दृश्य हेर्न पाइने झोलुंगे पुल

विना थापा

कास्की — झोलुंगे पुल केका लागि ? उत्तर सहजै छ, खोला वारपार गर्न सहजताका लागि । पोखरामा बनेको पुलको विशेषता भने फरक छ । प्राकृतिक दृश्य हेर्नका लागि झोलुंगे पुल बनेको छ । 

पोखरा १७ स्थित सितापाइला ढुङगे साँगुमा बनेको सितापाइला झोलुङगे पुलबाट प्रकृतिक दृश्य अवलोकन गरि फकिएका आन्तरिक पर्यटक । तस्बिर : विना/कान्तिपुर

पोखरा–१७ र १५ वडा जोड्ने सेती नदीमाथिको सीतापाइलामा बनेको पुलमा यतिबेला वारपारका लागि पैदल यात्रुभन्दा पनि आन्तरिक र बाह्य पर्यटकको घुइचो लाग्ने गर्छ ।

पुलबाट भासिएको सेती नदी, खोंच र केही माथि रहेको प्राकृतिक पुललगायत रमणीय दृश्य देखिन्छ । यसले पर्यटकको मन लोभ्याएको हो । पुलले पर्यटन प्रवर्द्धनमा टेवा पुग्ने सेती नदी सीतापाइला झोलुङगे निर्माण उपभोक्ता समितिको विश्वास छ । पुलमा दैनिक सय बढी आन्तरिक तथा बाह्य पर्यटक आउन थालेको समितिका अध्यक्ष प्रेम थापामगरले बताए ।

अरु पुलभन्दा छुट्टै विशेषता रहेको पोखरा–१० रामघाटकी चन्द्रा भुजेलले बताइन् । उनी पुलबाट प्राकृतिक दृश्य हेरिरहेकी थिइन् । ‘धेरै पुल आवतजावत गरियो तर प्राकृतिक दृश्यका लागि बनेको पुलमा आएको पहिलो पटक हो,’ भनिन् ।

सय मिटर नजिक प्राकृतिक पुल भएकाले त्यहाँबाट सबैखालका सवारी साधन समेत हिंड्न मिल्ने भएकाले आवतजावतमा लाभान्वित भएको भन्न नमिल्ने स्थानीय समाजसेवी दिपक आचार्यले बताए । ‘पुलदेखि सेती नदी, प्रकृति पुलमा सवारी साधत आवतजावत गरिएको हरिहर गुफा, खोजलगायत प्राकृतिक थुप्रै दृश्य अवलोकनका लागि पुलले सहज गराउँछ,’ आचार्यले भने, ‘पुलबाट देखिने सेती अन्तबाट देख्न सकिँदैन, त्यसकारण पनि यसलाई व्यवस्थित गरे धेरै पर्यटन भित्र्याउन सकिन्छ ।’ पुल पर्यटकीय रुपमा महत्त्वपूर्ण छ । प्राकृतिक साँघु नेपालको पहिलोसमेत हो, जसकारण पनि पर्यटन प्रवर्द्धनको विकासमा टेवा पुर्‍याउने धेरै सम्भावना भएकाले यसलाई व्यवस्थित रुपमा अझ अगाडि बढ्नुपर्ने आवश्यकता छ ।

पुलले पर्यटन प्रवर्द्धनका लागि महत्त्वपूर्ण भूमिका खेल्ने विश्वास पोखरा–१७ का वडासदस्य वैकुण्ठ भण्डारीले बताए । यहाँदेखि प्राकृतिक पुल, सेती नदी, खोज, शुक्लागण्डकी सीताघाट, हरिहर गुफालगायत दृश्य देख्न सकिन्छ । पुलको लम्बाइ ५६ मिटर र उचाइ ८० मिटर छ ।

प्रकाशित : श्रावण २१, २०७६ १०:०२
प्रतिक्रिया
पठाउनुहोस्

मन लोभ्याउने झरना

प्रताप रानामगर

दमौली — ‘आहा, कति राम्रो झरना ।’ देख्ने सबै यसै भन्छन् । सबैले क्यामरा र मोबाइल निकालेर तस्बिर र सेल्फी खिच्न थाल्छन् । तनहुँको म्याग्दे गाउँपालिका– ५ थाग्दीमा रहेको झरनाले धेरैको मन लोभ्याएको छ । त्यसैले त यहाँ आन्तरिक पर्यटकको घुइचो लाग्न थालेको स्थानीय कान्छीबराही टोल विकास संस्थाकी अध्यक्ष नयाँमाया थापाले बताइन् ।

