मध्यपहाडीको काम सुचारु

सडक साँघुरो भएपछि जिल्ला प्रशासन, प्रहरी, व्यवसायी, उद्योग वाणिज्य संघलगायतले सडकको काम सुचारू गर्न दबाब दिएका थिए
अगन्धर तिवारी

पर्वत — मनसुनको असर, निर्माण सामग्री, कामदार अभावलगायत कारण देखाउँदै काम रोकेको मध्यपहाडी लोकमार्ग (पुष्पलाल मार्ग) निर्माण कम्पनीले रोकिएको काम थालेको छ ।

सडक विस्तारका क्रममा भत्किएको पहिरो र खाल्डाखुल्डी पुर्नसमेत आनाकानी गरेको लामा कन्स्ट्रक्सनले केही दिनयता ठूला पहिरो पन्छाउने र सडकका खाल्डाखुल्डी पुर्नेकामलाई तीव्रता दिएको हो ।

विभिन्न प्राविधिक कारण देखाउँदै कम्पनीले गत असारको पहिलो सातादेखि काम रोकेको थियो । सडक फराकिलो पार्न व्यवसायीले सबैतिर एक्साभेटर लगाउँदा पर्वत खण्डको दर्जनभन्दा बढी स्थानमा पहिरो खसेर एकतर्फी यात्रा पनि जोखिमपूर्ण बनेको थियो ।

नयाँ पुलदेखि मालढुंगासम्म करिब दुई दर्जन पहिराले सडक साँघुरो भएपछि जिल्ला प्रशासन, प्रहरी, व्यवसायी, उद्योग वाणिज्य संघलगायतले सडकको काम सुचारु गर्न दबाब दिएका थिए । स्थानीयको दबाब व्यवसायीले नटेरेपछि संघीय सांसद पदम गिरीले संसद्मा समेत यो विषय उठाएका थिए । गिरीले धौलागिरीको मेरुदण्डका रूपमा रहेको लोकमार्गको काम रोकिँदा दुर्घटना हुन सक्ने भन्दै ठेकेदार कम्पनीलाई कारबाहीको मागसमेत गरेका थिए ।

चौतर्फी दबाबपछि लामा कन्स्ट्रक्सनले गत सातादेखि काम अघि बढाएको छ । कम्पनीका पर्वत प्रतिनिधि गोविन्द भुसालले अहिले सबैतिर काम अघि बढेको बताए । ‘वर्षाको केही समय मौसमले काम गर्न नदिएर रोकेकै हो,’ भुसालले भने, ‘बजारमा हल्ला गरेजस्तो सडक बिगारेर सम्पर्कविहीन भएको होइन । तोकिएको समयमा सक्दा हामीलाई नै फाइदा हुन्छ ।’ पर्वत खण्डको सडक दुई लेनको बनाउने गरी लामा कन्स्ट्रक्सनले ०७४ वैशाखमा ३ वर्षको समय लिएर सम्झौता गरी काम अघि बढाएको हो ।

यता मध्यपहाडी लोकमार्ग आयोजनाको पर्वतस्थित कार्यालयका अनुसार बीचमा केही समय काम रोकेर ठेकेदार कम्पनीले काममा ढिलासुस्ती गरेको स्विकारेको छ । कार्यालय प्रमुख आशिष थापामगरका अनुसार वर्षाको कारण देखाएर निर्माण व्यवसायीले केही समय काम रोक्दा सर्वसाधारण मर्कामा परे ।

‘निर्माणको बेला यातायात सहज गराउन निर्देशन दिएकै हो,’ उनले भने, ‘निर्देशन बमोजिम काम हुन सकेन । अहिले उहाँहरू तात्नुभएको छ । काम फुल फेजमा अघि बढेको छ ।’ उनले असार र साउनमा काम रोकिए पनि सम्झौता अनुसारकोलक्ष्य हासिल भएको दाबी गरे ।

