कर्मचारी अभावले बिरामीलाई सास्ती

कान्तिपुर संवाददाता

तनहुँ — सदरमुकामस्थित दमौली अस्पतालमा रहेको प्रयोगशालामा दरबन्दीअनुसारका कर्मचारी नहुँदा बिरामीले सास्ती झेल्नुपरेको छ । बिरामीलाई सामान्य रगत परीक्षणका लागि पनि घण्टौं समय बिताउनुपर्ने बाध्यता छ । 

यतिबेला मौसमी फ्लुका बिरामी बढेका छन् । अस्पतालमा दैनिक करिब १ सय देखि २ सय ५० जनासम्म बिरामी आउने अस्पतालका मेडिकल सुपरिन्टेन्डेन्ट सुनील पौड्याल बताउँछन् । बिरामीले अस्पतालमा डाक्टर भेट्नेदेखि रगत, दिसापिसाबलगायत परीक्षण गर्न घण्टौं समय खर्चनुपर्ने अवस्था छ ।

अझ ग्रामीण क्षेत्रबाट आउने बिरामीले समयमै ल्याब परीक्षणको रिपोर्ट नपाउँदा २/३ दिनसम्म खर्चनुपर्ने बाध्यता छ । ‘भिड भएका कारण ढिला हुने होला भनेर बिहानै ९ बजे नै अस्पताल आएको डाक्टर नआएर १२ बजेतिर बल्ल जँचाउन पाइयो,’ व्यास नगरपालिका–५ का चित्रबहादुर दरैले भने, ‘स्वास्थ्य परीक्षण र ल्याबमा पालो कुर्दैमा दिन बित्ने गरेको छ ।’

व्यास–१२ कलेस्तीबाट आमाको सुगरपरीक्षणका लागि आएकी चन्द्रकला कार्कीले ल्याब रिपोर्ट आउन बढी समय लाग्ने बताइन् । ‘पहिले पोखरा जान्थ्यौं । जिल्लामै राम्रो सेवा पाइन्छ भन्ने सुनेर आएका हौं,’ कार्कीले भनिन्, ‘पोखरा जाने आउने भाडा मात्रै जोगियो । समय यतै बढी लाग्यो ।’

प्रयोगशालाकी ल्याब असिस्टेन्ट हेमकुमारी दरै बिरामीलाई समयमै रिपोर्ट दिन नसकेको स्विकार्छिन् । ल्याबमा पानीसमेत नहुँदा कार्यालय सहयोगी रुपा भट्टले बाल्टीमा ल्याएर काम चलाउँछिन् । ‘चैतदेखि ल्याबमा पानी छैन,’ उनले भनिन्, ‘प्रत्येकपटक टेस्टट्युब सफा गर्नुपर्छ । पानी पर्याप्त नभएकाले टेस्टट्युबमा सेतो दाग बस्ने भएकाले बिरामीको रगतलगायत अन्य बायोलोजिकल टेस्ट गर्दा रिपोर्ट गलत आउँछ । त्यसलाई पुनः परीक्षण गर्नुपर्ने हुन्छ ।’

यसले सेवाग्राहीलाई समयै रिपोर्ट दिन नसकिएको र ल्याबमा आवश्यक तापक्रमको पनि व्यवस्था नहुँदा समस्या झेल्नुपरेको उनले बताइन् ।

ल्याब टेक्निसियन इन्चार्ज सुशीला कार्कीले २ जना ल्याब टेक्निसियन आवश्यक भए पनि एक जनाले मात्रै काम गर्दा ढिला भएको बताइन् । यस विषयमा अस्पताल प्रशासनलाई जानकारी गराए पनि सुधारका लागि काम नभएको उनको भनाइ छ । ‘ल्याब जस्तो अवस्थामा हुनपर्ने हो, त्यो पनि छैन,’ उनले भनिन्, ‘पानी अभाव छँदै छ । गर्मीमा तापक्रम धेरै र जाडामा कम हुँदा लिएको नमुना बिग्रने जस्ता समस्या झेल्नुपरेको छ ।’

अस्पतालमा दरबन्दीअनुसार कर्मचारी नहुँदा भिडियो एक्स–रे पनि नियमित प्रयोगमा आउन सकेको छैन । सातामा मंगलबार र बिहीबार मात्र भिडियो एक्सरे हुन्छ ।

प्रकाशित : भाद्र १७, २०७६ ०९:५१
ADVERTISEMENT
प्रतिक्रिया
पठाउनुहोस्

संस्कृति जोगाउँदै स्थानीय तह

मौलिक तीज भाका संरक्षण गर्न रामपुर नगरपालिकाद्वारा प्रथम उपप्रमुख तीज गीत प्रतियोगिता आयोजना 
कान्तिपुर संवाददाता

पाल्पा — तानसेन नगरपालिका–७ ले सिद्धार्थ राजमार्ग छेउ प्रवासमा सोमबार खुला तीज गीत प्रतियोगिता आयोजना गरेको छ । वडाले चाडपर्वका लागि छुट्याएको बजेटबाट कार्यक्रम आयोजना गरेको हो ।  

संस्कृतिलाई लोप हुनबाट जोगाउने प्रयासस्वरूप कार्यक्रम आयोजना गरिएको वडाध्यक्ष मुक्तिराज जीसीले बताए । वडाले तीजका लागि भनेर २० हजार रुपैयाँ बजेट विनियोजन गरेको थियो । सिद्धार्थ राजमार्ग छेउ प्रवासमा सोमबार खुला तीज गीत प्रतियोगिता आयोजना गरेको छ ।

उसले रोपाइँ जात्राका लागि पनि त्यत्ति नै बजेट छुट्याएको छ । वंशगोपालको फागु, श्रीकृष्ण जन्माष्टमी र शिवरात्रिका लागि पनि बजेट विनियोजन गरिएको उनले बताए । संस्कृति हराउँदै गएकाले यसरी बजेट छुट्याउनु परेको वडाध्यक्ष मुक्तिराज जीसीले बताए । ‘स्थानीय तहबाट सहयोग भएन भने संस्कृति बचाउन नै समस्या छ,’ उनले भने, ‘अहिलेकोपुस्तालाई कुनै मतलब छैन ।’

तिनाउ गाउँपालिकाले यस वर्ष ६ वटै वडालाई २५ हजारका दरले तीजका लागि पैसा छुट्याएको हो । गाउँपालिका अध्यक्ष ओमबहादुर घर्तीका अनुसार गाउँपालिका स्तरीय महिला समन्वय समितिको आयोजनामा तीज गीत प्रतियोगिता गरेर उक्त रकम खर्च गरेका हुन् । कचलमा सात समूहले भाग लिए ।

दोभानमा नौ, झुम्सामा ६ समूहले भाग लिएका थिए । सत्यवतीमा सात, कोलडाँडामा आठ, मस्याममा नौ समूहले भाग लिएको उपाध्यक्ष दमयन्ती थापाले बताइन् । ‘तीज संस्कृतिका लागि बजेट चाहियो भन्ने माग आयो,’ प्रमुख प्रशासकीय अधिकृत ज्ञानुप्रसाद पनेरुले भने, ‘कार्यपालिकाको बैठकबाट नै बजेटछुट्याइएको हो ।’ तिनाउमा मात्र होइन, अन्य स्थानीय तहमा पनि टोल, वडा हुँदै गाउँपालिका स्तरीय प्रतियोगिता भएका छन् ।

मौलिक तीज भाका संरक्षण गर्न रामपुर नगरपालिकाले प्रथम उपप्रमुख तीज गीत प्रतियोगिता गर्‍यो । ‘उपप्रमुखको ध्येय, विपन्नलाई आय, पीडितलाई न्याय’ नारा नै तय गरेर प्रतियोगिता गरेको हो । प्रतियोगितामा नगरका ३१ संघसंस्था र महिला समूहले भाग लिएका थिए ।

