३ दशकमा पनि बनेन पुल

अगन्धर तिवारी

पर्वत — सिमखेतबासीले मल्याङीखोलामा झोलुंगे पुल माग्न थालेको ३ दशकभन्दा बढी भइसक्यो । कुश्मा नगरपालिका–१० पिपलटारी र फलेबास नगरपालिका–३ शंकरपोखरीलाई जोड्न् पुल नहुँदा स्थानीय काठ तेर्स्याएर वारपार गरिरहेका छन् ।

सार्वजनिक मञ्च, तत्कालीन जिविस, सम्बन्धित सरकारका विभाग र मन्त्रालयसहित पुग्नुपर्ने ठाउँमा धेरै पटक आवाज पुर्‍याए । तर, कतैबाट सुनुवाई भएन ।

खोला हिउँदमा सुख्खा हुन्छ । वर्षाका ५ महिना भेल उर्लिन्छ । पीपलटारी र शंकरपोखरीबासीको वारपार नङमासुको साइनो छ । खोलाकिनारमा दुवै तर्फका बासिन्दाको खेतबारी छ । वर्षाकै समयमा धानकोदो रोप्न र घाँसदाउरा गर्न वारपार गर्नुपर्छ । त्यति मात्रै होइन, शंकरपोखरीतर्फको जनसहयोगी माविमा अध्ययन गर्ने विद्यार्थी पीपलटारीतर्फका विद्यार्थी धेरै छन् । कक्षा ११ र १२ पढ्न शंकरपोखरीतर्फका विद्यार्थी पीपलटारीको पूर्णेश्वर मावि पुग्न पनि यही बाटो प्रयोग गर्नुपर्छ ।

सिमखेतबासीको दैनिकी मल्याङीखोला पार नगरी चल्दैन । तर, खोलामा पुल नहुँदा पुस्तौंदेखि काठ तेर्स्याएर बनेको जोखिमपूर्ण साँघुबाट वारपार गर्नुको विकल्प छैन । ‘यहाँ पुलको माग गर्दागर्दै हाम्रा पुस्ताले जीवन बिताए,’ अगुवा मनरुपा सुवेदीले भनिन्, ‘अब ढिला भइसक्यो । दुवैतर्फ सडक जोडिएको छ । मोटरेबल पुल बनाउनुपर्छ ।’ मोटरेबल पुल भए हालसम्मको कष्ट बिर्सिने उनले बताइन् ।

दुई वडालाई सुविधा हुने गरी पुल माग्दामाग्दै थाकिसकेको स्थानीय बताउँछन् । ‘बागलुङको अञ्चलाधीश कार्यालयमा समेत पुलमाग्दै बुवाहरू पुग्नुभएको थियो,’ स्थानीय रतन गिरीले भने, ‘अहिलेसम्म पाइनएन । हामीलाई पानीजहाज र रेल चाहिँदैन । पुल भए पुग्छ ।’

२०५० सालसम्म सिसाठाँटी धौलागिरिकै चर्चित ठाउँ हो । सिद्धार्थ राजमार्ग नबन्दै स्याङ्जा र बुटवल नुन बोक्न जाने बटुवा बास बस्थे । फलेबास–३ का वडाध्यक्ष अर्जुनबहादुर कार्कीले भने, ‘उतिबेला यहाँका छाप्रामा व्यवसाय चलाउने अहिले पोखरा र काठमाडौंमा सफल व्यवसायी छन् ।’ सिसाठाँटीमा ०५० सालसम्म सय भन्दा बढी होटल भएको उनले सम्झिए । पोखरा बागलुङ राजमार्ग खुलेसँगै सिसाठाँटीको महत्त्वघटदै गयो । स्थानीयले पुरानो अवस्थामा फर्काउने गरी गणेश मन्दिरको जीर्णोद्धार गरेका छन् ।

मन्दिरका संरक्षक महेन्द्रबहादुर कार्कीका अनुसार अरु संरचना स्थानीयले निर्माण गरेको भए पनि खोलामा पुल नहुँदा दुवै गाउँका बासिन्दा निकै सास्ती भोग्न बाध्य छन् । ‘यहाँको रौनक हुनेबेला पनि पुलको माग नभएको होइन,’ कार्कीले भने, ‘०३६ सालमा ज्ञादीको कुलो उद्घाटनमा राजा आउँदा पुल मागेका थियौं । राजाले लठ्ठा बोक्नसके पुल बनाइदिने बोल्नुभएको थियो । लठ्ठा बोक्न आँट्नेकोही भएन ।’

खोलामा पुल नहुँदा वर्षामा निकै त्रास हुनेगरेको स्थानीय सारदा अधिकारीले बताइन् । ‘केटाकेटी, बुढाबुढी बढी जोखिममा छन्,’ उनले भनिन्, ‘हरेक दिन कतिबेला के हुने भन्ने त्रास हुन्छ ।’ वर्षाको समस्या टार्न बर्सेनि रूख काटेर साँघु बनाउँछन् । वर्षा सुरु हुनुअघि बनाएको साँघुले अर्को वर्ष काम गर्दैन । साँघुमा तर्न जोखिम हुन्छ ।

मंगलबार स्थानीय सिमखेत युवा क्लबले आयोजना गरेको तीज मेलामा पुगेका फलेबास नगरपालिकाका प्रमुख र कुश्मा नगरपालिकाकी उपप्रमुखले पुलको आवश्यकता महसुस गरेको बताए । ‘पुलको आवश्यकता राम्रोसँग महसुस भएको छ,’ फलेबासका प्रमुख पदमपाणि शर्माले भने, ‘दुइतर्फी सडक भएकाले अब पक्की पुल आवश्यक छ । पहल गर्छु ।’

कुश्माकी उपप्रमुख सीता काफ्ले लामिछानेले पक्की पुल भए कुश्मा र फलेबासबीचको सम्बन्ध नजिक हुने बताइन् । ‘पुलले दुई गाउँबीचमा मात्रै होइन । दुई नगरको विकास समेत हुन्छ,’ उनले भनिन् ।

प्रकाशित : भाद्र १३, २०७६ १०:४०
प्रतिक्रिया
पठाउनुहोस्

नियम पालना गर्दैनन् चालक

कान्तिपुर संवाददाता

कास्की — पोखरामा दिनहुँ सवारी साधन थपिइरहेका छन् । तर सडक, पार्किङस्थल जस्ता पूर्वाधार भने थपिएका छैनन । यसले ट्राफिक जाम हुन थालेको छ । मोटरसाइकललगायत अन्य सवारी चालकले ट्राफिक नियमको उल्लंघन गर्दा समस्या झन थपिँदै गएको छ ।

ट्राफिक व्यवस्थापनका लागि विभिन्न व्यस्त चोक तथा सडकमा नो पार्किङ स्टयान्ड, रोड डिभाइडर (ट्राफिक कोण) समेत राखिएको छ । तर, धेरैजसो चालकले नियम पालना गर्दैनन् । सडकमा प्रायः चालकले नोपार्किङ लेखिएकै स्थानमा मोटरसाइकल, स्कुटर, पानी बोक्ने गाडी, सामान बोक्ने भ्यान लगायतका साधन रोकेका हुन्छन् । कतिले जानेर रोक्छन् भने कतिले नजानेर रोक्ने ट्राफिक प्रहरीको भनाइ छ ।

‘धेरै जसो चालकले ट्राफिक नियमबारे बुझेर पनि अनुशासनहीन र लापारबाही गरेको पाइन्छ,’ जिल्ला ट्राफिक प्रहरीका निरीक्षक मुरारी मिश्रले भने, ‘जबसम्म चालकले ट्राफिक नियम पालना गर्दैन तबसम्म ट्राफिक जाम हुने दुर्घटना निम्त्याउने हुन्छ ।’ उनका अनुसार पोखराका विभिन्न चोकबाट नोपार्किङ स्ट्यान्डमा रोक्ने, गलत साइडमा रोक्ने, मापसे गरेर चलाउने लगायतका नियम पालना नगर्ने चालकलाई पक्राउ गरी जरिवाना तथा नियमअनुसार कानुनी कारबाही भइरहेको छ । नियमविपरीत रोकिने दैनिक डेढसयदेखि २ सयभन्दा बढी सवारी साधन पक्राउ पर्छन् ।

ट्राफिक व्यवस्थापनको नियमबारे लेखिएको बोर्डको चालकले ख्याल नगर्नाले दुर्घटना र सडक जामको समस्या आएको पोखरा महानगरपालिकाका ट्राफिक महाशाखा प्रमुख सुरेन्द्र पौडेलले बताए । ‘बोर्डको ख्याल राखिदिए त्यसमा ट्राफिक प्रहरीको आवश्यक पर्दैन,’ पौडेलले भने, ‘दुर्घटना र जाम हुने समस्या समेत आफैं हटेर जान्छ ।’ बस बिसौनीमा समेत अरू साधन रोकेको पाइन्छ । त्यसले समेत समस्या आएको नगरबस चालकको गुनासो छ । ‘यात्रु ओराल्ने ठाउँमा रोक्न भनेर ल्यायो त्यस ठाउँमा बाइक र स्कुटर हुन्छ, अनि कसरी हामीले रोक्ने ?,’ बसचालक कमल गुरुङले भने, ‘नियम सबैले पालना गरे समस्या आउँदैन ।’

न्युरोडमा भेटिएकी काहुँखोलाकी गीता केसी भन्छिन्, ‘खाली ठाउँ देखेर रोकें, बोर्डमा ध्यानै गएन, हतार थियो, एकैछिनमा हुन्छ भनेर बैंकमा पसेकी हुँ तर, समय लाग्यो ।’

प्रकाशित : भाद्र १३, २०७६ १०:३९
पूरा पढ्नुहोस्
प्रतिक्रिया
पठाउनुहोस्