ग्रामीण सडकमा सास्ती

बजेट सक्नकै लागि विस्तृत अध्ययनबिना जेठ असारमा निर्मित सडकले हिउँदमा धूलो र बर्खामा हिलो
आश गुरुङ

(लमजुङ) — सरकारले जिल्लामा पठाउने अधिकांश बजेट सडक योजनामा खर्च हुने गरेको छ । जेठ असारमा निर्माण तथा मर्मत गरिएका सडक अहिले प्रयोगविहीन छन् ।

लमजुङको बेंसीसहर–भुजुङ सडकअन्तर्गत बेंसीसहर नगरपालिका ६, पुमागाउँ नजिकै हिलोमा फसेको जिप । तस्बिर : आश/कान्तिपुर

हिउँदमा सामान्य मर्मत गरेर सञ्चालन हुने सडक बर्खायाम अगाडि लाखौं खर्च गरे पनि सञ्चालन हुँदैनन् । हिउँदमा धुले सडक अहिले हिलाम्य छ । पहिरो गएको, बाढीले बगाएको र सडक बिगारेकाले ग्रामीण भेगका अधिकांश सडकमा सवारी सञ्चालन हुन सकेको छैन । पानी परेपछि पहिरो जाने र सवारी चल्दाचल्दै पानीले बगाउने समस्याले तोकिएको समयमा गन्तव्यमा पुग्न नसकेको यात्रु बताउँछन् ।

क्व्होलासोंथर गाउँपालिका–५ सिङदीका अध्यक्ष गीतबहादुर गुरुङका अनुसार बेंसीसम्म सवारी साधन चलेको छ । बर्खायाममा गाउँमा सवारी साधन आउदैनन । ‘सवारी नचलेपछि तोकिएको समयमा गन्तव्यमा पुग्न सकिँदैन । अप्ठ्यारो सडकले सवारी साधन बिग्रिरहन्छ,’ उनले भने ।

भुजुङका यमबहादुर गुरुङका अनुसार गाउँसम्म सवारी साधन चले पनि घलेगाउँदेखि भुजुङसम्मको सडक बिग्रिएको छ । सडकमा गाडी फस्छन । दोर्दी गाउँपालिकाको नौथर सेरादेखि विकट सिमी र ताँजे जाने अधिकांश सडक हिलाम्य रहेको वडा ६ का अध्यक्ष नन्दराज घलेले बताए । सडक खुलाए पनि पानी परेपछि हिलाम्य हुन्छ । ‘सडकमा नाली छैन । पानीजति सडकमा छ,’ गाउँपालिकाका प्राय: सवैजसो सडकमा नाली नभएको बताउँदै उनले भने ।
मर्स्याङदी गाउँपालिका–४ का अध्यक्ष सुमन गुरुङका अनुसार बेंसीसहरबाट उत्तरी लमजुङका विभिन्न ठाउँ पुग्ने सडक अस्तव्यस्त जस्तै छन । खुदी–सिउरुङ जाने सडक बन्द छ । ‘बाटा अप्ठ्यारा छन् । मनाङ जाने मुल बाटो नै हिलाम्य छ । पछिल्ला समय गाउँघर जाने बाटो त हिलाम्य नै हुने भए । मोटरसाइकल चलाउन समेत कुनै कुनै ठाउँमा मुस्किल छ,’ उनले भने ।

दूधपोखरी गाउँपालिकामा अधिकांश सडकमा सवारी सञ्चालन हुन सकेको छैन । गाउँपालिका अध्यक्ष छुपिमाया गुरुङका अनुसार दूधपोखरी २ र ३ वडाबीचको लाङदीखोलासम्म मोटर चलेको छ । ‘हामी दसैंअगाडि ती बाटाहरू खोल्ने प्रयासमा छौं,’ उनले भनिन् । ट्राफिक प्रहरी असई छवबहादुर घर्तीले बर्खाममा पानी पर्ने र यसले अधिकांश ग्रामीण सडकमा क्षति पुगेको बताए । सडकका कारण दैनिक उपभोग्य वस्तुको ढुवानीमा समेत समस्या परेको उनले बताए ।

पूर्वाधार विकास कार्यालय लमजुङका सिनियर डिभिजन इन्जिनियर राम पराजुलीले बर्खायामको समय अधिकांश ग्रामीण सडक अवरुद्ध भएको बताए । कार्यालयका अनुसार जिल्लामा करीब १ हजार ४ सय किलोमिटर सडक छ । यसमा अधिकांश सडक हेर्ने जिम्मा स्थानीय तहलाई छ । कुल सडकमध्ये करीब ४० किलोमिटर मात्र कालोपत्रे छ । करीब ६० किलोमिटर सडक ग्राभेल छ ।

प्रकाशित : भाद्र १५, २०७६ ०९:४५
प्रतिक्रिया
पठाउनुहोस्

गर्मीमा विद्युत्‌को मार

कान्तिपुर संवाददाता

सर्लाही — दिनभर मजदुरी गरेर फर्किने कविलासी नगरपालिका–१ का रामएकवाल मण्डल राति थकाई मार्ने बेलामा पंखा चलाउन नपाउँदा खुला आकाशमुनि सत्ने गरेका छन् । बाहिर सुत्दा फेरि लामखुट्टे र सर्पको त्रास उस्तै छ ।

विद्युत् कटौतीले पंखा चलाउन नपाएका मण्डल लामखुट्टेको टोकाईबाट बिरामी पर्ने सम्भावना भए पनि बाहिरै सुत्न बाध्य छन् । प्रत्येक दिन दर्जनौं पटक कटौती हुने विद्युत् राति पनि आउने जाने मात्र गरेपछि निदाउन नसकिएको उनको गुनासो छ । ‘दिनभरि अर्काको काम गरेर थाकेको हुन्छु, राति सुत्ने बेलामा बिजुली जान्छ, गर्मीले सुत्न नसकेपछि बाहिर आएर सुतिरहेको छु,’ उनले भने, ‘राति निदाइएन भने भोलि काम गर्न कठिन हुन्छ, लामखुट्टे र सर्पको जोखिम भए पनि गर्मीका कारण बाहिर सुत्नु मेरो बाध्यता हो ।’

खपि नसक्नु गर्मीमा छिन–छिनमै हुने विद्युत् कटौतीले मण्डल मात्र होइन सर्लाहीबासी नै हैरान बनेका छन् । नेपाल विद्युत प्राधिकरणले लोडसेडिङमुक्त भएको घोषण गरे पनि दैनिक दर्जनौं पटक विद्युत अवरुद्ध हुँदा जिल्लाबासी पीडित बनेका हुन् । गर्मीले आहाल बनेको बेला घरिघरि बत्ती गइरहँदा गर्मीमा पंखा समेत चलाउन नपाउँदा जनजीवन थप प्रभावित बनेको स्थानीय मनोज ठाकुरले बताए । ‘दिनभरिको कडा मिहनेत त छँदैछ राति राति सुत्ने बेलामा विद्युत कटौतीले हैरान बनाउँछ,’ उनले भने, ‘देशलाई लोडसेडिङ मुक्त घोषणा गरेर अन्य मुलुकमा विद्युत् बिक्री गर्ने योजना सुन्दैछु, तर हामी घण्टौंसम्म विद्युत नआएर सास्ती खेप्न बाध्य छौं ।’

उखरमाउलो गर्मीमा विद्युत प्राधिकरणले छिनछिनमै विद्युत काट्ने गरेकाले उपभोक्ताहित विपरीत भएको नागरिक अगुवा रजनीकान्त झाको भनाइ छ । उनले छिनछिनमै हुने विद्युत् कटौती उपभोक्ता हकहित विपरीत भएको भन्दै अदालतमा मुद्दा दिने मन:स्थितिमा पुगेका छन् । ‘नेपाल विद्युत् प्राधिकरणले उपभोक्ता हकहितको ख्याल गरेको देख्न पाइँदैन, जिल्लाबासी अनियमित विद्युत कटौतीले हैरान छन्,’ झाले भने, त्यही भएर उपभोक्ता हकहितका लागि अदालत गुहार्ने योजना बनाएको छु ।’ झाले अनियमित विद्युत कटौतीसँगै भोल्टेज पनि अपडाउन हुने गरेको सुनाए ।

वर्षौंअघि मलंगवा वितरण केन्द्र मात्र हुँदा आकाशमा कालो बादल मडारिना साथ बिजुली जाने गरेको थियो । त्यस यता लालबन्दी वितरण केन्द्र र बरहथवा वितरण केन्द्र स्थापना भए पनि सेवामा भने सुधार हुन सकेको छैन । अहिले जुनेली रातमा पनि विद्युत घण्टौंसम्म जाने गरेको छ । विद्युत भोल्टेज स्थिर नहुँदा विद्युतीय उपकरण खराब हुने गरेको स्थानीयको भनाइ छ । विद्युतको रकम समयमा नतिरे २५ प्रतिशत जरिवाना तिर्नुपर्ने, तर विद्युत छिनछिनमै आउने जाने र भोल्टेज समस्याका कारण विद्युतीय सामग्री खराब भएमा क्षतिपूर्ति कसले तिर्ने भनेर स्थानीयले आवाज उठाइरहेका छन् । उखरमाउलो गर्मीमा घण्टौं हुने विद्युत कटौतीको तत्काल समाधान गर्न स्थानीयले आग्रह गरेका छन् ।

यता नेपाल विद्युत प्राधिकरणले भने आपतकालीन समस्यामा मात्र विद्युत कटौती गर्नु परेको जनाएको छ । विद्युतमा पुरानो संयन्त्र र गर्मीका बेला पंखा, एसी, फ्रिज जस्ता विद्युतीय उपकरण धेरै चल्ने भएकाले बढी भार थाम्न नसकेर बेला–बेलामा बत्ती जाने गरेको वितरण केन्द्रले जनाएको छ । ‘विद्युत कटौतीको तालिका छैन, केही समस्या आए मात्र हामीले विद्युत कटौती गर्ने हो,’ नेपाल विद्युत प्राधिकरण लालबन्दी वितरण केन्द्रका प्रमुख विजय महतोले भने ।

प्रकाशित : भाद्र १५, २०७६ ०९:४४
पूरा पढ्नुहोस्
प्रतिक्रिया
पठाउनुहोस्