रुखमा बस ठोक्किँदा पाँच घाइते

अगन्धर तिवारी

पर्वत — बुधबार बिहान कुश्मा-बागलुङ सडकको नयाँपुलस्थित एक सिमलको रुखमा बस ठोक्किँदा पाँच यात्रु घाइते भएका छन् । कुश्मा नगरपालिका-१ छमर्केदेखि पोखरा जाने पालो थाप्न बागलुङ जाँदै गरेको ग१ख ८२५२ नम्बरको बस बस दुर्घटना हुँदा चालक सहित ५ जना घाइते भएका छन् । पर्वतको नयाँपुलमा बिहान साढे ८ बजेतिर  अनियन्त्रित भई सिमलको रुखमा ठोक्किएर दुर्घटना भएको प्रत्यक्षदर्शीले बताएका छन् । 

दुर्घटनामा छमर्के निवासी २५ वर्षीय चालक श्याम खड्का, कुश्मा-२ का याम शर्मा, कुश्माकै सविना शर्मा निजकी डेढ वर्षिया छोरी सचिना शर्मा र बागलुङ-७ ढिकीचौरका प्रेम शर्मा घाइते छन् । घाइतेहरुको धौलागिरी अञ्चल अस्पताल बागलुङमा उपचार भइरहेको छ ।

प्रत्यक्षदर्शी प्रनिश गिरीका अनुसार सिकारु चालकले सडकछेउमा रहेको रुखमा बस ठोक्याएका थिए । जिल्ला ट्राफिक प्रहरी कार्यालयले भने चालकको मोबाइल स्टेरिङ नजिकैको भुईंमा खसेको र टिप्ने क्रममा अनियन्त्रित भई दुर्घटना भएको जनाएको छ । ट्राफिक प्रमुख रामबहादुर भट्टक्षेत्रीले चालकले मोबाइल जोगाउन खोज्दा दुर्घटना भएको बताए ।

प्रकाशित : भाद्र ११, २०७६ १३:५३
प्रतिक्रिया
पठाउनुहोस्

विद्यालय आउँदै गर्दा बाटोमै बेहोस भएकी छात्राको मृत्यु

माधव अर्याल

पाल्पा — जिल्लाको रम्भा माविमा बुधबार पढ्न आएकी एक छात्राको बेहोस भएपछि मृत्यु भएको छ । रम्भा गाउँपालिका-५ ताँहुस्थित रम्भा माविमा बिहानीको अतिरिक्त कक्षा लिन आएकी पूर्वखोला-६ हेक्लाङकी १५ वर्षिया कमला फालको मृत्यु भएको विद्यालयले जनाएको छ । 

उनको उपचारका क्रममा लुम्बिनी मेडिकल कलेजमा मृत्यु भएको प्रहरीले जनाएको छ । उनी कक्षा १० की विद्यार्थी हुन् । उनको सालवास हेक्लाङ घर भएपनि ताँहु बाकुम मामाघरमा बसेर ताँहुमा पढ्न आउने गर्थिन् । उनी बेहोस भएप्छि अन्य आठ जना पनि रुँदै बेहोस् भएका थिए । स्थानीय प्रकाश श्रेष्ठका अनुसार बिहान अतिरिक्त कक्षा लिन आउने क्रममा रामपुर-आर्यभन्ज्याङ् सडक अन्तर्गत ताँहु बजारको बसाहा आइपुग्दा अचानक बेहोस भएकी हुन् । उनी बेहोस भएसँगै अन्य विद्यार्थी पनि अत्तालिएर बेहोस भएका थिए ।

६ जनाको ताँहुस्थित प्राथमिक स्वास्थ्य केन्द्रमा र दुई जनाको तानसेनस्थित मिसन अस्पतालमा उपचार गरिएको थियो । बेहोस विद्यार्थी सबै उपचारपछि घर फर्केका छन् । बिहान अतिरिक्त कक्षा सञ्चालन भएको र घरबाट आउने क्रममा ८ बजेतिर विद्यार्थी अचानक बेहोस भएका थिए । स्थानीय श्रेष्ठका अनुसार मृतक फाल बेहोस भएपछि अरु पनि रुादै बेहोस भएका हुन् । विद्यालयका प्रधानाध्यापक तुलसीराम अर्यालका अनुसार अहिले बाँकी बेहास भएका विद्यार्थीको अवस्था सामान्य छ ।

प्रकाशित : भाद्र ११, २०७६ १३:४४
पूरा पढ्नुहोस्
प्रतिक्रिया
पठाउनुहोस्