाडौंमा कार्यक्रम हुनेछ । पाल्पाको तानसेन, नवलपुरको अमलटारी, चितवनको भरतपुर, मकवानपुरको हेटौंडा, धनुषाको जनकपुरधाम, सुनसरीको धरान र झापाको विर्तामोडमा विभिन्‍न कार्यक्रम गर्ने संयोजक गुरुङले बताए । सरकारले भ्रमण वर्षका लागि चालु आर्थिक वर्षमा ३६ लाख रुपैयाँ बजेट विनियोजन गरेको छ ।

प्रकाशित : आश्विन ६, २०७६ १२:१०
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
ADVERTISEMENT
×