मौलिक गीतको संरक्षणलाई प्राथमिकता दिएको उपाध्यक्ष विष्णुकुमारी आचार्य घिमिरेले बताइन् । ‘वैदेशिक रोजगारीले परिवार र समाजमा पारेको प्रभावका विषयलाई गीत बनाए,’ उनले भनिन्, ‘समाजको विकास, परिवर्तन र समाजमा बढेको विकृतिलाई पनि गीतमार्फत पोखेका छन् ।’

रामपुर नगरपालिकाका नगर प्रमुख रमणबहादुर थापाले महिलाको पर्वका रूपमा तीज भए पनि महिला र पुरुष मिलेर मनाउने गरेको बताए । ‘मौलिक भाकाको संरक्षण र महिला दिदीबहिनीबीचको सम्बन्ध सुमधुर बनाउन यसले सहयोग गरेको छ,’ उनले भने । मौलिक तीज भाका संरक्षण र रामपुर क्षेत्रलाई चिनाउन सफल कलाकार लक्ष्मी तिवारीलाई त्यस अवसरमा सम्मान गरिएको थियो ।

रैनादेवी छहराले पनि गाउँपालिका स्तरीय तीज गीत प्रतियोगिता गरेको छ । कला, संस्कृति र परम्पराको संरक्षण गर्न गाउँपालिकामा प्रतियोगिता राखिएको हो । ‘कला र संस्कृति जोगाउन वडाबाट सहभागिता गराएर गत वर्ष पनि प्रतियोगिता आयोजना गरिएको थियो,’ गाउँपालिका उपाध्यक्ष चेतकुमारी थापाले भनिन्, ‘कला र संस्कृतिलाई बचाउन स्थानीय तह नै अग्रसर हुनुपर्ने देखिएको छ ।’

प्रतियोगितामा आठ वडाका १३ समूह सहभागी थिए । सबैलाई सहभागी गराउन गाउँपालिकाले वडा स्तरीय तीज गीत प्रतियोगिता आयोजना गरेको अध्यक्ष रामबहादुर कार्कीले बताए । ‘मौलिक गीतलाई प्राथमिकता दिएका छौं,’ उनले भने, ‘परम्परालाई भुल्न नदिन पनि यो सहयोगी बनेको छ ।’ यसले मौलिक र पुराना तीज भाका संरक्षण गर्न सहयोग पुगेको प्रमुख प्रशासकीय प्रमुख ज्ञानुराम पन्थीले बताए ।

बगनासकाली गाउँपालिकाले पनि विभिन्न वडामा तीज विशेष कार्यक्रम गरेको छ । चिर्तुङधारा, नायरनमतलेसलगायतका वडाले पनि यस्तो कार्यक्रम गरेका छन् । गाउँपालिका अध्यक्ष कृष्णप्रसाद बस्यालले मौलिक तीज संस्कृति जोगाउनु पर्ने अवस्था आएको बताए ।

‘परम्परागत तीजभन्दा पनि आधुनिकताले बढी प्राथमिकता पाएको छ,’ उनले भने, ‘त्यसैले पनि परम्परागत संस्कृति संरक्षणमा सहयोग गरिएको हो ।’ यहाँका अन्य स्थानीय तहले पनि तीज संस्कृतिका नाममा बजेट खर्च गरेका छन् । अधिकांश स्थानीय तहमा संस्कृति बचाउन विभिन्न प्रतियोगितार प्रदर्शनी गरिएको हो ।

प्रकाशित : भाद्र १७, २०७६ ०९:५०
पूरा पढ्नुहोस्
प्रतिक्रिया
पठाउनुहोस्
ADVERTISEMENT
ADVERTISEMENT