मालढुंगा–बेनी ८ घण्टा अवरुद्ध
कुस्मा–१ पाङको अदुवाबारीदेखि बागलुङ नगरपालिकाको बांगेचौर जोड्ने झोलुंगे पुल निर्माणका क्रममा मालढुंगा–बेनी सडक दैनिक साढे ८ घण्टा अवरुद्ध भएको छ । कालीगण्डकी नदीमाथि निर्माणाधीन पुलका लठ्ठा तन्काउनेलगायत पूर्वाधारको काम गर्नुपर्ने भएकाले सडक विभिन्न समयमा गरी अवरुद्ध गर्नुपरेको सम्बद्ध पक्षले जनाएको छ ।

पर्वत प्रशासनमा बसेको सर्वपक्षीय बैठकले निर्माणाधीन पुलको पर्वत खण्डमा लठ्ठा तान्नका लागि सहायक जग निर्माण गर्नुपर्ने भएकाले सडक बन्द गर्ने निर्णय गरेको पर्वतका प्रमुख जिल्ला अधिकारी कल्पना घिमिरे नेपालले बताइन् । आगामी शुक्रबारसम्म सडक अवरुद्ध हुनेछ ।

पुलको लठ्ठा राख्ने भाग खन्नका लागि १२ दिन दैनिक १२ घण्टा माग्नुभएको थियो,’ प्रजिअ नेपालले भनिन्, ‘तीजको समय भएकाले मागे जति समय दिन सकिएन । तीज सकिएपछि थप समय उपलब्ध गराउने सहमति भएको छ ।’ भीरबाट ढुंगा पल्टिने हुनाले सम्भावित दुर्घटना रोक्न सवारी रोकिएको हो ।

बिहान ७–९ बजे र बिहान १० देखि अपराह्न ४ः३० बजेसम्म कुस्मा–१ मालढुंगादेखि जलजला गाउँपालिका–८ दमाखोलासम्मको सडक अवरुद्ध हुनेछ । सडक हुँदा पर्वतको मालढुंगा, जलजला हुँदै म्याग्दी र मुस्ताङ आउजाउ गर्ने सवारीलाई बागलुङ बजार र म्याग्दीको रत्नेचौर हुँदै बेनी पुग्ने वैकल्पिक मार्ग प्रयोग गर्न सूचना गरिएको छ । साना र हलुका सवारी पर्वतको सहस्रधाराबाट पाङ हुँदै दमुवाखोलासम्मको वैकल्पिक सडकसमेत प्रयोगगर्न सकिने सूचनामा भनिएको छ ।

यातायात व्यवसायीले भने दिउसोको समयमा एक घण्टा सडक खोल्नुपर्ने माग गरेका छन् । हिमशिखर कन्स्ट्रक्सनले निर्माण जिम्मा लिएको पाङ–बागलुङ झोलुङ्गे पुलको अहिले फाउन्डेसनको काम भइरहेको छ । सिंगल स्पानको यो झोलुङ्गे पुल मुलुकमा हालसम्मकै सबैभन्दा लामो दाबी गरिएको छ । पुलको लम्बाइ पाँच सय ६७ मिटर र १ सय ३८ मिटर उचाइको छ ।

प्रकाशित : भाद्र ९, २०७६ १०:२१
प्रतिक्रिया
पठाउनुहोस्

घलेगाउँमा संग्रहालय आकर्षण

आश गुरुङ

लमजुङ — घलेगाउँ भनेपछि जो पनि हुरुक्कै हुन्छन् । घलेगाउँ पुगेपछि के हेर्ने भन्ने सबैको मनमा हुन्छ । गाउँबीचैको संग्रहालय पर्यटकीय आकर्षणको केन्द्र बनेको छ ।

