लुटपाट गर्नेको खोजीमा बेवास्ता

कान्तिपुर संवाददाता

बागलुङ — प्रतिवन्धित लागूपदार्थ सुघाएर युवकलाई बेहोस बनाई लुटपाट गर्नेको खोजीमा प्रहरीले बेवास्ता गरेको परिवारका सदस्यले गुनासो गरेका छन् ।गत बिहबिार बागलुङ नगरपालिका–१२ का युवक किरण आचार्य रात्रिबसमा लुटिएका थिए । प्रतिबन्धित ‘कोलोफम’ नामक लागूपदार्थ सुँघाइएकाले उनी बेहोस भएका थिए । आचार्यको ३६ घण्टा आईसीयूमा उपचार गरेपछि होस खुलेको थियो ।

बिरामी आचार्यले अझै आँखा देख्न सक्दैनन् । खुट्टा लुलो भएकाले हिँड्न नसक्ने अवस्थामा थप उपचार भइरहेको बाबु मुक्तिरामले बताए । परिवारका सदस्यले शुक्रबारै जिल्ला प्रहरीमा दिएको उजुरीको छानबिन सुरु नभएको गुनासो छ ।

जिल्ला प्रहरीका नायब उपरीक्षक झबिन्द्रप्रसाद भट्टराईले अनुसन्धानको प्रक्रिया सुरु भएको बताए । घटनापछि पीडितले काठमाडौंको गंगबुस्थित प्रहरी चौकीमा उजुरी गरेका थिए । धौलागिरी यातायात बस व्यवसायी समितिको दबाबपछि जिल्ला प्रहरीले उक्त उजुरी फिर्ता गरेर बागलुङ मगाएको थियो ।

काठमाडौंमा पक्राउ परेका चालक र सहचालक बागलुङ झिकाएपछि एक दिन राखेर चालकलाई छाडिएको छ । उक्त बस र चालक नियमित काममा फर्केका छन् । परिवारका सदस्य र आफन्त भने कानुनी उपचार खोज्दै दैनिक जिल्ला प्रहरी धाइरहेका छन् । तर प्रहरीले वास्ता नगरेको उनीहरूले गुनासो गरे ।

‘यो सामान्य घटना हो भन्नै दिनदिनै आएर झमेला नगर्न भनेका छन,’ पीडितका आफन्त भविदत्त शर्माले भने, ‘प्रक्रियामा गएर अनुसन्धान गरिएकाले काम भएपछि जानकारी दिन्छौं भनेका छन् ।’ तर प्रतिबन्धित लागूपदार्थबाट बिरामी परेकाले दोषीलाई पक्राउ गरेर कारवाही गर्नुपर्ने उनीहरूको माग छ ।


पटक पटक डाकिएका बैठकमा समितिका पदाधिकारी नआई प्रहरीका प्रमुखलाई फोन गर्ने पीडितको गुनासो छ । ‘समितिले वास्ता गर्दैन, प्रहरीले हुँदैछ भनेर तर्काउँछ,’ शर्माले भने, ‘हामी न्याय खोज्न कता जाने ।’ काठमाडौंस्थित मनमोहन अस्पतालमा आईसीयूमा उपचार गरेपछि पीडित आचार्यलाई फेरि आँखा उपचार थालिएको छ ।

धौलागिरी अञ्चल यातायात बस व्यवसायी समितिको ध१ख ६१३ नम्बरको बसमा उनी बिहीबार काठमाडौं गएका थिए ।रात्रिबसमा काठमाडौं हिँडेका उनलाई थानकोट पुग्ने बेलामा उक्त औषधि सुँघाएको अनुमान प्रहरीले गरेको छ । बेहोस भएपछि उनको साथमा भएको सिक्री, औंठी र नगद १५ हजार लुटिएको थियो ।

प्रकाशित : श्रावण २९, २०७६ १२:०४
ADVERTISEMENT
प्रतिक्रिया
पठाउनुहोस्
ADVERTISEMENT

पर्यटक लोभ्याउँदै झोलुंगे पुल

प्रत्येक शनिबार र नयाँ वर्षमा नुनथर क्षेत्रमा ठूलो संख्यामा भारतीय पर्यटक घुम्न आउँछन् । यहाँ आउने पर्यटकको रूचि मोटरबोटमा जलयात्रा गर्ने र बागमतीमाथिको झोलुंगे पुलमा सेल्फी खिच्ने हुन्छ
शिव पुरी

रौतहट — भारतको बैरगनियाका सोनुकुमार सिंह शनिबार बेलुकी वाग्मतीको नुनथरमा रहेको झोलुंगे पुलमाथि बसेर सेल्फी लिंदै थिए । उनले पहिलो पटक यस्तो पुल देखेका हुन् । पुलबाट तल र वरपरका मनमोहक दृश्य देखेपछि उनी लोभिए । केही समययता यो पुलले पर्यटकलाई लोभ्याउन थालेको छ।

