लिफ्ट प्रविधिले ५० घरमा पानी

प्रकाश बराल

बागलुङ — बिहानको ३ बजे उठेर पधेंरामा लाइन बस्नुपर्थ्यो । एक गाग्री भरेर घर आइपुग्दा ३ घण्टा लाग्थ्यो । त्यसले बिहानको खाना पकाउनै ठिक्क । त्यसपछि दिउँसो पनि लाइन, बेलुकी पनि लाइन बसेर दैनिक खानेपानीको जोहो गरेको उनले अझै भुलेकी छैनन् ।

बागलुङ नगरपालिका–४ पाखाथरकी ७२ वर्षीया हेमन्तकुमारी सापकोटाले ती दुःखका दिन गएको अनुभव गरेकी छन् । बिहानभरि खानेपानीकै लागि धाउनु परेपछि छोराछोरी समयमा विद्यालय पठाउन नपाएकी सीता सापकोटाले अहिले घरको काम भ्याएर बजारमा जागिर खान थालेको बताइन् ।

वर्षौंदेखिको दुःख अन्त्य भएको पनि उनले बताइन् । सदरमुकाम नजिकै भए पनि ५० घरले खानेपानीको सास्ती खेपेका थिए ।
वर्षौंदेखिको समस्यालाई गाउँलेकै अगुवाईमा हटाएका छन् । समस्या हटाएका स्थानीयले लोपोन्मुख राइँलोको नामबाट योजनाको नाम राखेका छन् । राइँलो खानेपानी तथा सरसफाई उपभोक्ता समिति गठन गरेर आयोजना निर्माण भएको हो ।

एकैघरका दाजुभाइ धेरै हुँदा राइँलो सम्म पुग्थ्यो । थोरै सन्तान भएपछि साइँलो, काइँलो, राइँलो जस्ता नाम लोप भएकाले आयोजनाको नाम राखिएको उपभोक्ता समितिका अध्यक्ष वासुदेव उपाध्यायले बताए ।

आयोजना निर्माणमा बागलुङ नगरपालिकाले साथ दिएको छ । बस्तीदेखि ३ सय मिटर तलको मुललाई संकलनट्यांकी बनाएर लिफ्ट प्रविधिमार्फत डाँडामा पानी लगिएको छ । उक्त स्थानमा ५० हजार लिटरको अर्को ट्यांकी बनाएपछि गाउँभरि पानी वितरण गरिएको उपाध्यायले बताए ।

स्थानीयले प्रतिघर २० हजार रुपैयाँ नगदै संकलन गरेपछि नगरपालिकाले विनियोजन गरिदिएको २० लाख ७३ हजार रुपैयाँमा ४ लाख रुपैयाँको श्रमदान पनि थपेर उनीहरूले खानेपानी योजना सम्पन्न गरेका हुन् । योजना २ वर्षमा सकिएको हो । एक जनाले ४५ दिनसम्म श्रमदान गरेका छन् । ३ हजार मिटर पाइपलाइन बिच्छ्याएर अहिले ४५ घरमा पानी वितरण भइसकेको छ । छुटेका घरमा पनि छिटै पुग्नेछ ।

योजनाबाट घरघरमा चौबिसै घण्टा पानी आउन थालेको छ । ‘गाईभैंसीलाई पानीकै नजिक पाल्ने र घरमा गाग्रीमा खेपेको पानीले चलाएका थियौं, अहिले चाहिएपछि मात्र गाग्री थापिन्छ,’ सापकोटाले भनिन्, ‘कतिपय घरले ड्रम र गाग्री थन्क्याएका छन् ।’ पानी खसेको दुई महिना मात्र भयो ।

गाउँमा पानी आएपछि स्थानीयले घरघरमा गाईभैंसी पाल्न पनि थालेका छन् । ‘चाहिएका बेला पानी आउने भएपछि घरघरमा गाई भैंसी पाल्न थालेका छौं,’ स्थानीय हरिनारायण उपाध्यायले भने, ‘पानी बोक्ने सास्ती हटेको छ, घाँसपात प्रशस्त भएकाले पशुपालनबाट फाइदा पनि लिन सकिन्छ ।’

प्रकाशित : भाद्र १३, २०७६ १०:३९
ADVERTISEMENT
ADVERTISEMENT
प्रतिक्रिया
पठाउनुहोस्
ADVERTISEMENT