गाउँको लगभग बीच भागमा पर्ने सार्क भिलेज पर्यटन संग्रहालय पछिल्लो समय अध्ययन अनुसन्धानको केन्द्र बनेको छ । स्वदेशी तथा विदेशी पर्यटक संग्रहालय हेर्न मात्रै होइन, अध्ययन गर्नसमेत आउने गरेका छन् । गुरुङ संस्कृति र इतिहास अध्ययन तथा अनुसन्धान गर्नेसमेत संग्रहालयमा आउने गरेका पर्यटन व्यवस्थापन समिति, ग्रामीण पर्यटन घलेगाउँका सचिव उमलबहादुर
विकले बताए ।

‘गुरुङ समुदायले परापूर्वकालदेखि दैनिक कामकाजमा प्रयोग गर्ने प्रायः सबै सामग्री संग्रहालयमा छ । यही संग्रहालय हेर्न देशीविदेशी आउँछन्,’ उनले भने, ‘घलेगाउँ आफैंमा एउटा संग्रहालय हो । यहाँका हरेक घर संग्रहालय हुन् । घरमा अहिले प्रयोग नहुने र परापूर्वकालमा प्रयोग भएका सामग्रीलाई एकै ठाउँमा राखेका छौं ।

यसको अध्ययन तथा अनुसन्धानका लागि देशीविदेशी आउने गर्छन् ।’ अन्नपूर्ण संरक्षण क्षेत्र आयोजना (एक्याप), साविक उत्तरकन्या गाविस, जिविस, पर्यटन समिति तथा स्थानीयको सहयोगमा करिब १५ लाख रुपैयाँमा स्थानीयले संग्रहालय बनाएका थिए । हाल क्व्होलासोंथर गाउँपालिका–३ मा पर्ने संग्रहालय २०७३ माघ २२ गते राष्ट्रपति विद्यादेवी भण्डारीले उद्घाटन गरेको पर्यटन व्यवस्थापन समिति, ग्रामीण पर्यटन घलेगाउँका अध्यक्ष प्रेम घलेले बताए ।

‘यो संग्रहालयमा गुरुङ समुदायको जन्मदेखि मरणकार्यसम्म चाहिने सबै सामग्री, अन्य दैनिक जीवन र कामकाजमा प्रयोग हुने, पौराणिक, हस्तकलाका सामग्री राखेका छौं,’ उनले भने । संग्रहालयमा गुरुङवेशभूषा, लत्ताकपडा, हस्तकलाका सामग्री, बाँसको चोयाबाट निर्मित सामग्री, ऊनबाट निर्मित राडीपाखी लगायत सामग्री राखिएका छन ।

सार्क भिलेज हुँदै ‘स्मार्ट भिलेज’ को रूपमा अघि बढेको घलेगाउँमा पर्यटकको आगमन बढेको छ । पर्यटन समितिका कार्यालय सचिव दीर्घ घलेका अनुसार गाउँमा आउने पर्यटकको मुख्य रोजाइ संग्रहालय बनेको छ । ‘गाउँ आउने पर्यटक संग्रहालयमा पुग्छन् । फोटो र सेल्फी खिच्नेको भीड हुन्छ,’ उनले भने । पछिल्लो समय घलेगाउँ आउने पर्यटक १५ देखि २० प्रतिशत अध्ययन अनुसन्धानका लागि आउने गरेको उनले बताए ।

हराउँदो संस्कृति र परम्परालाई जीवन्त राख्न संग्रहालय बनाएको क्व्होलासोंथर गाउँपालिका अध्यक्षसमेत रहेका पर्यटन समितिका अध्यक्ष घलेले बताए । उनका अनुसार संग्रहालय अवलोकन गर्ने आन्तरिक पर्यटकसँग २५ रुपैयाँ र विदेशी पर्यटकबाट ५० रुपैयाँ शुल्क लिइन्छ । गाउँका ३४ घरमा होमस्टे सञ्चालन गरिएको छ । हिउँदको समय घलेगाउँमा दैनिक ३ सय बढी पर्यटक पुग्छन् ।

प्रकाशित : भाद्र ९, २०७६ १०:२०
पूरा पढ्नुहोस्
प्रतिक्रिया
पठाउनुहोस्