कान्तिपुर वेबसाईट
AdvertisementAdvertisement
२२.१२°C काठमाडौं
काठमाडौंमा वायुको गुणस्तर: १५५

नगरपालिका कार्यालय पुग्दैनन् गाडी

प्रकाश बराल

बागलुङ — गलकोट नगरपालिकाको कार्यालय हटिया बजारमा झरेपछि एक किमी पैदल हिडेर मात्र पुग्न सकिन्छ । नगर प्रमुख चढ्ने जीप पनि छ तर उनले कार्यालयसम्म लैजान सक्दैनन् किनकि हटिया बजारदेखि चरौदीतर्फ जाने गौंदीखोलामा पुल छैन । जिप खोला तर्न सक्दैन । 

नगरपालिका कार्यालय पुग्दैनन् गाडी

नगरपालिका भवन आउन उत्तरतर्फ हरिचौरको बाटो प्रयोग गर्नुपर्छ । त्यसतर्फ दरमखोला छ । त्यहाँ पनि पुल छैन । पैदल आउनका लागि ‘राजाको पुल’ नामक झोलुंगे पुल तर्नुपर्छ । सयौं वर्ष पुरानो यो पुलको पनि एउटा लठ्ठा छिनेपछि स्थानीयले जोखिम मोलेर तर्न बाध्य छन् । खोलामा पुल बनाउन जिम्मा लिएका ठेकेदारले समयमा काम नगरेपछि पुल अलपत्र छन् ।


तोकिएको मितिभन्दा २ वर्ष ढिलाई भए पनि पुल बनेको छैन । दैनिक दर्जनौं गाडी गुड्नुपर्ने बाटो अहिले सुनसान छ । नगरपालिकामा सेवा लिन जानुपर्ने सयौं सेवाग्राही झोलुंगेपुल तरेर मात्र पुग्न सक्छन् । वर्षातमा पानी ठूलो भएकाले सवारी चल्न सकेका छैनन् । गत हिउँदमा ढिला गरी संरचनाको काम थालेकाले गौंदीखोलाले सामग्रीसमेत बगाएको निर्माण कम्पनीका प्रमुख कुमार खड्काले बताए ।


दुई खोलाको बीचमा नगरपालिका रहेकोले सवारी साधन टाढै राखेर कर्मचारी पनि हिंडेरै पुग्छन् । सडक डिभिजन कार्यालयको ठेक्कामा निर्माणधीन पक्की पुल गत वर्ष निर्माण सकिनुपर्नेमा अहिलेसम्म अलपत्र परेको हो । ‘नगरपालिकाको बजेटले सडक सुधारको काम गरे पनि पुल नभएपछि सहजै जाने अवसर छैन,’ नगर प्रमुख भरत शर्मा गैह्रेले भने, ‘ठेक्का लिएकाले समयमा नगरिदिएपछि हामीमाथि अपजस आउने गरेको छ ।’


मन्त्रालयबाट आएका पाहुनालाई पनि पैदलै कार्यालय लगेको उनले गुनासो गरे । स्थानीयले भने नगरपालिकाले काम नगरेको आरोप लगाइरहेकामा जवाफ दिन नसकेको गैह्रेले बताए । ‘नयाँबाटो जुम्ली आचार्य’ संयुक्त निर्माण कम्पनीले साढे ३ करोड रुपैयाँ लागतमा २ वर्षअघि सक्ने गरी काम थालेको थियो ।


समय सकिएपछि डिभिजन सडक कार्यालयले पटकपटक पत्राचार गर्दा समेत कम्पनीबाट काम नभएको इन्जिनियर चन्द्रेश्वर शाहले बताए । ‘अघिल्लो वर्षको असारसम्म म्याद थप्न कम्पनीले आग्रह गरेको थियो,’ शाहले भने, ‘हामीले किन थप्ने भनेर कारण खोजेपछि मात्र विभिन्न कारण देखाएर म्याद थपियो ।’


विभाग तहमा पनि उनीहरूले काम नगरेको गुनासो पुगेको उनले बताए । म्याद थपेपछि गत फागुनमा थालिएको काम वैशाखमै आएको बाढीले बगाएको हो । त्यसपछि यहाँ काम भएको छैन । चरौंदीको फाँटमा अहिले सयौं घर बन्न थालेका छन् । नगरपालिकाले मापदण्ड बनाएर नयाँ घरको नक्सापास गर्ने काम थालेको छ ।


मापदण्डअनुसार बन्न थालेका संरचनाका लागि सामग्री लैजान नपाएपछि वर्षात लागेपछि धेरै घर अलपत्र छन् । वर्षातमा समस्या भए पनि आगामी हिउँदमा भने जसरी पनि पुल बनाइछाड्ने खड्काले बताए । ‘प्राविधिक कारणले फर्मा राखेर ढलानको काम गर्ने बेलामा बगेकोले काम अलपत्र परेको हो,’ उनले भने, ‘यो वर्ष वैशाखमै नसोचेको बाढी आएको थियो ।’ घुमाउरो बाटो ट्रयाक्टरमा सामग्री ढुवानी गर्दा दोब्बर लगानी लागेको उपभोक्ताले गुनासो गरे ।

प्रकाशित : श्रावण २१, २०७६ १०:०३
प्रतिक्रिया
पठाउनुहोस्
जनताको राय

बैंकमा लगानीयोग्य रकम थुप्रिएर साढे ६ खर्ब नाघेको छ। बैंकहरूले ब्याजदर घटाउँदासमेत कर्जा प्रवाह बढ्न नसक्नुको कारण के हो?