खाल्डाखुल्डीले यात्रामा जोखिम

सम्झना रसाइली

तनहुँ — सडक बनेको २४ वर्ष भयो । स्तरोन्नति नहुँदा सडकभरि खाल्डाखुल्डी छन् । तिनमा पानी भरिँदा यात्रा जोखिमपूर्ण बनेको छ । २०५२ मा ट्रयाक खोलिएको शुक्लागण्डकी नगरपालिकाको ३ र ६ वडामा पर्ने दुलेगौंडा–हर्कपुर मोटरमार्गको अवस्था दयनीय छ ।

सडकभरि खल्डैखाल्डा छन् । हिउँद होस् वा बर्खा सडक हिलाम्य हुन्छ । सडक मर्मतमा कुनै निकायले चासो नदेखाउँदा जोखिमपूर्ण यात्रा गर्नुपरेको स्थानीय बलराम घिमिरे बताउँछन् । उनले भने, ‘मोटरमा होस् या पैदल यात्रा, सधै असुरक्षित यात्रा गर्नुपरेको छ ।’ उनका अनुसार सडक बीचमा पोखरी नै भन्न मिल्ने खालका खाल्डाखुल्डी छन् । चाडपर्व नजिकिएका बेलामा तत्काल सडक मर्मत गर्नुपर्ने उनले बताए ।

बिग्रिएको सडकखण्डका कारण दुलेगौंडादेखि उदेनढुंगासम्म पुग्न पनि निकै कठिन भएको स्थानीय गोकर्ण पुंवर बताउँछन् । ‘पिच नभएका कारण समयसमयमा सडक खण्ड बिग्रिंदा गाउँले आफ्नै खर्चले सडक मर्मत गरिआएका थियौं,’ उनले भने, ‘चालु वर्षमा प्रदेशको बजेट परेको र तत्कालै काम भइहाल्छ भनी वडा कार्यालयले कुनै बजेट विनियोजन नगर्दा समस्या विकराल बन्दै आएको छ ।’ दुलेगौंडादेखि कालिमर्‍याङसम्म जसोतसो जिप पुग्छन् ।

जिपमा यात्रु हत्तपत्त चढ्न खोज्दैनन् । ठाउँ ठाउँमा सडक खण्ड बिग्रिएको हुनाले यात्रुहरू सहज रूपमा सवारी साधनमा यात्रा गर्न नपाएको पुंवर बताउँछन् । उनले भने, ‘जिपमा यात्रा गरे तापनि ठाउँठाउँमा यात्रुहरू झर्नुपर्ने हुन्छ । सडकको अवस्था साह्रै नाजुक छ ।’ सवारी चालक पनि त्रासैत्रासमा चलाउनु परेको गुनासो गर्छन । ‘यो सडकमा गाडी चलाउन निकै कठिन छ,’ जिप चालक गोपाल श्रेष्ठ भन्छन्, ‘बाटोको दुरवस्था कारण गाडी बिग्रेको बिग्रै हुन्छ । यही महिना मात्र गाडी मर्मत गर्दा ४५ हजार खर्च भो । जनप्रतिनिधि आएपछि बाटोको सुधार होला भनेको केही भएन ।’ ७ किमि सडक पार गर्न एक घण्टासम्म लाग्ने उनले बताए ।

वडा ३ का अध्यक्ष रामकुमार श्रेष्ठले छिट्टै सडक मर्मत गर्ने बताएका छन् । यसअघि पनि एक हप्ताभित्रै मर्मत सुधारको काम गर्ने भनिए तापनि जेसीभी नपाउनले समयमै काम हुन नसकेको श्रेष्ठले बताए । ‘नगरको जेसीभी शुक्लागण्डकी–१२ मा गएको छ,’ उनले भने, ‘आन्तरिक स्रोतबाट बाटो मर्मतका लागि बजेट उपलब्ध गराउन कार्यपालिकामा माग गरें तर सुनुवाइ भएन । कार्यपालिकाले आवश्यकभन्दा पनि अनावश्यक क्षेत्रमा बजेट विनियोजन गरेको छ ।’

सधैं बस/जिप गुड्ने सडकमा वडाबासी लामो समयदेखि भारी बोकेर हिँड्नुपर्ने अवस्था आउँदा आफू पनि चिन्तित भएको वडा ६ का अध्यक्ष कृष्णबहादुर पौडेल बताउँछन् ।

गत वर्ष सडक बोर्डबाट परेको ५ लाख रुपैयाँ उपभोक्ता समितिले हिनामिना गरेका कारण सडकको यो अवस्थामा आएको भन्दै वडाध्यक्ष पौडेलले नियमसंगत काम गर्न समितिलाईसचेत गराए ।

प्रकाशित : भाद्र १३, २०७६ १०:३७
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT