मन लोभ्याउने झरना

प्रताप रानामगर

दमौली — ‘आहा, कति राम्रो झरना ।’ देख्ने सबै यसै भन्छन् । सबैले क्यामरा र मोबाइल निकालेर तस्बिर र सेल्फी खिच्न थाल्छन् । तनहुँको म्याग्दे गाउँपालिका– ५ थाग्दीमा रहेको झरनाले धेरैको मन लोभ्याएको छ । त्यसैले त यहाँ आन्तरिक पर्यटकको घुइचो लाग्न थालेको स्थानीय कान्छीबराही टोल विकास संस्थाकी अध्यक्ष नयाँमाया थापाले बताइन् ।

तनहुँको म्याग्देमस्थित कान्छीबराही झरना । तस्बिर : प्रताप/कान्तिपुर

‘झरना र्हेर्नका लागि ठाउँ ठाउँबाट पाहुना आउनुहुन्छ,’ उनले भनिन्, ‘भरनाले सबैलाई लोभ्याएको छ ।’ झरना हेरेपछि आनन्द र खुसी भएर फर्कने उनले बताइन् । पछिल्लो समय झरनाको प्रचार भएसँगै पर्यटक आउन थालेको स्थानीयको भनाइ छ । ‘झरना असाध्यै राम्रो छ,’ आन्तरिक पर्यटक शोभा थापाले भनिन्, ‘मेरो पनि मनै लोभ्यायो । यसको प्रचार गरी पूर्वाधार बनाउन सके गतिलो पर्यटकीय गन्तव्य हुन्थ्यो ।’ झरना देखेपछि सबै दुःख कष्ट भुलेको उनले बताइन । सामाजिक सञ्जालमा झरनाको फोटो देखेर भिमादबाट साथीभाइ मिलेर र्हेर्न आएको र झरना नजिकै ठाँटी वा प्रतिक्षालय बनाउन उनले सुझाइन् ।

झरना नजिकै कान्छीबराही मन्दिर पनि रहेको समितिकी अध्यक्ष थापाले बताइन् । त्यसैले झरनाको नाम पनि कान्छीबराही राखिएको छ । स्थानीय झरनालाई पर्यटकीय गन्तव्य बनाउने योजनामा छन् साथै वनभोज स्थलको रुपमा विकास गर्ने योजना पनि छ । झरना नजिकै सार्वजनिक जग्गा भएकाले पूर्वधार विकासका लागि गाउँपालिकासंग बजेट माग गर्ने उनले बताइन ।

वनभोजस्थलले आन्तरिक पर्यटक बढ्ने विश्वास स्थानीयको छ । ‘झरना र्हेर्न मेसो मिलाएर पाहुना वनभोज खान पनि आउछन,’ उनले भनिन, ‘पूर्वाधार निर्माणमा गाउँपालिकाले बजेट विनियोजन गर्नैपर्छ ।’ झरनाले म्याग्दे गाउँपालिकाको पर्यटन प्रबर्द्धनमा टेवा पुर्‍याउने गाउँपालिका अध्यक्ष मायादेवी रानाले बताइन् । ‘पर्यटकीय दृष्टिकोणले झरना निकै राम्रो छ,’ उनले भनिन्, ‘झरनको क्षेत्रमा पर्यटन प्रबर्द्धन गर्न गाउँपालिका तयार छ ।’

कान्छीबराही झरनाको विस्तृत अध्ययन गरी पर्यटकीय गतिविधि केके थप्न सकिन्छ भन्नेतर्फ आफू लागेको उनको भनाइ छ । क्यानोनिङको लागि विज्ञ र प्राविधिकसँग सल्ल्लाह गर्न लागिएको उनले बताइन् । झरनाको क्षेत्रमा पर्यटीकय स्थलका लागि विस्तृत अध्ययनपछि गाउँसभाबाट आवश्यक बजेट विनियोजन गर्न सकिने भएकाले वडाबाट योजना लिएर आउनुपर्ने उनले स्थानीयसँग आग्रह गरिन् ।

झरनाको उचाइ करिब ७० मिटर छ । झरना नजिक कान्छीबराही मन्दिर पनि छ । जहाँ दर्शन पनि गर्न सकिन्छ । उक्त झरना पृथ्वीराजमार्गको खैरेनी भिमाद सडक खण्डमा पर्ने थाग्दीबाट करिब डेढ किमी दूरीमा पर्छ । थाग्दीबाट झरनासम्म सडकको ट्र्याक खुलेको छ ।

