लोकमार्ग दैनिक ८ घण्टा बन्द

कान्तिपुर संवाददाता

बागलुङ — मध्यपहाडी लोकमार्गको बागलुङ खण्ड दैनिक ८ घण्टा बन्द हुने भएको छ । खहरे, अक्षेतेलगायतका स्थानमा पहरा फोड्ने र बाटो चौडा पार्न दैनिक यातायात बन्द गर्नुपरेको आयोजनाका प्रमुख आशिष थापाले बताए । 

हरेक दिन बिहान साढे ७ बजेदेखि साढे ९ बजेसम्म २ घण्टा र दिउसो साढे १० देखि बेलुकी ५ बजेसम्म सडक बन्द गर्न लागिएको हो ।

आकस्मिक सेवाका एम्बुलेन्स आएमा बिकल्प दिने गरी ट्रयाक खोलेर नियमित काम गरिने उनले बताए । यस खण्डमा ठूला पहरा छन् । ‘पहरो फोड्नका लागि सडक बन्द गरेर काम गर्दा एक महिनाभित्र ट्रयाक खोल्न सकिन्छ,’ भारत सिद्धिसाई प्रकाश संयुक्त निर्माण कम्पनीका इन्जिनियर मिहिर सिंहले भने, ‘बस र ट्रकका लागि भने बिहान र बेलुकीको समय मात्र यात्रा गर्न पाउनेछन् ।’

वर्षौंदेखि जीर्ण सडकले सास्ती खेपेका यात्रीको आलोचना बढेपछि प्रमुख जिल्ला अधिकारी लुकबहादुर क्षेत्रीले आयोजना प्रमुखलाई बोलाएर काम गर्न भनेका थिए । बुधबारदेखि असोज १७ सम्म एक महिना काम गरेर पहरो फोड्न निर्देशन उनले दिएका छन् ।

सडक बन्द गर्दा आउने सुरक्षा चुनौतीका लागि जिल्ला प्रहरीले टोलीसमेत खटाउनेछ । सदरमुकाम बागलुङ बजारदेखि घोडाबाँधेको २५ किमि खण्ड अहिले पनि जीर्ण छ । यहाँ एकतर्फी सवारीसाधन चल्नसमेत सास्ती खेप्नुपर्छ । यहाँ ठेक्का लिएका दुइवटा कम्पनीले काम छाडेर हिंडेपछि वर्षौंदेखि सडक अलपत्र परेको थियो ।

गत वर्ष ठेक्का लिएका कम्पनीले भने प्रशासनिक सहयोग अभाव, मुआब्जा विवाद र खानेपानी आयोजनाको अवरोधका कारण काम गर्न नसकेको बताएका थिए । सदरमुकामका लागि आएको खानेपानी पाइप सार्न आयोजनाले ३३ लाख रुपैयाँ दिएको थियो ।

‘उक्त रकम लगेको एक वर्षसम्म पाइपलाइन नसारिएकाले काम गर्न कठिन भएको हो,’ आयोजनाका इन्जिनियर रामप्रसाद सुवेदीले भने, ‘स्टिमेटअनुसारको रकम गएकाले तत्काल पाइपलाइन सार्न पनि भनेका छौं ।’ आगामी फागुनसम्म कालोपत्रे गरिसक्ने गरी आयोजना र निर्माण कम्पनीले काम थाल्ने उनले बताए । यो सडक खण्डको शून्य मानिएको बागलुङको उपल्लाचौर खण्डमा पनि प्रशासनिक झमेला र मुद्दाले काम रोखिएको थियो । ती समस्या सुल्झेपछि काम थालिएको हो ।

आयोजनाले सडकको दायाँबायाँ २५ मिटर चौडामा संरचना बनाउन रोक लगाएको छ । यो खण्ड दसैंअघि नै सडक चाक्लो बनाउने काम सक्ने र त्यसपछि ग्राभेल थाल्ने आयोजना प्रमुखले प्रतिबद्धता जनाए । ‘काममा अब ढिला हुँदैन,’ थापाले भने, ‘पहराफोड्दा यातायातमा अवरोध हुन नदिन डाइभर्सन पनि बनाइएको छ ।’

बागलुङ नगरपालिका–३ को खहरे र काठेखोला गाउँपालिका–१ को पालातर्फको खण्डमा हुने अवरोध हटाउन विकल्पको बाटो निर्धारण गरिएको उनले बताए ।तीन वर्षअघि ट्रयाक खोल्न ठेक्का लिएको एमके कन्स्ट्रक्सन प्रालिले कैयौं स्थानमा कामै नगरी भुक्तानी लिएर काम छाडेपछि गत वर्षदेखि अर्को ठेक्का लगाइएको थियो ।

