पहिरोले कालीगण्डकी कोरिडोर ठप्प

कोरिडोरको दर्जनौ स्थानमा पहिरो खसेर यातायात अवरुद्ध भएको बागलुङ नगरपालिका–१४ नारायणस्थानका विक्रम पौडेलले बताए । कोरिडोरमा पुल निर्माणको क्रममा जथाभावी ढुंगा उत्खनन् गर्दा बाढी पसेर २० रोपनी बढी जमिनमा लगाएको धान पुरिएको उनले बताए ।

इन्जिनियर र ठेकेदारले पर्खाल लगाइदिने सर्तमा ढुंगा उत्खनन् गरेपछि बाढीले दिशा परिवर्तन गरेर खेत पुरेको उनले आरोप लगाए ।

पहिरोले सवारी साधन चल्न सकेका छैनन् । बानपा १२ मा खसेको पहिरोले कोरिडोर छेउको एक होटल पुरिएको छ । राजु सुवेदीको होटल पुरिँदा मानवीय क्षति नभए पनि लाखौं धनमाल नोक्सान भएको छ । प्रहरी उपरीक्षक नवराज भट्टका अनुसार कोरिडोरमा अहिले सवारी साधन पूरै ठप्प छन् ।

सेनाले निर्माण गरिरहेको यो कोरिडोरमा दर्जनौ सवारी नियमित चल्छन् । बलेवा र जैमिनी नगरपालिकातर्फ जाने ग्रामीण सडक निर्माणाधीन छ ।

मंगलबार बिहानैदेखि कुनै पनि सवारी दक्षिण क्षेत्रमा जान सकेको छैनन् । सवारी नचल्दा अधिकांशले पर्वत सदरमुकाम कुश्मा गएर पैदल यात्रा गर्न बाध्य भएको जैमिनी–१ का तारानाथ आचार्यले बताए ।