प्रकाशित : श्रावण २१, २०७६ १०:०१
प्रतिक्रिया
पठाउनुहोस्

गण्डकी विश्वविद्यालय विधेयक विधायन समितिमा

प्रतीक्षा काफ्ले

गण्डकी — गण्डकी विश्वविद्यालयको स्थापना, व्यवस्थापन र सञ्चालन गर्न बनेको विधेयक दफावार छलफलका लागि विधायन समितिमा पठाइएको छ । प्रदेशसभाको सोमबारको बैठकमा सैद्धान्तिक छलफलपछि समितिमा पठाएको हो । विधेयक आइतबारको बैठकमा प्रदेशसभामा पेस भएको थियो । 

सामाजिक विकासमन्त्री नरदेवी पुनले विश्वविद्यालय प्रदेश सरकारले आफ्नो मातहतमा स्थापना गर्ने उद्देश्यसहित विधेयक ल्याएको बताइन् । ‘अहिलेसम्म भएका विश्वविद्यालय संघीय सरकारको मातहतमा छन,’ उनले भनिन्, ‘हाम्रो मातहतमा केही छैनन् । यसैले अर्को विश्वविद्यालय खोल्न लागेका हौं ।’

उनले विश्वविद्यालय राजनीतिमुक्त रहने र अनुसन्धानको थालनी हुने दाबी गरिन् । अहिलेको शिक्षा पद्धति ७० प्रतिशत साधारण र ३० प्रतिशत प्राविधिक रहेकाले यसलाई सुधारका लागि ३० प्रतिशत साधारण र ७० प्रतिशत प्राविधिक बनाउने लक्ष्य सरकारको रहेको पुनले बताइन् । उनले विद्यालय खुलेसँगै नेपाली युवायुवती र नेपाली पैसा पनि बिदेसिन नपर्ने बताएकी छन् ।

विधेयकमाथिको सैद्धान्तिक छलफलमा भाग लिँदै सांसद डोबाटे विश्वकर्माले गण्डकी विश्वविद्यालय निर्माणका लागि गठित समितिमा महिला, दलितलगायतको सहभागिता सुनिश्चित गर्न माग गरेका थिए । धनञ्जय दवाडीले एक सय वर्षपछाडिको विकास हेरेर गण्डकी प्रदेश सरकारले पनि विकासको नयाँ खाका कोर्नुपर्ने बताउँदै गण्डकी विश्वविद्यालयले अब प्रदेशको मात्र नभई देशकै मुहार फेर्ने बताए । ‘सरकारले आफ्नै क्षमता र ज्ञानले सुरु गर्न लागेको हो,’ उनले भने ।

यसैगरी प्रभा कोइरालाले शिक्षालाई व्यावहारिक, सैद्धान्तिक, स्वतन्त्र र जनउपयोगी गराउने गरी स्थापना हुन लागेको विश्वविद्यालयको विषयमा कसैले पनि विरोध नगर्न अनुरोध गरिन् । प्रदेशले अपनत्व लिएर अघि बढ्न पाउनुपर्ने उनको भनाइ थियो । पियारी थापाले स्वच्छ र खुला प्रतिस्पर्धाबाट कर्मचारी भर्ना गर्नुपर्ने बताइन् ।

यसैगरी हरिशरण आचार्यले पोखरा विश्वविद्यालय, गण्डकी प्रतिष्ठान हुदाँहुदै नयाँ विश्वविद्यालय खोल्न नहुने बताए । भइरहेकालाई संरक्षण र स्तरोन्नति गर्नुपर्ने उनको भनाइ थियो । उनले गण्डकी विश्वविद्यालयको विधेयक स्थगित गर्नसमेत माग राखेका छन् । प्रमुख प्रतिपक्ष दल कांग्रेसका प्रमुख सचेतक मणिभद्र शर्माले पनि गण्डकी विश्वविद्यालय स्थापनाबारे विरोध जनाएका छन् । सत्तापक्षका कृष्ण थापाले गण्डकी विश्वविद्यालय आवश्यक रहेको र तत्काल यसको प्रक्रिया अगाडि बढाउनुपर्ने बताएका थिए ।

प्रकाशित : श्रावण २१, २०७६ ०९:५९
पूरा पढ्नुहोस्
प्रतिक्रिया
पठाउनुहोस्