‘काम नगरेको खण्डमा कालो सूचीमा लैजानेसम्मको अधिकार भए पनि बोलाएर काम गर्न लगाएका छौं,’ इन्जिनियर रामप्रसाद सुवेदीले भने, ‘चाडपर्वमा आउने जोखिम न्यूनीकरण र दैनिक आवागमनमा असर नपार्न पनि भनेका छौं ।’

प्रकाशित : भाद्र १७, २०७६ ०९:५२
प्रतिक्रिया
पठाउनुहोस्

कर्मचारी अभावले बिरामीलाई सास्ती

कान्तिपुर संवाददाता

तनहुँ — सदरमुकामस्थित दमौली अस्पतालमा रहेको प्रयोगशालामा दरबन्दीअनुसारका कर्मचारी नहुँदा बिरामीले सास्ती झेल्नुपरेको छ । बिरामीलाई सामान्य रगत परीक्षणका लागि पनि घण्टौं समय बिताउनुपर्ने बाध्यता छ । 

यतिबेला मौसमी फ्लुका बिरामी बढेका छन् । अस्पतालमा दैनिक करिब १ सय देखि २ सय ५० जनासम्म बिरामी आउने अस्पतालका मेडिकल सुपरिन्टेन्डेन्ट सुनील पौड्याल बताउँछन् । बिरामीले अस्पतालमा डाक्टर भेट्नेदेखि रगत, दिसापिसाबलगायत परीक्षण गर्न घण्टौं समय खर्चनुपर्ने अवस्था छ ।

अझ ग्रामीण क्षेत्रबाट आउने बिरामीले समयमै ल्याब परीक्षणको रिपोर्ट नपाउँदा २/३ दिनसम्म खर्चनुपर्ने बाध्यता छ । ‘भिड भएका कारण ढिला हुने होला भनेर बिहानै ९ बजे नै अस्पताल आएको डाक्टर नआएर १२ बजेतिर बल्ल जँचाउन पाइयो,’ व्यास नगरपालिका–५ का चित्रबहादुर दरैले भने, ‘स्वास्थ्य परीक्षण र ल्याबमा पालो कुर्दैमा दिन बित्ने गरेको छ ।’

व्यास–१२ कलेस्तीबाट आमाको सुगरपरीक्षणका लागि आएकी चन्द्रकला कार्कीले ल्याब रिपोर्ट आउन बढी समय लाग्ने बताइन् । ‘पहिले पोखरा जान्थ्यौं । जिल्लामै राम्रो सेवा पाइन्छ भन्ने सुनेर आएका हौं,’ कार्कीले भनिन्, ‘पोखरा जाने आउने भाडा मात्रै जोगियो । समय यतै बढी लाग्यो ।’

प्रयोगशालाकी ल्याब असिस्टेन्ट हेमकुमारी दरै बिरामीलाई समयमै रिपोर्ट दिन नसकेको स्विकार्छिन् । ल्याबमा पानीसमेत नहुँदा कार्यालय सहयोगी रुपा भट्टले बाल्टीमा ल्याएर काम चलाउँछिन् । ‘चैतदेखि ल्याबमा पानी छैन,’ उनले भनिन्, ‘प्रत्येकपटक टेस्टट्युब सफा गर्नुपर्छ । पानी पर्याप्त नभएकाले टेस्टट्युबमा सेतो दाग बस्ने भएकाले बिरामीको रगतलगायत अन्य बायोलोजिकल टेस्ट गर्दा रिपोर्ट गलत आउँछ । त्यसलाई पुनः परीक्षण गर्नुपर्ने हुन्छ ।’

यसले सेवाग्राहीलाई समयै रिपोर्ट दिन नसकिएको र ल्याबमा आवश्यक तापक्रमको पनि व्यवस्था नहुँदा समस्या झेल्नुपरेको उनले बताइन् ।

ल्याब टेक्निसियन इन्चार्ज सुशीला कार्कीले २ जना ल्याब टेक्निसियन आवश्यक भए पनि एक जनाले मात्रै काम गर्दा ढिला भएको बताइन् । यस विषयमा अस्पताल प्रशासनलाई जानकारी गराए पनि सुधारका लागि काम नभएको उनको भनाइ छ । ‘ल्याब जस्तो अवस्थामा हुनपर्ने हो, त्यो पनि छैन,’ उनले भनिन्, ‘पानी अभाव छँदै छ । गर्मीमा तापक्रम धेरै र जाडामा कम हुँदा लिएको नमुना बिग्रने जस्ता समस्या झेल्नुपरेको छ ।’

अस्पतालमा दरबन्दीअनुसार कर्मचारी नहुँदा भिडियो एक्स–रे पनि नियमित प्रयोगमा आउन सकेको छैन । सातामा मंगलबार र बिहीबार मात्र भिडियो एक्सरे हुन्छ ।

प्रकाशित : भाद्र १७, २०७६ ०९:५१
पूरा पढ्नुहोस्
प्रतिक्रिया
पठाउनुहोस्