पहाडको भौगोलिक बनोटलाई मध्यनजर गरेर चन्द्रपुर–१ स्थित वाग्मतीको नुनथरमा निर्माण गरिएको झोलुंगे पुल पर्यटक लोभ्याउने माध्यम बनेको छ ।

भारतीय पर्यटक सिंह साथीसँग रौतहट घुम्न आएका हुन् । प्रत्येक शनिबार नुनथर क्षेत्रमा आन्तरिक र बाह्य पर्यटकको भीड लाग्छ । उनीहरू रौतहट, सर्लाही जोड्ने झोलुंगे पुलमाथि बसेर सेल्फी लिन रुचाउँछन् । ‘यस्तो रमणीय ठाउँ र झोलङे पुल पहिलो पटक देखेको हुँ,’ सिंहले भने, ‘पुलले साँच्चिकै सबैको मन लोभ्याएको छ ।

यत्तिको रमाइलो पुल भारतीय सीमाक्षेत्रमा छैन ।’ साताको शनिबार र नयाँ वर्षमा यहाँ ठूलो संख्यामा भारतीय घुम्न आउँछन् । उनीहरू नुनथर पुग्नासाथ पुलमाथि चढ्छन् र तस्बिर लिन तँछाड मछाड गर्छन् । पुलबाट वरपर रमाइलो दृश्य देख्न सकिन्छ ।

पूर्वपश्चिम राजमार्गबाट झन्डै डेढ किलोमिटर पहाडी क्षेत्रमा तीन वर्षअघि झोलुंगे पुल निर्माण गरिएको हो । यसले पर्यटकलाई निकै लोभ्याएको छ । पर्यटकीय स्थल जोड्ने उद्देश्यले वाग्मतीमा पुल निर्माण गरिएको नुथर विकास क्षेत्रका अध्यक्ष एवम् सभासद रामकुमार भट्टराईले बताए । ‘पुलले पर्यटकलाई लोभ्याउन थालेको छ ।


यहाँ आउने पर्यटक सबैभन्दा पहिले पुलमै पुग्छन्,’ उनले भने, ‘चारैतिर पहाड र चुरेक्षेत्र भएकाले धार्मिक तथा पर्यटकीय रूपमा विकसित हुँदै गएको छ ।’ नुनथरमा पर्यटकलाई घुमाउन मोटरबोट राखेपछि झनै भीड बढेको अध्यक्ष भट्टराईले सुनाए । अहिले त्यस क्षेत्रमा मोटरबोटले पर्यटकलाई जलयात्रा गराउँछ ।

धार्मिक तथा पर्यटकीय स्थल भएकाले नुनथर घुम्न आउनेको आकर्षणको केन्द्र बन्दै आएको छ । चन्द्रपुरकै गैंडाटारको चाँदी नदी, रतौली खोला र फूलबारीस्थित हर्दिया खोला, मिठुअवास्थित झांझ खोला र गुजरा नगरपालिकाको कनकपुरस्थित सिम्रीटोलको धन्सार खोलामा झोलुंगे पुल निर्माणको चरणमा रहेको छ । स्थानीय विकास मन्त्रालयको सहयोगमा तत्कालीन जिल्ला विकास समितिमार्फत पुलहरू निर्माण भएका हुन् ।


पछिल्लो समय तराई/मधेसका जिल्लामा झोलुङ्गे पुल निर्माणले तीव्रता पाएको छ । तराईको बारा, पर्सा र रौतहट जिल्लामा झोलुङ्गे पुलको संख्या बढ्दै गएको छ । झोलुंगे पुल भन्नासाथ पहाडलाई मात्रै सम्झिन्थ्यो ।

अहिले मधेसका नदीमा पनि यस्ता पुलहरू निर्माण हुन थालेका छन् । यस्ता पुलहरू आकर्षण बनेका छन् । प्रदेश २ को रौतहट, बारा, पर्सा, सर्लाहीलगायतको जिल्लामा पछिल्ला वर्षमा झोलुंगे पुल निर्माणले आवतजावतमा सहजता ल्याएको छ । यो निकै आकर्षण बनेको छ । लागत कम र निर्माण कार्य चाँडै सम्पन्न हुने हुँदा सररकारले यस्ता पुल निर्माणलाई प्राथमिकता दिइएको हो ।


बृन्दावन नगरपालिका–२ स्थित परसौनी र बलरी गाउँको बीच सिमानामा पर्ने चादी नदीमा झोलुंगे पुल निर्माण गरिएको छ । अहिले त्यस भेगका स्थानीयलाई आवतजावतमा सहज भएको छ । यस्ता पुलहरूमा साँझपख सेल्फी लिनेको भीड लाग्छ ।

प्रकाशित : श्रावण २९, २०७६ १२:०२
पूरा पढ्नुहोस्
ADVERTISEMENT
प्रतिक्रिया
पठाउनुहोस्
ADVERTISEMENT
ADVERTISEMENT
×