तनहुँको म्याग्देमस्थित कान्छीबराही झरना । तस्बिर : प्रताप/कान्तिपुर

‘झरना र्हेर्नका लागि ठाउँ ठाउँबाट पाहुना आउनुहुन्छ,’ उनले भनिन्, ‘भरनाले सबैलाई लोभ्याएको छ ।’ झरना हेरेपछि आनन्द र खुसी भएर फर्कने उनले बताइन् । पछिल्लो समय झरनाको प्रचार भएसँगै पर्यटक आउन थालेको स्थानीयको भनाइ छ । ‘झरना असाध्यै राम्रो छ,’ आन्तरिक पर्यटक शोभा थापाले भनिन्, ‘मेरो पनि मनै लोभ्यायो । यसको प्रचार गरी पूर्वाधार बनाउन सके गतिलो पर्यटकीय गन्तव्य हुन्थ्यो ।’ झरना देखेपछि सबै दुःख कष्ट भुलेको उनले बताइन । सामाजिक सञ्जालमा झरनाको फोटो देखेर भिमादबाट साथीभाइ मिलेर र्हेर्न आएको र झरना नजिकै ठाँटी वा प्रतिक्षालय बनाउन उनले सुझाइन् ।

झरना नजिकै कान्छीबराही मन्दिर पनि रहेको समितिकी अध्यक्ष थापाले बताइन् । त्यसैले झरनाको नाम पनि कान्छीबराही राखिएको छ । स्थानीय झरनालाई पर्यटकीय गन्तव्य बनाउने योजनामा छन् साथै वनभोज स्थलको रुपमा विकास गर्ने योजना पनि छ । झरना नजिकै सार्वजनिक जग्गा भएकाले पूर्वधार विकासका लागि गाउँपालिकासंग बजेट माग गर्ने उनले बताइन ।

वनभोजस्थलले आन्तरिक पर्यटक बढ्ने विश्वास स्थानीयको छ । ‘झरना र्हेर्न मेसो मिलाएर पाहुना वनभोज खान पनि आउछन,’ उनले भनिन, ‘पूर्वाधार निर्माणमा गाउँपालिकाले बजेट विनियोजन गर्नैपर्छ ।’ झरनाले म्याग्दे गाउँपालिकाको पर्यटन प्रबर्द्धनमा टेवा पुर्‍याउने गाउँपालिका अध्यक्ष मायादेवी रानाले बताइन् । ‘पर्यटकीय दृष्टिकोणले झरना निकै राम्रो छ,’ उनले भनिन्, ‘झरनको क्षेत्रमा पर्यटन प्रबर्द्धन गर्न गाउँपालिका तयार छ ।’

कान्छीबराही झरनाको विस्तृत अध्ययन गरी पर्यटकीय गतिविधि केके थप्न सकिन्छ भन्नेतर्फ आफू लागेको उनको भनाइ छ । क्यानोनिङको लागि विज्ञ र प्राविधिकसँग सल्ल्लाह गर्न लागिएको उनले बताइन् । झरनाको क्षेत्रमा पर्यटीकय स्थलका लागि विस्तृत अध्ययनपछि गाउँसभाबाट आवश्यक बजेट विनियोजन गर्न सकिने भएकाले वडाबाट योजना लिएर आउनुपर्ने उनले स्थानीयसँग आग्रह गरिन् ।

झरनाको उचाइ करिब ७० मिटर छ । झरना नजिक कान्छीबराही मन्दिर पनि छ । जहाँ दर्शन पनि गर्न सकिन्छ । उक्त झरना पृथ्वीराजमार्गको खैरेनी भिमाद सडक खण्डमा पर्ने थाग्दीबाट करिब डेढ किमी दूरीमा पर्छ । थाग्दीबाट झरनासम्म सडकको ट्र्याक खुलेको छ ।

प्रकाशित : श्रावण २१, २०७६ १०:०१
पूरा पढ्नुहोस्
प्रतिक्रिया
पठाउनुहोस्